Ekkewe pwúpwúlúfé ra áneánei pwe ewe pwapwa ra meefi atun ar we ránin apwúpwúlú, epwe nóm tori feilfeiló. A tongeni fis ena. Ekkewe Chón Kraist mi fen pwúpwúlú ren fite fite ier me achocho le apwénúetá án Paipel kewe kapasen emmwen, ra silei pwe a tufich ena.

1. Ifa án Paipel kapasen emmwen ngeni mwán mi pwúpwúlú?

Jiowa a ewisa ngeni ewe mwán an epwe mékúren ewe famili. (Álleani Efisos 5:23.) Jiowa a mochen pwe án ewe mwán kefil epwe atoto feiéch ngeni chón an we famili. Iei án Paipel éúréúr ngeni ekkewe mwán: “Oupwe tongei puluemi.” (Efisos 5:25, Testament mi Fö) Met weween ena? Emén mwán mi sile tong, a kirekiréch ngeni pwúlúwan we lón imw, me pwal lein aramas. A túmúnú seni feiengaw me a achocho úkúkún an tufich le túmúnú lón pekin aion me memmeef. (1 Timoty 5:8) Nge lap seni meinisin, a álisi an epwe ririéch ngeni Jiowa. (Mateus 4:4) Áwewe chék, ra tongeni álleafengen ewe Paipel me iótekfengen. Atun emén mwán a kirekiréch le túmúnú pwúlúwan we, an riri ngeni Jiowa epwe péppéchékúleló.​—Álleani 1 Petrus 3:7.

2. Ifa án Paipel kapasen emmwen ngeni fefin mi pwúpwúlú?

Án Kot we Kapas a apasa pwe emén fefin mi pwúpwúlú epwe ‘meniniti pwülüan.’ (Efisos 5:33) Ifa usun a tongeni féri ena? Ren an nefótófót wóón ekkewe napanap mi múrinné pwúlúwan we a napanapeni me úkúkún an achocho le túmúnúúr me néúr kewe. A pwal tongeni pwári an súféliti ren an álisatá ekkewe kefil a eáni, fós ngeni fán kirekiréch, me fóséch usun ngeni ekkewe ekkóch, inaamwo ika esap i emén chón fel ngeni Jiowa.

3. Ifa usun pwúpwúlú ra tongeni apéchékkúla ar riri?

Iei met Paipel a erá usun eú pean pwúpwúlú: “Ekewe ruoman repwe wiliti eu chök inis.” (Mateus 19:5) Weween resap fókkun mut ngeni och mettóch an epwe atowauafeseniir. Ra féri ena ren ar nónnómfengen iteitan me pwárfengeni meefier me ar tong. Resap mut ngeni och mettóch are pwal emén me lúkún Jiowa, an epwe aúchea lap seni pwúlúwer we. Ra fókkun túmúnú ar resap kon chiechiéch ngeni pwal emén me lúkún pwúlúwer we.

 KÚTTAFICHI

4. Ámi kana mwán, tongei me túmúnúéchú pwúlúwemi

5. Ámi kana fefin, tongei me súféliti pwúlúwemi

Paipel a pesei ekkewe fefin ar repwe súféliti pwúlúwer kewe ese lifilifil ika iir chón angang ngeni Jiowa are rese. Álleani 1 Petrus 3:1, 2, me mwirin pwóróusfengen wóón ekkeei kapas eis:

• Ika pwúlúwom we ese angang ngeni Jiowa, ese mwáál ka mochen an epwe angang ngeni. Óm ekiek nge met epwe kon álilliséch ngeni, óm soun akkafalafal ngeni are óm féfféréch ngeni me súféliti? Pwata?

Ekkewe pwúpwúlú ra tongeni fférfengeni kefil mi múrinné. Iwe nge fán ekkóch, neman ewe fefin esap tipeeú ngeni pwúlúwan we. A tongeni  pwáraawu meefian ngeni fán mosonottam me súfél, nge mi lamot epwe mirititi pwe Jiowa a ewisa ngeni ewe mwán an epwe wisen filatá met mi éch fán iten ar we famili. A lamot epwe achocho úkúkún an tufich le álisatá met a filatá. Atun a féri ena, a álisatá pwapwaan unusen ar we famili. Álleani 1 Petrus 3:3-5, me mwirin pwóróusfengen wóón ei kapas eis:

• Met meefien Jiowa atun ewe fefin a súféliti pwúlúwan we?

6. Oua tongeni pworacho ngeni osukosuk lón ámi pwúpwúlú

 MENLAPAN

Eú pean pwúpwúlú ra tongeni pwapwa ika ra tongfengen, súfélfengen, me apwénúetá án Paipel kewe kapasen emmwen.

Enniwili

• Ifa usun ewe mwán a tongeni alapaaló pwapwa lón ar pwúpwúlú?

• Ifa usun ewe fefin a tongeni alapaaló pwapwa lón ar pwúpwúlú?

• Ika en mi pwúpwúlú, menni kapasen emmwen lón Paipel a tongeni apéchékkúla óm ririin pwúpwúlú?