48-ТӤ УРОК

Быръе умой эшъёс

ЛЭЗЁНО

Быръе умой эшъёс

Котькуд адямилы эш кулэ. Эшъёс ке вань, шуг-секытъёс капчиенгес ортчо, нош шумпотон эшшо но тросгес луэ. Но Библиын верамын, котькуд адями умой эш луыны уг быгаты шуыса. Нош кызьы умой эш быръёно? Ойдолэ тодомы.

1. Малы умой эшъёс быръёно?

Милям эшъёсмы умоесь ке, ми но умой луомы, нош уродэсь ке, ми но урод луомы. Вераны кулэ, эшъёсмылэн урод сямъёссы милемлы пыӵаны быгато, интернет пыр вераськыса но. Библиын гожтэмын: «Визьмо муртэн кусып возись ачиз но визьмо луоз, нош укылтэм муртэн эшъяськись [соин, кин Иеговаез уг яраты] ачиз но сӧриськоз» (Мадёнъёс 13:21). Эшъёсмы Иеговаез ярато ке, соос юрттозы милемлы Иеговалы оскымон кыльыны но умой ужпумъёс кутыны. Нош эшъёсмы Иеговаез уг ярато ке, соос милемыз Иегова дорысь палэнтозы. Тӥни малы Библия ӧте милемыз туж чакласькыса эшъёс бырйыны. Инмарез яратӥсь адямиосын эшъяськимы ке, ми быгатомы ог-огмылы юрттыны но ог-огмес юнматыны (1 Фессалоникаослы 5:11).

2. Чакла-а Иегова, кыӵе эшъёсты ми бырйиськомы?

Иегова сак быръе, кинэн эшъяськыны. Библиын гожтэмын: «Шонер улӥсьёсын Со кусып возе» (Мадёнъёс 3:32). Кызьы учкоз Иегова, ми эшъяськимы ке соосын, кинъёс сое уг ярато? Со ӝоже усёз. (Лыдӟе Иаковлэсь 4:4.) Нош ми эшъяськимы ке соосын, кинъёс сое ярато, со солы шумпотоз. Ми туж тыршимы ке Иеговаен матысь кусыпъёс возьыны, со милемлы умой эш луоз (Псалтирь 14:1—4).

МУРГЕС ЭСКЕРЕ

Ойдолэ тодомы, малы сак луоно эшъёс бырйыку но кызьы быръёно эшъёсты, кудъёсыз зэмзэ ик умой эшъёс луозы.

3. Палэнске урод эшъёслэсь

Урод эшъёс со сыӵе эшъёс, кудъёсыз Инмарез уг ярато но солэсь уг кылзӥсько. Учке ВИДЕОРОЛИКЕЗ но юанлы валэктон сётэ.

ВИДЕОРОЛИК: «Дышетске урод эшъёслэсь палэнскыны» (6:17)

Кызьы ми, асьмеос но сое валатэк, урод адямиосын эшъяськыны быгатомы?

Лыдӟе 1 Коринфъёслы 15:33 но та юанъёслы валэктонъёс сётэ:

Кыӵе адямиос урод эшъёс луозы? Малы тӥ озьы малпаськоды?

Лыдӟе Псалтирез 118:63 но та юанлы валэктон сётэ:

Кыӵе адямиос милемлы умой эшъёс луозы?

Одӥг сисьмем яблок мукетъёссэ сисьтэ. Кызьы одӥг урод эш тонэ сӧрыны быгатэ?

4. Милесьтым пӧртэм адями но милемлы эш луыны быгатэ

Библиын верамын израиль калык пӧлысь кык пиосмуртъёслэн эшъяськемзы сярысь. Со Давид но Ионафан. Соос туж пӧртэмесь вал. Одӥгез — пудо возьмась, нош мукетыз — эксэйлэн пиез. Соослэн арлыдзы но туж пӧртэм вал. Озьы ке но соос туж матысь эшъёс вал. Лыдӟе 1 Эксэйлыкъёслэсь 18:1 но та юанлы валэктон сётэ:

Малы милесьтым пӧртэм адями но милемлы эш луыны быгатэ?

Лыдӟе Римъёслы 1:11, 12 но та юанлы валэктон сётэ:

Кызьы Иеговаез яратӥсь эшъёс ог-огзэс юнматыны быгато?

Та видеороликез учкыса, тӥ тододы, кызьы егит агай аслыз эш шедьтӥз, кудӥз солэсь туж пӧртэм вал. Учке ВИДЕОРОЛИКЕЗ но юанъёслы валэктонъёс сётэ.

ВИДЕОРОЛИК: «Соос тынад эшъёсыд луыны быгато» (5:06)

Малы Акиллэн анаез но атаез сюлмаськизы, куке пизы ӵош дышетскисьёсыныз эшъяськиз?
Малы Акиллы нырысь кельше вал ӵош дышетскисьёсыныз дырзэ ортчытъяны?
Мар юрттӥз солы мӧзмонзэ вормыны?