Nua da kɛi húlulɔ gwəinɛɛ tii a kɛ di yəi a voloi tii, da kɛ bɔ di wɔ kwəinɛɛ tii ə lɛɛ lɔ di yəi a yələkəlee da nwɔɔ. Ə lɛɛ a teɲa kpɔkpɔ yili a pɛli ma ə kɛ ! Kilistaleai daa húlulɔ ɉu aa kwea daa gaa diɛ ma da kɛi di sə-mɛni kɛ diɛ Biblə ŋɔ tɔn-nwooɠaa pɔ túwɔ́ ɓo, da pɛli di kwəinɛɛ hɔlɔɓo di yəi bɛlɛn.

1. Liɛwoo ləkɛɛɠaa ɓə Biblə a dɛɛ nɛa namənaa pɔ ?

Hulɔnu ɓə Zehova ə maalaa tɛɛ bɔ ə kɛ a ɲəi bɛlɛn nua nwun namu (Efɛsə 5:23 ɓo). Zehova kaa bɔ mɛniɠaai nɛlɛɛ ɲəi bɛlɛn nua maamɛni ɓa, yɛ ɉəɠə ɉu. Biblə a niɛwoo ŋɛi kɛ hinaa diɛ : “ Ká ká nɛani wɛlilakɛ ” (Efɛsə 5:​25). Yili mukulaa ɓaa lə ? Hulɔnu yii nɛa wɛli kaa ma a ɉon a nɛlɛɛ, yɛ ə kɛ di tɔnɔ koɉu, ə ma kɛ kpɔn ɉu. A nɛa maakpɛ ə gɛ mɛniɲɔn nɔpee ta ho həli ma, ə lɛɛ yɛ mɛni kəlee kɛ yɛ maakpaanŋaa kəlee ɲɛi kulɔ da niiɓa mɛniɠaa (Timote dɔlɔɔ 5:8). Yii kpɔ nwɔnɔ maamɛni wala-walaa ya ka : a kpɔnmaa tɛɛ nɛa pɔ ə lɛɛ a maalɛɠɛɛ Zehova ɓa (Matie 4:4). Gwa gɔɔmaa həɠə, da nɛa da pɛli Yálá hwɛlii gee ɓa ə lɛɛ diɛ Biblə ɓo. Hulɔnu yii a nɛa hon a wɛlikɛmaalaa, a yaa da Zehova di wɔ nɛɛlaa huwala-wala (Piɛrə dɔlɔɔ 3:7 ɓo).

2. Liɛwoo ləkɛɛɠaa ɓə Biblə a dɛɛ Hilɛtai kɛ nɛaa pɔ ?

Biblə a kɛ ma Hilɛtai kɛ nɛɛnu “ ə ɉilɛ maawiɛ ” (Efɛsə 5:​33). A pɛli yili kɛi ləi ? A pɛli yili kɛi a kɛi giliŋahiɛ ɉilɛ ŋɔ tuwɔ pələ lɛlɛɠaa diɛ, da mɛniɠaa ɉilɛ a gɛ maamɛni hu da di lonnii. Mɛniɠaai ɉilɛ aa ɉee gbaŋa di yəi bɛlɛn a kɛi ɲee hee mɛniɠaa tii mu, bələ ɓə nwɔnɔ a nɛ la yɛ ma a ɉilɛ maawiɛ. Ə lɛɛ a hwaa ɉilɛ pɔ a nɛlɛɛ yɛ naa pələ lɛlɛɛ ɓo ə ma kɛ da yaa di ho kalan dɔnɔ hu.

3. Hulɔnu da nɛa da pɛli di wɔ húlu yii huwala-walai ləi ?

Biblə a kɛ ma nɛɛnu da hulɔnu da húlulɔ, ‘ daa kɛ tanɔn ’ (Matie 19:5). Yili mukulaa ɓaa maahonɛɛli di ho mɛni ta lɔpee lɛɛlaa ho di maakweaa di kee ɓa. Da pɛli yili kɛi da kɛi lowai kɛ gee ɓa kɛlɛ-kɛlɛ, diɛ hwaa di kee ni pɔ a wɛlikɛmaalaa, ə lɛɛ diɛ di kwəi mɛni hukulɔ di kee ni diɛ. Maahonɛɛli nui aa húlulɔ ho mɛni ta lɔpee lɛɛlaa awala kɛtii ho nuta lɔpee lɛɛlaa maamɛni ə wala-wala ɲəi ə tɛɛ məlan ma akɛ Zehova hwəi. Ə lɛɛ maahonɛɛli nɛɛlaa huwiaa yii ho pɛli li ɉu ho lɔ yaa da nu takpɛli di lowai.

