KAPITE 48
Filifili Leleiʼi ʼOu Kaumeʼa
ʼE tou fiafia ʼi te fakatahi mo ʼotatou kaumeʼa. Pea ʼe tou iloʼi ʼe feala hatatou falala kia natou moka tou tau mo he ʼu fihifihia. ʼE talanoa ʼi te Tohi-Tapu ki te aga fakakaumeʼa. ʼE fakalotomalohiʼi ai tatou ke tou filifili leleiʼi ʼotatou kaumeʼa. Pea ʼe tokoni mai ke ʼaua naʼa tou to ki ʼihi tuʼutamaki.
1. He koʼe ʼe maʼuhiga ke ke filifili leleiʼi ʼou kaumeʼa?
Ka lahi te temi ʼae ʼe ke fakatahi ai mo he tahi, ʼe feala ke ke hage ko ia, ʼo ke liliu ko he tahi ʼe agalelei peʼe agakovi. Pea ʼe toe moʼoni te faʼahi ʼaia moka ke felogoi mo te kilisitiano ʼaia ʼi te neti. Ohage ko tona ui ʼi te Tohi-Tapu “ko ia ʼae ʼe haʼele mo te kau popoto ʼe liliu anai ʼo poto, kae ʼe faigataʼaʼia anai ia ia ʼae ʼe fakatahi mo te kau agavale [ia natou ʼae ʼe mole ʼoʼofa ia Sehova].” (Taʼaga Lea 13:20) ʼE feala ke tokoni mai ʼotatou kaumeʼa ʼae ʼe ʼoʼofa ia Sehova ke tou nonofo ovi kia te ia pea mo toʼo ni tonu ʼe lelei. Kae ko natou ʼae ʼe mole tauhi kia Sehova ʼe feala ke natou fakamamaʼo tatou mai ia te ia. Koia ʼae ʼe maʼuhiga ai ke tou filifili leleiʼi ʼotatou kaumeʼa. ʼE feala anai ke natou uga tatou ke tou fai ni meʼa ʼe lelei pea ke tou toe tokoni kia natou ke natou haga ʼoʼofa ia Sehova. ʼEi, ʼe tou ‘haga fefakalotomalohiʼaki anai pea mo fetokoniʼaki.’—1 Tesalonika 5:11.
2. He koʼe ʼe maʼuhiga kia Sehova?
ʼE mole hoko filifili pe e Sehova ia ia ʼae ʼe fia kaumeʼa mo ia. “ʼE kaumeʼa lelei ia mo te hahaʼi faitotonu.” (Taʼaga Lea 3:32) Kotea anai ʼe logoʼi e Sehova moka tou filifili he ʼu kaumeʼa ʼe mole tauhi kia te ia? ʼE mahino ia, ʼe lotomamahi anai. (Lau ia Sakopo 4:4.) Kae ʼe fiafia anai ke tou kaumeʼa mo ia mo kapau foki ʼe tou liʼaki te ʼu fakakaugā kovi pea mo fakaovi kia te ia mo natou ʼae ʼe ʼoʼofa ia te ia.—Pesalemo 15:1-4.
TA FAKALOLOTO
Ta vakaʼi he tahi ʼu manatu pe koʼe ʼe maʼuhiga ke tou filifili leleiʼi ʼotatou kaumeʼa pea mo feafeaʼi hatatou maʼu he ʼu felogoi lelei.
3. Tou liʼaki te ʼu fakakaugā kovi
ʼE mole tonu ke tou fakatahi mo natou ʼae ʼe mole ʼoʼofa ʼi te ʼAtua mo ʼana pelesepeto. Vakaʼi te ʼATA VITEO, pea fai te fehuʼi ʼae ʼe hoa mai.
-
ʼE feafeaʼi hatatou kamata maʼu he ʼu fakakaugā kovi kae mole tou iloʼi?
Lau ia 1 Kolonito 15:33, pea fai te ʼu fehuʼi ʼaeni:
-
Ko te faʼahiga hahaʼi feafeaʼi ʼae ʼe mole tonu ke ke fakatahi mo ia? Kotea tona tupuʼaga?
Lau ia Pesalemo 119:63, pea fai te fehuʼi ʼaeni:
-
Ko te faʼahiga hahaʼi feafeaʼi ʼe tonu ke ke filifili ke liliu ko hou ʼu kaumeʼa?
