Ben bo yôg nena ndà là num nywinde mbe tsiañde bo naʼ ngù léʼ yub nandà là, aʼ tswe à matmat. Yennà kuʼni nebe. Ben bo yà na ndà fe nguʼnjù yàme, mbèn nkagtùn neze ba tun ntshùʼ Ñwaʼni Nsi là lèn mbe yennà kuʼni nebe.

1. Tsit ntag Ñwaʼni Nsi num mfà ba ndu à?

Yaweh Nsi te ndu mba ngatshagde tunndà là. (Siañ Efésô 5:23.) A num mbébte mbʼa loʼ ba mfiʼ tsʼa ywimde ze tunndà là. Ñwaʼni Nsi num ntag ba ndu mbe: “Bin ke nkô zwi tsine.” (Efésô 5:25) Yennà nke mbagdʼà mbe ke? Taʼ ndu zʼa dun nkôni là num ndoʼ nzwi i bo bwôntù ngelañ bo be tùʼ bo là mba tèt yàme. A be ntshèttʼé num nukebwô mbèn nkagtùn mbʼa kuʼni là num nelaʼde nkôni yi mbèn ntomdʼé num bag mbàb wut. (1 Timôtio 5:8) Ju ndùb bʼa mbe, a num mbèn ndoʼ mfiʼ netomdʼé num bag ywèle. (Matio 4:4) Mba mfiʼ là, a kuʼni neghù leʼde mbèn nsiañ Ñwaʼni Nsi bo nzwi i. Taʼ ndu a be ntomde nzwi i mbèn ndoʼ i bo nkôni là, num ngù taʼ mbwô kushun bo Yaweh Nsi.—Siañ 1 Pétro 3:7.

2. Tsit ntag Ñwaʼni Nsi be mfà bènnzwi bo na ndà à?

Ñwaʼni Nsi tshwèt ntshob mbe ‘mènnzwi ghù nelaʼde taʼ nkuʼni ndùb ndu i.ʼ (Efésô 5:33) A kuʼni neghù yennʼà ndùke? A kuʼni nesiañde nu mfà num ba mbwô mat ndu i, mba num nkagtùn a num ngù num netomdʼé bo bônkeʼ là. Num nelaʼde nkuʼni yi, bʼa bèn nke ntomde ba mfiʼ tsʼa num ndoʼ là, ntshob nu yi bo bwôntù, mbèn ntshob mbwô tshu mfà num i tsemoʼo a be be ndù a keʼ be ghamde Yaweh Nsi.

3. Taʼ mandum bo nzwi i kuʼni neso neta num yub nandà à ndùke?

Ñwaʼni Nsi tshwèt ntshob mfà num ben bo na ndà là mbe: “Ntu tshob bàa nsi tùʼ taʼ mbàb wut ntshùʼ.” (Matio 19:5) A nke ndaʼdʼà mbe bo ghù nekù njoñ tshu fa tsʼa kuʼni nete fagde netèt bo, ngù mbe yub nkôni fi là. Num neghù yennà, a bètte bo tôg ngelañ ntu tshob bàa, mba we lo nke ntshob ju zʼa be ntùm ntù i là bo nkôni. Bo keʼ be fañ mbe sàm ju ke sàm mènntùn no—kʼa ke ndaʼ Yaweh Nsi—tanjoñ miag bo ntshùa nzwi yub ke ndu yub lo. Ben bo na ndà là num ntshét miag nebe ke laʼde nkôni a fe mbètte bo laʼdʼà nzwi yub ke ndu yub lo là mèn ghua.

 TSWEʼ NTUN MI

4. Ba ndu—bin nke ndaʼde nkôni mbèn nke ntomde zwi tsine

5. Bènnzwi—bin kô mbèn nke mfà nkuʼni ndu tsine

Ñwaʼni Nsi num nso kù num taʼ mènnzwi a na ndà là mbʼa nke nkuʼni ndu i kʼa nke ngamde Yaweh Nsi kʼa ke nke ngamdʼé lo. Siañ 1 Pétro 3:1, 2, mbèn mbùnde tshen mbètte li:

• A be zʼo ghù taʼ ndu zʼa ke tshwèt ngamde Yaweh Nsi là, mba magde ke bwe mbʼo tshwèt nkô mbʼa ghamdʼé. Num yu tu, mbʼo ywimdʼé neghamde Yaweh Nsi a ndùke?—neke nsoñ i nkùn mebwô njoñ ngelañ fa ké, ke neghù taʼ mbwô kuzin mbèn nke mfà nkuʼni yi à? Numke?

Taʼ mandum bo nzwi i kuʼni netamde ndoʼ ba mbwô mfiʼ. Ndaʼndù bʼa be moʼ ngelañ, mènnzwi ke be ntshu ntshùʼ bo ndu i num mfiʼ a loʼ là. A be ndùlala, mbʼa kuʼni netshob ju a tshwèt nkwade là bo mat nebétni mba nkuʼni. Ndaʼndù, a ghù nelèn mbe Yaweh Nsi fà faʼ à ndu i neloʼ ba mfiʼ tsʼa ywimde tunndà là. A bètte a kagtùn mbʼa kuʼni là num netomde mfiʼ ndu i loʼ là. A ghù ndùlala, mbʼaʼ ywimde mbe njoñ tunndà fa tswe ntùm tsiañde. Siañ 1 Pétro 3:3-5, mbèn mbùnde yen bètte li:

• Yaweh Nsi nke njuʼ wul i à ndùke ngelañ taʼ mènnzwi zʼa na ndà là num ndaʼde nkuʼni ndu i à?

 6. O kuʼni nemaʼ ba ngùtni ntùm yu nandà ntshùa

 JU NETSHÙBE

Taʼ mandum bo nzwi i tse bo num ndaʼde nkôni bo nkuʼni netèt bo mbèn nke njab ba tun ntshùʼ Ñwaʼni Nsi ntùm faʼ là, kuʼni netswe ntùm tsiañde.

Mbètte nekwimde

• Taʼ ndu kuʼni neghù mbe tsiañde be ntùm nandà à ndùke?

• Taʼ mènnzwi kuʼni neghù mbe tsiañde be ntùm nandà à ndùke?

• A be zʼo na ndà là, tsit tun ntshùʼ Ñwaʼni Nsi bèn nkuʼni neywimdʼo neso neta num yu nandà à?