Gbò e bà ã́àa ilá ólò ẹ̀bmà dẽe kọọ̀ ẹ́ẹ́ nyíe e ba beè ièè deé e bà géè ilàẹ̀a é di dọ̀ dè-dè. Vaá àé láá dì naa vó. Gbò nyòòne nvéè Kráìst ea ni dú kpã́á deé e ba beè ilá vaá bà gé piiga boo gè tú gbò dùùlà bá deè tṍ ea di mm̀ Kpá Káí siimá tóm nyímá kọọ̀ níí é láá valí.

1. Mókà dùùlà bá deè tṍ ní e Kpá Káí ne gbò dóm ẽ́?

Jìhóvà íbá ló dóm naamá togó boo tọ. (Bugi Ẹ́fẹsọ̀s 5:23.) Jìhóvà gbĩ́ kọọ̀ á nè béèlàfùl ea é dọ bélè nè pá a tọ. Kpá Káí síè kpóó ló gbò dóm kọọ̀: “Vulei bọọ gbò va.” (Ẹ́fẹsọ̀s 5:25) Éé ní e níá kọlà ẹ? Dóm ea vulè a va é tú lé bá sẹ̀ẹ̀màe gbẹá tọ nè tṍó e bà di gbàà gbò. Àé kpenàe lọl bá gbò nú ea é láá nvèèe kom ló vaá pììgà bé ea kpóó sim tùlà naa gè ẹ̀b nú ea kil ló gbò a bíi vaá naa kọọ̀ nyíée á ẹẹ. (1 Tímotì 5:8) Bọọ èlmà tõ̀ò, àé nveè bá nè a va kọ á ié lé gbaa ló kilma ló Jìhóvà. (Máátìù 4:4) Dì belí nu dòòmà bá, àé zọ a va tã̀àgã ló Bàrì vaá bugi Kpá Káí. Dóm é íe lé gbaa ló kilma ló Jìhóvà be à vulè vaá ẹ̀b nú ea kil ló a va.—Bugi 1 Pítà 3:7.

2. Mókà dùùlà bá deè tṍ ní e Kpá Káí ne gbò va ẹ́?

Kpá Káí kọ́ọ̀ va ‘á palàge fã̀ dẽè a dóm.’ (Ẹ́fẹsọ̀s 5:33) Mósĩ́ deè ní e va é láá fã̀ dẽè a dóm ẽ́? Àé láá bugi togó boo gbò lé kpãà a dóm nè bé ea gé piigà ge ẹ̀b nú ea kil ló pá a nvín nè ẹ̀ẹ̀ naa. Àé láá zogè nàgé kọọ̀ à fãè dẽè a dóm tení dú ló gè nvèè sãa kúm gbò béèlàfùl ea ne vaá tú gbọ́ọ́-gbọọ̀ ló loomá bel nèe nè tṍó ea gé ló bel ea kilíé ló nè dõòna gbò, kọbèè à gá náa vaá náa ólò fã̀ Jìhóvà.

3. Mósĩ́ deè ní e dóm nè va é láá naa kọọ̀ ba ílà dóm nè va á agaló é?

Kpá Káí kọ́ kilma ló gbò e baa ni ílá kọọ̀: “Pálàa ọ̀và é gbóó dú tẽ̀ènè nen.” (Máátìù 19:5) Níí tõó dọ̀ kọọ̀ bà náa é náa tọ́ọ̀ kà nú ea é náa kọọ̀ bàá gá vùlènà ene. Ge olòó tú gã́bug tṍó diima ló ene nè ge kọ́ kà lèlà bé e nu tọ́a vá ló naa nè ene é náa kọọ̀ ba gbaa ló á agaló. Bà náa é sọtọ́ deè kọọ̀ tọ́ọ̀ nu àbèè nen—daalá lọl ló Jìhóvà—á bọọlìè vá ló èlmà ba dóm àbèè va. Bàé palàge ié ọ̀ẹ̀ dẽe kọbé bà náa zọ tọ́ọ̀ nen ié gbaa ló e bè náa bọ́ló.

 KPÁÁ NÓ BỌ̀Ọ̀VẸ̀

4. Gbò dóm—vulei vaá ò ẹbvii nú ea kil ló bọọ va

5. Gbò va—vulei vaá ò fãi dẽè bọọ dóm

Kpá Káí síè kpóó ló gbò va kọ bàá fã̀ dẽè ba dóm kọbèè à ólò fã̀ Jìhóvà àbèè kọ náa ólò fã̀e. Bugi 1 Pítà 3:1, 2, vaá ò gbóó aalai gbò bíbví:

• Tọ́ọ̀ kà bàà-bàà bùlà á gé ló kọọ̀ à tan ni kọọ̀ o dóm á fã̀ Jìhóvà. Éé ní eo bulà kọọ̀ àé láá nvèè bá ẹ́—é kọọ̀ ge olòó kọ́ kpẹ̀a nèe sẹ̀ ge ié lé láb vaá ò fã́e dẽe ẽ́? Ló éé?

Dóm nè va é láá gbá nè lé béèlàfùl. Sõò sìgà tṍó, bùlà va é láá tení kele ló níí a  dóm. Be à meà naa vó, àé gbóó láá tú gbọ́ọ́-gbọọ̀ ló nè bá fã̀ dẽe kọọmá a bùlà, sõò àé bọ́ló kọ á kẽ̀èa boo kọọ̀ Jìhóvà beè tú tóm gè nè béèlàfùl ea é léé ló pá tọ nè a dóm. Àé bọ́ló kọ á pììgà bé ea kpóó sim tùlà naa gè nvèè sãa kúm béèlàfùl ea dóm ne. Be à náa vó, àé nveè bá naa kọọ̀ ẹ́ẹ́ nyíe á di mm̀ ba tọ. Bugi 1 Pítà 3:3-5, vaá ò gbóó aalai nakà bíbví:

• À ólò tõó ló Jìhóvà naa vàẹ tṍó e va fã dẽè a dóm ẽ́?

6. Òé láá kpoogè dee ló tã̀àgã̀ ea di mm̀ bọọ ílà dóm nè va

 NÚ E NI NÓ

Dóm nè va é láá ié ẹ́ẹ́ nyíe be à gá náa vaá bà vùlè ene, fã̀ dẽè ene, vaá tú gbò nòòkúu ea di mm̀ Kpá Káí siimá tóm.

Ge Òòa Boo

• Éé ní e dóm é láá naa kọbé ẹ́ẹ́ nyíe di mm̀ ba ílà dóm nè va ẹ́?

• Éé ní e va é láá naa kọbé ẹ́ẹ́ nyíe di mm̀ ba ílà dóm nè va ẹ́?

• Be o ni ílí àbèè o íá, mókà nòòkúu ea di mm̀ Kpá Káí ní ea é láá nvèè bá naa kọọ̀ bọọ ílà dóm nè va á kpáá aga ló é?