NGUDO 48
Khethani Khonani Dzaṋu Zwavhuḓi
Khonani dza vhukuma dzi ita uri ri dzule ro takala nahone dzi a ri khuthadza musi zwi tshi konḓa. Fhedzi Bivhili i ri tsivhudza uri a si muṅwe na muṅwe ane a nga vha khonani yavhuḓi. Zwino ni nga khetha hani khonani dzavhuḓi? Kha ri haseledze mbudziso dzi tevhelaho.
1. Khonani dzine na dzi khetha dzi nga ni ṱuṱuwedza hani?
Kanzhi ri a fhedzisela ri tshi vho fana na vhathu vhane ra fhedza tshifhinga navho. Vha nga ri ṱuṱuwedza nga nḓila yavhuḓi kana i si yavhuḓi, hu si na ndavha uri ri khou fhedza tshifhinga ri navho kana ri tshi khou amba navho nga zwishumiswa zwa thekinolodzhi. Ndi ngazwo Bivhili i tshi ri: “Ane a tshimbila na vhaṱali u ḓo ṱalifha, fhedzi ane a konana na matsilu [vhane vha si fune Yehova] zwi nga si mu tshimbilele zwavhuḓi.” (Mirero 13:20) Khonani dzine dza funa Yehova na u mu gwadamela, dzi nga ri thusa uri ri dzule ri tsini nae na u ri thusa u ita phetho dzavhuḓi. Fhedzi khonani dzi sa funi Yehova dzi nga ita uri na riṋe ri si tsha mu funa. Ndi ngazwo Bivhili i tshi ri ṱuṱuwedza uri ri khethe khonani dzashu zwavhuḓi! Musi khonani dzashu dzi tshi funa Mudzimu, zwi a ri vhuyedza, zwa dovha zwa vhuyedza na khonani dzashu. Zwi ita uri ri kone u ‘bvela phanḓa ri tshi ṱuṱuwedzana’ na u “fhaṱana.”—1 Vhathesalonika 5:11.
2. Khonani dzine na dzi khetha dzi ḓo ita uri Yehova a ḓipfe hani?
Yehova u khetha khonani dzawe zwavhuḓi. “U vha khonani ya tsini-tsini na o lugaho.” (Mirero 3:32) Yehova a nga ḓipfa hani arali ra khetha khonani dzi sa mu funi? Zwi nga mu vhaisa nga maanḓa! (Vhalani Yakobo 4:4.) Fhedzi arali ra ṱutshela kule na khonani dzi si dzavhuḓi, ra sendela tsini-tsini na vhane vha mu funa, u ḓo takala nahone ri ḓo vha khonani dzawe.—Phisalema 15:1-4.
GUDANI ZWO ENGEDZEAHO
Vhonani uri ndi ngani zwi zwa ndeme u khetha khonani zwavhuḓi na uri ni nga vha hani na khonani dzine dza nga ni thusa.
3. Thanyelani khonani dzi si dzavhuḓi
Vhathu vha sa funi Mudzimu na milayo yawe, ndi khonani dzi si dzavhuḓi. Ṱalelani VIDIO, ni kone u fhindula mbudziso i tevhelaho.
-
Ri nga konana hani na vhathu vha si vhavhuḓi ri sa vhuyi ra zwi ṱhogomela?
Vhalani 1 Vhakorinta 15:33, ni kone u fhindula mbudziso dzi tevhelaho:
-
Ndi muthu wa hani ane a nga vha khonani i si yavhuḓi? Ndi ngani ni tshi ralo?
Vhalani Phisalema 119:63, ni kone u fhindula mbudziso i tevhelaho:
-
Ndi mini zwine zwa ḓo ni sumbedza uri muthu a nga vha khonani yavhuḓi?
Apula ḽithihi ḽo sinaho ḽi sinisa oṱhe. Khonani nthihi i si yavhuḓi i nga ni ṱuṱuwedza hani nga nḓila i si yavhuḓi?