ʼE feala ke tou tau mo ni fihifihia moka ʼe mole lelei tatatou filifili ʼotatou kaumeʼa
4. ʼE feala ke tou kaumeʼa mo te hahaʼi fuli pe
ʼE talanoa ʼi te Tohi-Tapu kia Tavite mo Sonatane. Neʼe tauhi manu te tahi pea ko te tahi neʼe ko te foha ʼo te hau. Pea neʼe mole nā taʼu tahi. Kae logo foki la te ʼu aluʼaga ʼaia, neʼe nā kaumeʼa lelei pe. Lau ia 1 Samuele 18:1, pea fai te ʼu fehuʼi ʼaeni:
-
Ka tou fia kaumeʼa mo he tahi, ko tona fakaʼuhiga koa ʼe tonu ke tou taʼu tahi mo ia peʼe ke tatau ʼotatou aluʼaga? Kotea tona tupuʼaga?
Lau ia Loma 1:11, 12, pea fai te fehuʼi ʼaeni:
-
ʼE feala ke fefakalotomalohiʼaki feafeaʼi he ʼu kaumeʼa ʼe ʼoʼofa ia Sehova?
ʼI te ʼata viteo ʼaeni, ʼe ke tokagaʼi ai pe neʼe kaumeʼa lelei feafeaʼi he tehina tupulaga mo he tahi ʼe taʼu lahi age ia ia. Vakaʼi te ʼATA VITEO, pea fai te ʼu fehuʼi ʼae ʼe hoa mai.
-
He koʼe neʼe hoha te ʼu matuʼā ʼa Akil?
-
He koʼe neʼe fakakaugā mo ʼihi tupulaga ʼo tana fale ako?
-
Kotea ʼae neʼe tokoni ki ai ke mole ina toe logoʼi tana nofo tokotahi?
5. ʼE feafeaʼi hatatou maʼu he ʼu kaumeʼa ʼe lelei
Tou vakaʼi pe ʼe tou maʼu feafeaʼi he ʼu kaumeʼa lelei pea ʼe feafeaʼi hakita liliu ko he kaumeʼa lelei. Vakaʼi te ʼATA VITEO.
Lau ia Taʼaga Lea 18:24 mo te 27:17, pea fai te ʼu fehuʼi ʼaeni:
-
ʼE feafeaʼi he fetokoniʼaki ʼa he ʼu kaumeʼa lelei?
-
Neʼe kua ke maʼu hou ʼu kaumeʼa feia? Kapau heʼeki ke maʼu, kotea ʼe feala ke ke fai?
Lau ia Filipe 2:4, pea fai te fehuʼi ʼaeni:
-
Kapau ʼe ke fia maʼu hou ʼu kaumeʼa lelei, pea ʼe tonu foki ke ke liliu ko he kaumeʼa lelei. ʼE feafeaʼi hau fakaha te faʼahi ʼaia?
Kapau ʼe tou fia maʼu he ʼu kaumeʼa lelei, pea ʼe tonu ke kita liliu ko he kaumeʼa lelei
ʼE UI E ʼIHI: “Tatau aipe pe mole ta tauhi tahi kae ʼe feala pe ke ta kaumeʼa.”
-
Kotea tau ia manatu?
MANATU TAFITO
Kapau ʼe tou filifili leleiʼi ʼotatou kaumeʼa, ʼe tou fakafiafiaʼi anai ia Sehova pea ʼe tou toe fiafia ai anai.
Fehuʼi Fakamanatu
-
He koʼe ʼe maʼuhiga kia Sehova ia te filifili ʼo ʼotatou kaumeʼa?
-
Ko te faʼahiga hahaʼi feafeaʼi ʼae ʼe mole tonu ke tou kaumeʼa mo ia?
-
ʼE feafeaʼi hatatou maʼu he ʼu kaumeʼa lelei?
TE TAHI ʼU MANATU
ʼE tokoni feafeaʼi mai he ʼu kaumeʼa lelei ʼi te ʼu temi faigataʼa?
“Ke Tou Maʼu He ʼu Kaumeʼa Moʼoni ʼi Muʼa ʼo Te Fakaʼosi” (Ko Te Tule Leʼo ʼo Novepeli 2019)
Fakakaukauʼi te meʼa ʼe feala ke ke fai ke ke maʼu ai hou ʼu kaumeʼa lelei.
“Comment choisir mes amis ?” (Les jeunes s’interrogent. Réponses pratiques [volume 1], chapitre 8)
Te meʼa ʼe tonu ke ke iloʼi ʼo ʼuhiga mo takita fakakaumeʼa mo ʼihi ʼi te neti.
Vakaʼi te biographie “J’avais tant besoin d’un père !” ʼae ʼe talanoa ai ki he tagata neʼe kakaʼi e ʼona kaumeʼa.
“La Bible transforme des vies” (Ko Te Tule Leʼo [Fakafalani] ʼaho 1 ʼo Apelili 2012)