Le amigoʼoboʼ ku beetkoʼob u kiʼimaktal k-óol, tsʼoʼoleʼ wa triste yaniloʼoneʼ ku yáantkoʼonoʼob. Chéen baʼaleʼ le Bibliaoʼ ku yaʼalikeʼ maʼ tuláakal k-amigoʼob jeʼel u yáantkoʼonoʼobeʼ. ¿Bix túun jeʼel u páajtal u yantaltech maʼalob amigoʼobeʼ? Ilawil u núukil le preguntaʼobaʼ.

1. ¿Baʼax ku yúuchul wa ka sen biskaba yéetel wa máax?

U suukileʼ le kéen a sen bisaba yéetel wa máaxeʼ ku joʼopʼol a beetik le baʼax ku beetik letiʼoʼ. Yaan horaeʼ maʼalob baʼax ku beetik, pero yaan hora xaneʼ maʼ. Lelaʼ jeʼel u yúuchul kex wa chéen tiʼ redes sociales ka biskaba tu yéeteleʼ. Le oʼolal le Bibliaoʼ ku yaʼalik: «Le máax ku máan yéetel máaxoʼob yaan u naʼatoʼobeʼ yaan u yantal u naʼat, pero le máax ku biskuba yéetel le j-maʼ naʼatoʼoboʼ [wa le máax maʼ u yaabiltmaj Jéeobaoʼ] yaan u bin kʼaasil tiʼ» (Proverbios 13:20). Wa a amigoʼob u yaabiltmoʼob Jéeobaeʼ jeʼel u yáantkechoʼob utiaʼal maʼ a náachtal tiʼ letiʼeʼ yéetel utiaʼal a beetik baʼaloʼob maʼalobtakeʼ. Pero wa ka biskaba yéetel máaxoʼob maʼ u yaabiltmoʼob Jéeobaeʼ jeʼel u beetkoʼob a náachtal tiʼ letiʼeʼ. Le oʼolal le Bibliaoʼ ku yaʼaliktoʼon ka k-yéey tubeel máax yéetel ken k-bisba. Wa k-amigoʼob u yaabiltmoʼob Jéeobaeʼ maʼ chéen tiʼ toʼon kun bin utsiliʼ, baʼaxeʼ tak tiʼ letiʼob. Tsʼoʼoleʼ wa k-beetik beyoʼ yaan u páajtal k-beetik le baʼax ku yaʼalik le Bibliaoʼ: «Seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex» (1 Tesalonicenses 5:11).

2. ¿Kiʼimak wa u yóol Jéeoba yéetel le amigoʼob yaantechoʼ?

Jéeobaeʼ ku yéeyik tubeel máax yéetel ku biskuba. Le Bibliaoʼ ku yaʼalikeʼ letiʼeʼ «jach ku biskuba maʼalob yéetel le máaxoʼob toj u kuxtaloʼoboʼ» (Proverbios 3:32). ¿Máasaʼ Jéeobaeʼ jach jeʼel u yaatal u yóol wa ka u yil táan k-bisikba yéetel máaxoʼob maʼ u kʼáat u beetoʼob baʼax ku yaʼalikiʼ? (Xok Santiago 4:4). Chéen baʼaleʼ wa k-ilik k-náachtal tiʼ le máaxoʼob maʼ u yaabiltmoʼob Jéeoba yéetel k-bisikba yéetel u amigoʼobeʼ yaan k-beetik u kiʼimaktal u yóol (Salmo 15:1-4).

 UTIAʼAL A MAAS NAʼATIK

4. Jeʼel u páajtal k-bisikba yéetel máaxoʼob maʼ igualoʼob t-éeteliʼ

Le Bibliaoʼ ku tʼaan tiʼ David yéetel Jonatán, kaʼatúul máakoʼob kajaʼanoʼob kaʼach Israel. Letiʼobeʼ maʼ igual u edadoʼobiʼ yéetel maʼ igual bix kuxlikoʼobiʼ, kex beyoʼ maʼalob u biskubaʼob kaʼachi. Xokeʼex 1 Samuel 18:1, kéen tsʼoʼokkeʼ ka tsikbaltikeʼex lelaʼ:

• ¿Jeʼel wa u páajtal k-bisikba yéetel máaxoʼob maʼ k-éet jaʼabiloʼob yéetel yaanal bix kuxlikoʼobeʼ?

Xokeʼex Romanos 1:11, 12, kéen tsʼoʼokkeʼ ka tsikbaltikeʼex lelaʼ:

• ¿Bix u paklan líiʼsik u yóoloʼob le amigotsiloʼob ku meyajtikoʼob Jéeobaoʼ?

Juntúul xiʼipaleʼ tu kaxtaj u amigoʼob teʼ tuʼux tu tuklaj minaʼanoʼ. ¿Bix túun úuchik u kaxtik? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

• ¿Baʼaxten u papáʼob Andréseʼ maʼ u kʼáatoʼob kaʼach ka u jach bisuba yéetel u yéet xookoʼobiʼ?

• ¿Baʼaxten Andréseʼ tu káajbaleʼ uts tu tʼaan u biskuba yéetel u yéet xookoʼob?

• ¿Baʼax tu beetaj utiaʼal u xuʼulul u yuʼubikuba chéen tu juunal?

 5. Bix jeʼel u yantaltech maʼalob amigoʼobeʼ

 BAʼAX TSOʼOLI

Wa k-yéeyik tubeel k-amigoʼobeʼ ku bintoʼon maʼalobil yéetel k-kiʼimakkúuntik u yóol Jéeoba.

Baʼax ta kanaj

• ¿Baʼaxten Jéeobaeʼ u kʼáat ka k-yéey tubeel k-amigoʼob?

• ¿Máax yéetel maʼ unaj k-bisikbaiʼ?

• ¿Baʼax jeʼel u páajtal a beetik utiaʼal a biskaba yéetel máaxoʼob jach tu jaajil jeʼel u yáantkechoʼobeʼ?