Dulemar na niggusmalar yeer iddodamalad, binsadamalad weyob anmar nabo sadegu yeer iddodi gusan gadinye. Auggi, nabir nabo deyob yeer iddodi gusmalaled. Anmar sordagan diggasurgus na niggumamaid nue we ibmar wismalad, Biblia sogedba igar imaglegele nabir yeeer iddodi gulege.

1. ¿Bibliagi masserganga igi soglenai?

Jehova sogsad, massered negya seoedye (Efesios 5:23 absogo). Jehova abeged, massergan nued negya sedi gumalad. Aagala, Bibliagi masserganga weyob soglenaid: ‘Be ome na be sabguo’ (Efesios 5:25). Dule nue na ome sabele, sabsur na ome imaggosulid, ebo abin gusiidgindibe, emar abargindibe. Nueggwa na ome aggwedaoed, omegala na ibmar amidabaloed, agnesig wis na ome seddabaloed (1 Timoteo 5:8). Igar amidabaloed, omebo nueggwa Jehova igar durdaggega (Mateo 4:4). Omebo Babse gordabaloed, omebo Biblia absodabaloed. Dule weyob na ome aggwediile, Jehova egi banguosurmogad (1 Pedro 3:7 absogo).

2. ¿Bibliagi omeganga igi soglenai?

Bibliagi soglenaid: “Ome, e suigi binsaed niggaa nanadi” gued abeleye (Efesios 5:33). Omegan ibigwensur na e sui imagbisurmalale, e sui ibmar nuegan imagdiidgi binsadaoed, igi e sui e sabgudi, igi mimmigan sabgudibali. ¿Igi mag daglesbalile, ome ibigwensur na e sui imagsurdae? Ibmar aggalale e suigi agbinsurdaer, urwedgi e suiga sunmagsurdaer, e suigi issaggwa sunmagsurdabalir, anba e sui Bab igarba nasulir ibigwensur imagsurdabalir.

3. ¿Abirgin nigmalad ibu imagged abelemala, gaddig bur bule na binar gumalaga?

Bibliagi soglenaid, dulemar na niggusmalale, ‘san wargwennayob gunonidamarye’ (Mateo 19:5). Aagala, abirgin nigmalad bela beladse alamagged abelemalad, gaddig bur bule na binar gumalaga. Na ebo ibmar imagged abelemalad, na ega nueggwa soged abelemalad, igi binsadii, igi iddodii, na egi ibmar oduggued abelesurmalad. Dule baiddibe, ibmar baiddibe, e abirginba bur bule binar guosurmarbalid, unnila Jehovabi e abirginba bur bule binar gumaloed. Degsoggu, abirgin nigmalad, dule e abirginsulile, geg doggus ebo waligga gued.

 NUEGGWA WE IBMAR DURDAGMARGOLO

4. Massergan, gaddig na ome sabgumalo, nue aggwemarbalo

5. Omegan, gaddig na sui sabgumalo, mer ibigwensur imagmarbalo

Bibliag omeganga soglenaid, mer ibigwensur na massergan imagmaloye, be sui Jehovaga arbasulirbela mer ibigwensur imaggoye. 1 Pedro 3:1, 2 absomalo, we ibmargi sunmagmarbalo:

• Be sui Jehova sordasulile, Jehova sordaga gued be abemo an sogdo. Degiile, ¿ibu bur be imaggoe: bane bane ega be Jehova igargi sunmaggoe, bur be daedba be sui Jehova igar durdagbi gudagega be imaggodibe? ¿Ibigala deyob be soge?

Abirgin nigmalad ibmar imaggedgi binsaalir na ebo nueggwa sunmagdamalale, igar aburosulid.  Auggi anmar wisbalid, sun inbaggwa ome e suiyob binsaosulid. Degiile, ome, nuedgi na e suiga e binsaed soged abelemogoed. Auggi, omegan we ibmar ieged abelesurbalid, Jehova sogsa, massergan negyaggi igar amigoedye. Degsoggu, omegan alamagged abelemogad, ibmar aggalale na e sui bendaggega. Degiile negyaggi nabir yeer iddodi gumaloed. 1 Pedro 3:3, 5 se absomalo, we ibmargi sunmagmarbalo:

• ¿Jehova igi iddodae, omegan ibigwensur na e sui imagsurmalar?

6. Negyaggi wis igar aburusale, nabir anba igar nugued

 WE IGARGI SUNMAGLESAD

Abirgin nigmalad gadi na binarmalale, na ibigwensur imagsurdamarbalile, Biblia sogedba igar imagdamarbalile, na ebo yeer iddodi gumaloed.

Ibu be durdasa

• ¿Ibu massered imagged abelege, nabir na omebo yeer iddodi guega?

• ¿Ibu ome imagged abelege, nabir na e suibo yeer iddodi guega?

• Be, abirgin niggale, ¿Bibliagi igi ibmar soglenaid nabir be bendasale, bemar na gaddig bur bule binar gumalaga?