UKPEPN̄KPỌ 49
Nso Idinam Ndọ Mbufo Enem?
Obufa ebe ye n̄wan ẹsinen̄ede ẹnem esịt ke usen ndọ mmọ; esitie mmọ nte mmọ ẹkpesikop inemesịt ntre kpukpru usen. Edi mmọ ẹkeme ndika iso n̄kop utọ inemesịt oro. Mme Christian emi ẹdọde ndọ ẹbịghi, emi ẹnyụn̄ ẹkade iso ẹnam se Bible ọdọhọde ke ndọ mmọ, ẹkụt ke ebe ye n̄wan ẹkeme ndika iso n̄kop utọ inemesịt oro.
1. Nso ke Bible ọdọhọ mme ebe ẹnam?
Jehovah emek ebe nte ibuot ubon. (Kot Ephesus 5:23.) Jehovah oyom mme ebe ẹsibiere se idifọnde ye ubon mmọ. Bible ọdọhọ mme ebe ete: “Ẹka iso ẹma iban mbufo.” (Ephesus 5:25) Nso idiwụt ke ebe ama n̄wan esie? Ebe emi amade n̄wan esie esifọn ido ye n̄wan esie ke ufọk ye ke kpukpru itie. Enye isiyakke n̄kpọ anam n̄wan esie, esinyụn̄ etịme nte ekekeme ese aban̄a n̄wan esie onyụn̄ anam esịt enem enye. (1 Timothy 5:8) Ata akpan n̄kpọ en̄wen edi ke enye esin̄wam n̄wan esie aka iso ekpere Abasi. (Matthew 4:4) Ke uwụtn̄kpọ, enye ekeme ndisitie ntre mbọn̄ akam nnyụn̄ n̄kot Bible ye n̄wan esie. Ebe emi amade n̄wan esie onyụn̄ etịmde enye akama ke Jehovah ama.—Kot 1 Peter 3:7.
2. Nso ke Bible ọdọhọ ibanndọ ẹnam?
Ikọ Abasi ọdọhọ yak “n̄wan enen̄ede okpono ebe esie.” (Ephesus 5:33) Nso idiwụt ke n̄wan okpono ebe esie? Edieke n̄wan esitide nti edu ebe esie ye se ebe esie anamde man ese aban̄a enye ye nditọ mmọ, oro ekeme ndiwụt ke enye okpono ebe esie. N̄wan emi okponode ebe esie esida ye se ebe esie ebierede, esitịn̄ ikọ ukpono ukpono ye enye, onyụn̄ esitịn̄ nti n̄kpọ aban̄a enye, m̀mê ebe esie edi asan̄autom Jehovah m̀mê idịghe.
3. Nso ke ebe ye n̄wan ẹkpenam man ndọ mmọ enem akan akpa?
Bible ọdọhọ ke ebe ye n̄wan “ẹdi obụk kiet.” (Matthew 19:5) Ọwọrọ inaha mmọ ẹyak n̄kpọ ekededi anam mmọ ẹtọn̄ọ ẹdian̄ade. Oro iditịbeke edieke mmọ ẹsimade ndidu kiet, ẹmade idemmọ, ẹnyụn̄ ẹsisiode se isịnede mmọ ke esịt ẹtịn̄ ẹnọ kiet eken. Jehovah kpọt ekpedi akpan owo ọnọ mmọ akan ebe m̀mê n̄wan mmọ. Inaha mmọ ẹdedei ẹyak esịt mmọ ọtọn̄ọ ama owo en̄wen.
SỊN IDEM KPEP
Se nsio nsio item Bible emi ekemede ndinam ndọ mbufo enen̄ede enem.
4. Ebe—ma n̄wan fo nyụn̄ tịm enye kama
Bible ọdọhọ ke “mme ebe ẹkpema iban mmọ nte idem mmọ.” (Ephesus 5:28, 29) Nso ke ikọ oro ọwọrọ? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
-
Nso ye nso ikeme ndiwụt ke ebe ama n̄wan esie onyụn̄ etịm enye akama?
Kot Colossae 3:12, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke ebe ekeme ndinam se ẹbatde oro ke ndọ mmọ?