4. Hu na vhathu vhane vha nga vha khonani dzashu dzavhuḓi naho vho fhambana na riṋe
Bivhili i amba nga ha vhanna vhavhili vha Isiraele vha tshifhingani tsha kale vhane vha vha Davida na Yonathani. Yonathani o vha e ṅwana wa Khosi nahone e muhulwane nga maanḓa kha Davida, fhedzi vho vha vhe madele mapfani. Vhalani 1 Samuele 18:1, ni kone u fhindula mbudziso i tevhelaho:
-
Ndi ngani khonani dzashu dzi songo tea u vha thangana dzashu fhedzi kana vhathu vha re kha vhuimo vhu fanaho na hashu?
Vhalani Vharoma 1:11, 12, ni kone u fhindula mbudziso i tevhelaho:
-
Khonani dzine dza funa Yehova dzi nga ṱuṱuwedzana hani?
Kha vidio i tevhelaho, vhonani uri muṅwe muswa o vha hani khonani na muthu we a vha a songo lavhelela uri a nga vha khonani nae. Ṱalelani VIDIO, ni kone u fhindula mbudziso dzi tevhelaho.
-
Kha vidio, ndi ngani vhabebi vha Akil vho vha vha tshi khou vhilaela nga ha khonani dzawe dza tshikoloni?
-
Ndi ngani u thomani o vha a tshi ṱoḓa u konana na vhenevho vhathu?
-
Ndi mini zwo mu thusaho uri a dovhe a vhe na khonani?
5. Ni nga vha hani na khonani dzavhuḓi?
Gudani uri ni nga wana hani khonani dzavhuḓi na uri inwi ni nga vha hani khonani yavhuḓi. Ṱalelani VIDIO.
Vhalani Mirero 18:24 na 27:17, ni kone u fhindula mbudziso dzi tevhelaho:
-
Khonani dza vhukuma dzi thusana hani?
-
Naa ni na khonani dzavhuḓi nga u ralo? Arali ni si nadzo, ni nga vha hani nadzo?
Vhalani Vhafilipi 2:4, ni kone u fhindula mbudziso i tevhelaho:
-
Arali ni tshi ṱoḓa khonani dzavhuḓi, ni tea u vha khonani yavhuḓi. Zwenezwo ni nga zwi itisa hani?
U ri ni wane khonani dzavhuḓi, ni tea u vha khonani yavhuḓi
VHAṄWE VHATHU VHA AMBA URI: “Ni nga vha khonani na muṅwe na muṅwe, a zwi fani na u sa vha na khonani.”
-
Inwi ni nga ri mini?
NO GUDA MINI?
Musi ri tshi khetha khonani dzashu zwavhuḓi, zwi takadza Yehova, zwa thusa na riṋe vhaṋe.
Ni Kha Ḓi Zwi Humbula?
-
Ndi ngani zwi zwa ndeme kha Yehova uri ri khetha khonani dza hani?
-
Ri tea u iledza u konana na vhathu vha hani?
-
Ri nga vha hani na vhukonani havhuḓi na vhathu vho teaho?
WANANI ZWO ENGEDZEAHO
Gudani nga ha nḓila ine khonani dzavhuḓi dza nga ni thusa ngayo musi zwi tshi khou konḓa.
“Khwaṱhisani Vhukonani Vhufhelo Vhu Sa Athu Swika” (Tshiingamo, November 2019)
Humbulani nga ha zwine na nga zwi ita uri ni wane khonani dzavhuḓi.
“Ndi Nga Vha Hani Na Khonani Dzavhuḓi?” (Mbudziso Dzine Vhaswa Vha Dzi Vhudzisa—Phindulo Dzi Shumaho, Volumu 1, ndima ya 8)
Ndi mini zwine na fanela u zwi ḓivha nga ha vhukonani vhune na vhu ita nga zwishumiswa zwa thekinolodzhi kha inthanethe?
Ni Thanyele Zwa U Davhidzana nga Inthanethe (Social-Network) (4:12)
Kha nganeavhutshilo ine ya ri “Ndo Vha Ndi Tshi Ṱulutshelwa U Vha Na Khotsi,” vhonani uri ndi ngani muṅwe munna o khetha khonani dzo fhambanaho na dze a vha e nadzo.
“Bivhili I Shandula Vhutshilo” (Tshiingamo, 1 April 2012)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
