NIKASEMƆ 49
Te Oweku Lɛ Baafee Tɛŋŋ Aná Miishɛɛ?—Fã 1
Kɛ́ mɛi bote gbãla mli ehee lɛ, amɛkpaa gbɛ akɛ miishɛɛ ni amɛná yɛ yookpeemɔ gbi lɛ nɔ lɛ baahi shi daa. Ni ebaanyɛ eba mli nakai. Kristofoi ni bote gbãla mli etsɛ ni bɔɔ mɔdɛŋ amɛkɛ Biblia mli ŋaawoi tsuɔ nii lɛ le akɛ ebaanyɛ eba mli.
1. Mɛɛ ŋaa Biblia lɛ woɔ wumɛi?
Yehowa ehala wu lɛ akɛ weku lɛ yitso. (Kanemɔ Efesobii 5:23.) Yehowa kpaa gbɛ akɛ wu lɛ baakpɛ yiŋ ni weku lɛ baaná he sɛɛ. Biblia lɛ kɛɔ wumɛi akɛ: “Nyɛyaa nɔ nyɛsumɔa nyɛŋamɛi.” (Efesobii 5:25) Mɛni enɛ tsɔɔ? Wu ni yɔɔ suɔmɔ lɛ kɛ eŋa yeɔ jogbaŋŋ, yɛ shia kɛ agbɛnɛ hu yɛ mɛi ateŋ. Ebɔɔ mɔdɛŋ ni ehã eŋa lɛ nibii ni he hiaa lɛ, ni efeɔ nibii ni baahã enu he akɛ esumɔɔ lɛ ni eyɛ shweshweeshwe. (1 Timoteo 5:8) Nɔ ni he hiaa fe fɛɛ lɛ, ewaa eŋa lɛ koni naanyobɔɔ ni yɔɔ eŋa lɛ kɛ Yehowa teŋ lɛ mli awa. (Mateo 4:4) Akɛ nɔkwɛmɔnɔ lɛ, ebaanyɛ ekɛ eŋa lɛ afee ekome kɛsɔle ni amɛkane Biblia lɛ hu. Kɛ́ nuu ko jɛ suɔmɔ mli ekwɛ eŋa lɛ, naanyobɔɔ ni yɔɔ ekɛ Yehowa teŋ lɛ fiteee.—Kanemɔ 1 Petro 3:7.
2. Mɛɛ ŋaa Biblia lɛ woɔ ŋamɛi?
Nyɔŋmɔ Wiemɔ lɛ kɛɔ akɛ esa akɛ ŋa “aná bulɛ ni mli kwɔ ehã ewu.” (Efesobii 5:33) Mɛɛ gbɛ nɔ ebaanyɛ etsɔ efee nakai? Ebaanyɛ esusu nibii nɛɛ ahe: sui kpakpai ni ewu lɛ yɔɔ, kɛ mɔdɛŋ ni ebɔɔ koni ekwɛ lɛ kɛ amɛbii lɛ. Kɛ́ ewu lɛ kpɛ yiŋ ko lɛ ebaanyɛ ewa lɛ koni yibii kpakpai ajɛ mli kɛba. Agbɛnɛ hu, ebaanyɛ ekɛ ewu lɛ awie yɛ naajɔlɛ mli, ni ewie ehe ekpakpa hu, kɛ́ ejáaa Yehowa po. Kɛ́ efee nibii nɛɛ, no baatsɔɔ akɛ ebuɔ ewu lɛ.
3. Mɛni wu kɛ ŋa baanyɛ afee koni amɛgbãla lɛ asɔ?
Biblia lɛ wie yɛ wu kɛ ŋa he akɛ: “Amɛyi enyɔ lɛ fɛɛ amɛbaatsɔ heloo kome.” (Mateo 19:5) Enɛ tsɔɔ akɛ, esa akɛ amɛwu amɛshi nɔ fɛɛ nɔ ni baahã suɔmɔ ni yɔɔ amɛteŋ lɛ he ajɔ. Enɛ baabi ni amɛná dekã amɛhã amɛhe, ni amɛjɛ amɛtsuiŋ amɛjie amɛhenumɔi kɛ amɛsusumɔi kpo amɛtsɔɔ amɛhe, ni amɛfee nakai yɛ suɔmɔ mli hu. Amɛhãa amɛhefatalɔ lɛ he hiaa amɛ fe nɔ fɛɛ nɔ loo mɔ fɛɛ mɔ, ja Yehowa pɛ. Amɛkwɛɔ jogbaŋŋ koni amɛkɛ mɔ kroko akabɔ waa fe amɛhefatalɔ lɛ.
KASEMƆ PII OFATA HE
Obaana Biblia mli ŋaawoi ni baanyɛ ahã ogbãla lɛ asɔ.
4. Wumɛi—nyɛsumɔa nyɛŋamɛi ni nyɛkwɛa amɛ jogbaŋŋ
Biblia lɛ kɛɛ esa akɛ “wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei.” (Efesobii 5:28, 29) Mɛni enɛ tsɔɔ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛni ji gbɛi komɛi ni wu ko baanyɛ etsɔ nɔ etsɔɔ akɛ esumɔɔ eŋa lɛ ni ejwɛŋɔ ehe?
Nyɛkanea Kolosebii 3:12 lɛ, ni nyɛsusua sanebimɔ nɛɛ he:
-
Mɛɛ gbɛ nɔ wu ko baanyɛ ejie sui nɛɛ kpo yɛ egbãla mli?