5. N̄wanndọ—ma ebe fo nyụn̄ kpono enye
Bible ọdọhọ n̄wan okpono ebe esie, m̀mê ebe esie edi asan̄autom Jehovah m̀mê idịghe. Kot 1 Peter 3:1, 2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ekpedi ebe fo idịghe asan̄autom Jehovah, imọdiọn̄ọ ke akpama enye edi. Ekere ke ewe ifọn ikan—ndisikwọrọ ikọ nnọ ebe fo ke ubọk ke ubọk m̀mê ndidu eti uwem nnyụn̄ n̄kpono enye? Nso inam ọdọhọ ntre?
N̄wan ye ebe ẹkeme ndisitie ntre mbiere n̄kpọ. Edi ndusụk ini ekeme ndidi n̄wan idimaha se ebe oyomde ẹnam. Ama etịbe ntre, enye ekeme nditịn̄ se isịnede enye ke esịt ukpono ukpono, onyụn̄ eti ke ebe esie ke Jehovah ọdọhọ ebiere se idifọnde ye ubon mmọ. Ọfọn enye osio esịt an̄wam yak ẹnam se ebe esie ebierede. Emi ayanam ubon mmọ enen̄ede enem. Kot 1 Peter 3:3-5, ekem ẹbọrọ mbụme emi ẹnyụn̄ ẹneme ẹban̄a enye:
-
Esitie Jehovah didie n̄wan ama owụt ke imokpono ebe esie?
6. Afo emekeme ndinam mfịna okûkpon ke ndọ mbufo
Idụhe ndọ emi mfịna mîsidụhe. Ntre ana ebe ye n̄wan ẹsidiana kiet ẹnam se mmọ ẹkekeme man mmọ ẹkọk mfịna ekededi ke ndọ mmọ. Se VIDIO emi, ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
-
Ke vidio oro, nso ye nso ikowụt ke ebe ye n̄wan oro ikekpereke idemmọ aba nte ẹkesikperede akpa?
-
Nso ke mmọ ẹkenam man ndọ mmọ enen̄ede enem?
Kot 1 Corinth 10:24 ye Colossae 3:13. Ama okot itie kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:
-
Didie ke se ẹtịn̄de ke itie Bible emi ekeme ndinam ndọ enem?
Bible ọdọhọ yak ikpono kiet eken. Owo ama okpono owo, enye idinamke n̄kpọ ye owo oro didie didie m̀mê nsọn̄ido nsọn̄ido. Kot Rome 12:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi akpana owo esibebet yak ebe m̀mê n̄wan esie ebem iso owụt enye ke imokpono enye? Nso inam ọdọhọ ntre?
NDUSỤK OWO ẸSIDỌHỌ ẸTE: “Ami ye ebe m̀mê n̄wan mi ikpereke aba nte ikesikperede.”
-
Akpanam didie an̄wam enye okụt ke Bible ekeme ndin̄wam mmọ?
SE IKPEPDE
Ndọ esinen̄ede enem ebe ye n̄wan ẹma ẹma idemmọ, ẹkpono kiet eken, ẹnyụn̄ ẹnam item Bible.
Se M̀mê Emeti
-
Nso ke ebe akpanam man ndọ mmọ enem?
-
Nso ke n̄wan akpanam man ndọ mmọ enem?
-
Ekpedi ọmọdọ n̄wan m̀mê ebe, ekere ke ewe item Bible ikeme ndinam ndọ mbufo enen̄ede enem?
KPEP N̄KPỌ EN̄WEN
Se nsio nsio n̄kpọ emi edinamde ufọk mbufo enem.
Se ikwọ emi owụtde se isitịbede, ebe ye n̄wan ẹma ẹnam se Bible ọdọhọde ke ndọ mmọ.
Se mme n̄kpọ mme n̄kpọ emi esịnede ke n̄wan ndisụk ibuot nnọ ebe.
“Iban, Ntak Emi Ẹkpesụkde Ibuot Ẹnọ Mme Ebe Mbufo?” (Enyọn̄-Ukpeme, May 15, 2010)
Nso ikan̄wam ebe ye n̄wan emi ẹkọk ikpọ mfịna mmọ, emi akanamde mmọ ẹdian̄ade ndọ?
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
