I bôt ba ntip biiba, ba nsômbôl le maséé ba nôgda i kel libii jap, ma nom niñ yap yosôna. Hala a nla bôña. Inyule di gwé ndémbél i bikristen bi bi bi biiba hala a yé ngandak nwii, bi boñok ki biliya i bii matiñ ma Bibel i bisélél.

1. Mambe maéba Bibel i nti balôm?

Yéhôva a nkal munlôm le, nyen a nlama éga lihaa jé. (Añ Éfésô 5:23) Yéhôva a mbem le, balôm ba yoñ makidik malam inyu loñge i mahaa map. Bibel i nkal le: “A balôm, kena ni bisu i gwés baa banan.” (Éfésô 5:25) Kii hala a nkobla? Munlôm nu a ngwés nwaa, a nlama éba nye le a ngwés nye, to ba yé bo iba, to ba yé ni bôt bape. A nlama tat nye, a boñ ki biliya i yônôs njômbi yé, i pes minsôn ni i pes mahoñol. (1 Timotéô 5:8) Ndi, jam li nlôôha ba nseñ li yé le, a nlama yônôs njômbi yé i pes mbuu. (Matéô 4:4) Kiki ’héga, ba nlama añ Bibel, ba soohege ntôñ. Munlôm nu a ngwés nwaa wé, a ntééda maada mé malam ni Yéhôva.—Añ 1 Pétrô 3:7.

2. Mambe maéba Bibel i nti baa?

Bibel i nkal muda le “a nlama ti nlô wé njôôñ lipém.” (Éfésô 5:33) Kii hala a nkobla? A nlama hoñol bilem bilam bi nlôm, a bigda ki biliya nlôm a mboñ inyu yoñ ndun ni nye ni bon. A nti nlôm lipém, a nidik ki makidik mé, a pôdlak nye loñge i bisu bi bôt bape to ibale nlôm a ta bé ngwélél Yéhôva.

3. Lelaa nwaa bo nlôm ba nla lédés libii jap?

Bibel i nkal babiina le: “B’a ba nsôn wada.” (Matéô 19:5) Hala a nkobla le, ba nlama boñ biliya gwobisôna le yom yo ki yo i bagal bañ bo. Ba mboñ hala i ngéda ba ntégbaha ngéda ntôñ, hiki wada a kalak nuu numpe i yom a nôgda. Ba nwas bé le mut numpe tole yom yo ki yo, ha mas Yéhôva, i ba nseñ i niñ yap iloo sobiina wap. Ba nyoñ yihe le ba bana bañ maada ma bas bas ni mut numpe nu a ta bé sobiina wap.

 KÔNDE TÉM

4. A munlôm, gwés nwaa woñ u yoñ ki ndun ni nye

5. A bôda, ni gwés balôm banan ni ti ki bo lipém

Bibel i nti muda makénd le a ti nlô wé lipém, too a nsélél Yéhôva too a nsélél bé nye. Añ 1 Pétrô 3:1, 2, i mbus ni kwélél mambadga mana:

• Ibale nlô woñ a ngwélél bé Yéhôva, u mbot ñem le, kel yada a ga gwélél nye. Ndi lelaa u nla hôla nye nano? Baa u nlama tééne nye likalô hiki ngéda? tole bilem gwoñ bilam ni lipém u nti nye gwon bi nla hôla nye?

Nwaa bo nlôm ba nlama nôgla inyu yoñ makidik. Ndi, ngim mangéda i nla pam le muda a ba bé  maséé ni makidik nlôm a nyoñ. Ha ngéda i, a nlama kal nlôm mahoñol mé, ikété nwee nyensôna ni njôôñ lipém, a nlama ki bigda le Yéhôva nyen a bi nti nlôm kunde i yoñ makidik inyu lihaa jolisôna. A nlama boñ kii yosôna a nla inyu nit makidik mé. I ngéda a nit makidik ma nlôm, lihaa jolisôna li mba maséé. Añ 1 Pétrô 3:3-5, i mbus ni kwélél mbadga ini:

• Kii Yéhôva a nôgda i ngéda muda a nti nlôm lipém?

6. Ni nla yémbél mandutu ma libii linan

 I SEM KWEP

Babiina ba nla ba maséé ikété libii jap, ibale ba ngwéhna, ba tinak wada ni nuu lipém, ba biyak ki matiñ ma Bibel i bisélél.

Mambadga ma mbigda

• Lelaa munlôm a nla lémés libii jé?

• Lelaa muda a nla lémés libii jé?

• Ibale u yé mbiibaga, mambe matiñ ma Bibel ma nla hôla we i lémés libii joñ?