5. Ŋamɛi—nyɛsumɔa nyɛwumɛi ni nyɛbua amɛ
Biblia lɛ kɛɔ ŋamɛi akɛ amɛbu amɛwumɛi—amɛjáa Yehowa jio, amɛjáaa Yehowa jio. Nyɛkanea 1 Petro 3:1, 2 lɛ, ni nyɛsusua sanebimɔi nɛɛ ahe:
-
Kɛ́ owu lɛ jáaa Yehowa lɛ, ŋwanejee ko bɛ he akɛ obaasumɔ ni ebajá lɛ. Kɛ́ okwɛ lɛ, mɛni ji gbɛ ni hi fe fɛɛ ni obaanyɛ otsɔ nɔ owa lɛ—ni obaashiɛ otsɔɔ lɛ be fɛɛ be, aloo ni obaaba ojeŋ jogbaŋŋ, ni ojie bulɛ kpo otsɔɔ lɛ? Mɛni hewɔ okɛɔ nakai?
Wumɛi kɛ ŋamɛi baanyɛ afee ekome kɛkpɛ yiŋ kpakpai. Shi ekolɛ, jeee be fɛɛ be ŋa lɛ kɛ ewu lɛ baakpã gbee. Kɛ́ eba lɛ nakai lɛ, ebaanyɛ ejɛ bulɛ kɛ naajɔlɛ mli ehã ewu lɛ ale esusumɔi, shi esa akɛ ehã ehi ejwɛŋmɔŋ akɛ, Yehowa ehã ewu lɛ hegbɛ ni ekpɛ yiŋ ni weku lɛ baaná he sɛɛ. Esa akɛ efee bɔ fɛɛ bɔ ni ebaanyɛ kɛfi ewu lɛ yiŋkpɛɛ lɛ sɛɛ. Kɛ́ efee nakai lɛ, miishɛɛ baahi weku lɛ mli. Nyɛkanea 1 Petro 3:3-5 lɛ, ni nyɛsusua sanebimɔ nɛɛ he:
-
Kɛ́ ŋa ko jie bulɛ kpo etsɔɔ ewu lɛ, te Yehowa naa no ehãa tɛŋŋ?
6. Obaanyɛ oye naagbai ni akɛkpeɔ yɛ gbãla lɛ mli lɛ anɔ
Gbãla ko bɛ ni naagba bɛ mli kwraa. No hewɔ lɛ, esa akɛ wumɛi kɛ ŋamɛi afee ekome kɛtsu amɛnaagbai ahe nii. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛɛ nibii komɛi wɔna yɛ vidio lɛ mli ni hã wɔna akɛ gbɛ miihe abakã nuu lɛ kɛ eŋa lɛ teŋ?
-
Mɛɛ nibii amɛfee koni wekukpãa ni yɔɔ amɛteŋ lɛ mli awa?
Nyɛkanea 1 Korintobii 10:24 kɛ Kolosebii 3:13 lɛ. Kɛ́ nyɛkane ŋmalɛi lɛ eko fɛɛ eko nyɛgbe naa lɛ, nyɛsusua sanebimɔ nɛɛ he:
-
Kɛ́ wu kɛ ŋa kɛ ŋaawoo nɛɛ tsu nii lɛ, mɛɛ gbɛ nɔ ebaanyɛ ehã wekukpaa ni yɔɔ amɛteŋ lɛ mli awa?
Biblia lɛ kɛɛ wɔkɛ woo ahã wɔhe. Enɛ biɔ ni wɔjie bulɛ kpo wɔtsɔɔ mɛi, ni wɔkɛ amɛ aye jogbaŋŋ. Nyɛkanea Romabii 12:10 lɛ, ni nyɛsusua sanebimɔi nɛɛ ahe:
-
Ani esa akɛ wu ko loo ŋa ko amɛ ni ehefatalɔ lɛ klɛŋklɛŋ kɛ woo ahã lɛ? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
MƐI KOMƐI KƐƆ AKƐ: “Mi kɛ mihefatalɔ lɛ bɛ tamɔ tsutsu lɛ.”
-
Kɛ́ mɔ ko kɛɛ nakai lɛ, mɛɛ gbɛ nɔ obaanyɛ ohã ele akɛ, Biblia lɛ baanyɛ awa amɛ?
EMLI OTI
Kɛ́ wu kɛ ŋa sumɔɔ amɛhe, amɛjieɔ bulɛ kpo amɛtsɔɔ amɛhe, ni amɛkɛ Biblia mli ŋaawoi tsuɔ nii lɛ, amɛgbãla lɛ baasɔ.
Mɛni Okase?
-
Mɛni wu baanyɛ afee koni egbãla lɛ asɔ?
-
Mɛni ŋa baanyɛ afee koni egbãla lɛ asɔ?
-
Kɛ́ obote gbãla mli lɛ, kɛ́ okwɛ lɛ, mɛɛ Biblia mli ŋaawoo baanyɛ ahã ogbãla lɛ asɔ?
EHE SAJI KROKOMƐI
Obaana ŋaawoi kpakpai ni baanyɛ ahã miishɛɛ ahi oweku lɛ mli.
Lala vidio nɛɛ baahã ona bɔ ni kɛ́ okɛ Biblia mli ŋaawoi tsu nii yɛ ogbãla lɛ mli lɛ, ebaawo yibii kpakpai.
Kɛ́ akɛɛ ŋa aba ehe shi ewo ewu shishi lɛ, te atsɔɔ tɛŋŋ? Obaana hetoo lɛ yɛ sane nɛɛ mli.
“Yei, Mɛni Hewɔ Esa Akɛ Nyɛkpɛlɛ Yitsoyeli Nɔ?” (Buu-Mɔɔ, May 15, 2010)
Mɛɛ gbɛ nɔ nuu ko kɛ eŋa ni tse gbãla be ko lɛ nyɛ amɛtsu amɛnaagbai wuji lɛ ahe nii?
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
