Jommbindirɓe ko neeɓaali no tanƴinii weltaare nde ɓe heɓi nden ɲannde ɓe jommbindiri luttay haa poomaa. E hiɓe waawi heɓude ɗun. Almasiiyaaɓe jommbindirɓe ko neeɓi e wakkiliiɓe huutorgol waajuuji Deftere Alla nden no anndi ɗun no waawi wonude.

1. Ko honɗun Deftere Alla nden waajii moodiɓɓe ɓen ?

Ko Yahuwah Alla waɗi moodibbo on wonugol hoore ɓeynguure makko nden (janngee Efeesi 5:23). Yahuwah Alla no habborii moodibbo on fewjugol ko nafata ɓeynguure nden. Deftere Alla nden no waajii moodiɓɓe ɓen « mo kala e mon yo yiɗu sonnaajo mun » (Efeesi 5:25). Ko honɗun ɗun firi ? Moodibbo yiɗuɗo ɓeyngu mun dankorto mo no moƴƴiri ka suudu e ka yaasi. O dannday mo e o wakkiloto waɗangol mo kala ko o hatonjini e ko weltinta mo ɓernde (1 Timotee 5:8). Ko ɓuri hittude kon kadi, o wallay ɓeyngu makko ɓurta badaade Alla (Matta 4:4). E piide misal, o toroto Alla e o janngiday e ɓeyngu makko Deftere Alla nden. Si moodibbo on dankike ɓeyngu mun e hoore giggol, o tiiɗinay weldigal makko ngal e Yahuwah Alla (janngee 1 Petruusu 3:7).

2. Ko honɗun Deftere Alla nden waajii sonnaaɓe ɓen ?

Deftere Alla nden wi’i yo sonnaajo on « teddin moodi mun » (Efeesi 5:​33). Ko honno o gerdirta ɗun ? Himo waawi miijaade fii sifaaji moodi makko moƴƴuɗi ɗin e no o wakkilorii dankagol mo kanko e ɓiɓɓe ɓen. Himo waawi kadi teddinde ko o fewjata kon e yewtira mo no moƴƴiri, hay si o wonaa rewoowo Yahuwah Alla.

3. Ko honno jommbindirɓe tiiɗinirta dewgal maɓɓe ngal ?

Deftere Alla nden wi’i fii jommbindirɓe « kamɓe ɗiɗo ɓe wona gooto » (Matta 19:5). Ɗun no firi hiɓe haani wakkilaade moƴƴa selugol kala ko woɗɗindinta ɓe. Ɓe waɗiray ɗun e hoore feƴƴindingol saa’i e ɓe yewtay fii ko ɓe miijii e ko ɓe faalaa e hoore giggol. Ɓe accataa hay huunde maa hay gooto, si wonaa Yahuwah Alla, ɓura moodibbo on maa sonnaajo on hittude. E hiɓe haani wattande yila fii wota ɓe heɓu weldiiɗo hiɓɓuɗo ɓuri moodibbo on maa sonnaajo on.

 LUGGINEE

4. Moodibbo : ƴiɗee sonnaajo mon on e dannkoɗon mo

5. Sonnaajo : yiɗee moodibbo mon on e teddinon mo

Deftere Alla nden wi’i yo sonnaajo on teddin moodibbo makko on, hay si tawii hinaa rewoowo Yahuwah Alla. Janngee 1 Petruusu 3:1, 2 e yewton fii ɗee lanndaale :

• Si tawii moodibbo mon on wonaa Seedeejo Yahuwah, haray hiɗon faalaa ɲannde goo yo o rewu Yahuwah Alla. E miijo mon, ko honɗun ɓurata mo wallude ? Ko waajagol mo saa’iiji ɗin fow kaa ko hollugol mo jikku moƴƴungu e teddungal ? Fii honɗun ?

Moodibbo e ɓeyngu mun no waawi fottude e ko ɓe fewjata kon. Kono wonnde, sonnaajo on jaɓataa ko  moodi makko fewjata kon. Si ko non woniri, o yewtiray mo doy e hoore teddungal ko o miijii kon. Kono himo haani anndude ko moodi makko Yahuwah Alla waɗi hoore ɓeynguure nden fii fewjugol ko moƴƴi. Himo haani wakkilaade moƴƴa fii tawtugol moodi makko e ko o fewjata kon. Si o waɗii ɗun, o wallay ɓeynguure makko nden heɓugol weltaare. Janngee 1 Petruusu 3:3-5 e yewton fii ngal lanndal :

• Ko honno Yahuwah Alla miijortoo fii sonnaajo teddinoowo moodi mun ?

6. Ko honno jittirton satteendeeji ka dewgal mon ?

 RAWNOODE

Moodibbo on e sonnaajo on waaway heɓude weltaare si hiɓe yiɗindiri, si hiɓe teddindiri e si ɓe huutorii tugaale Deftere Alla nden.

Ndartannde

• Ko honno moodibbo on waɗirta fii no weltaare heɓora ka dewgal makko ?

• Ko honno sonnaajo on waɗirta fii no weltaare heɓora ka dewgal makko ?

• Si tawii hiɗon jommbi maa hiɗon jommbaa, ko tugalal Deftere Alla honngal wallata on tiiɗingol dewgal mon ngal ?