 Ə́ WƆ MƐNIKƆLƆNŊAA TA PƐLƐ MA

4. Nɛa namənaa, ka ka nɛani wɛlilakɛ ə lɛɛ kaa di hon a nɛlɛɛ

5. Hilɛtai kɛ nɛaa : Ka ka hilɛni wɛlilakɛ ə lɛɛ kaa di maawiɛ

Biblə a Hilɛtai kɛ nɛaa hwaŋalɔ di di hilɛ ni maawiɛ ə ma kɛ di ho ɓaa a Zehova ɓatoonua. Piɛrə dɔlɔɔ 3:​1, 2 ɓo, ə lɛɛ ka lono kɛ gɛɛmaalənŋaa ŋɛi mɛi :

• Akɛ ə́ hilɛ ho ɓaa a Zehova ɓaatoomun da, ə́ kaa bɔ yii yaan ə pa kɛ a Zehova ɓaatoomun. Ə́ wɔ kili ɓa kpaalə ləkɛɛɠaa ɓə ya pɛli kpɔnmaa tɛɛ la bɔ ? Ə́ wɔ kili ɓa ya pɛli kpɔnmaa tɛɛ bɔ ya kɛi Yálá Lawoo laahəli ma a lowai kəlee awala kɛtii ya pɛli kpɔnmaa tɛɛ bɔ ya kɛ a nɛɛnu yii duwɔ pələ lɛlɛɛ, ŋɔ mɛni lɛlɛɛ, ə lɛɛ yɛ ɉilɛ maawiɛ ? Lə mɛni ɓa ə́ kaa moi tii ?

Kɛlɛ-kɛlɛ hu hulɔnu da nɛa da kɛi mɛniɠaa həɠə ɉu di woo tɔɔi a kɛ tanɔn. Kəlaa lowai taɠaa, mɛniɠaa ɉilɛ a ɉəɠə ɉu hwa nii hon. Yili akɛtii a pɛli ŋɔ kiliŋahiɛ hukulɔi ɉilɛ ɓa a woolaamaa da maawiɛlaa. Kəlaa maanɛɛ ə kɛ a gɔlɔnŋaa yɛ ma ɉilɛ ɓə Zehova ə gɛ a bɛlɛnamu yɛ pɛli mɛni lɛlɛɛɠaa hee gbaŋa di yəi bɛlɛn nua maamɛni ɓa. A mɛni kəlee kɛ mɛniɠaai ɉilɛ aa ɉee gbaŋa ə́ ɲee hee mu. A kɛi yili kɛ tii bələ ɓə a kpɔnmaa tɛɛ la ɲəi bɛlɛn nua pɔ di kɛ kwəinɛɛ hu. Piɛrə dɔlɔɔ 3:​3-5 ɓo, ə lɛɛ ka lono kɛ gɛɛmaalən ŋɛi mɛi :

• Nɛɛnu a kɛi ɉilɛ maawiɛ lə ɓə yili a gɛ Zehova ɓa ?

 6. Mɛniɠaa da pɛli hwaa tooi ka wɔ húlu yii hu ka kpean di tɔwɔ

 YII GU GALAN

Hulɔnu da nɛa da kɛi Biblə ŋɔ tɔn-nwooɠaa pɔ túwɔ́ɓo, diɛ di kee ni wɛlilakɛ, diɛ di kee ni maawiɛ, da kɛ kwəinɛɛ hu.

Nɛɛ ə́ kili pɔ

• Lə ɓə maanɛɛ nɛa namu ə gɛ yii yaan di yəi bɛlɛn ɲaa ə kɛ a nɛɛ ?

• Lə ɓə maanɛɛ hilɛtai kɛ nɛa ə gɛ yii yaan di yəi bɛlɛn ɲaa ə kɛ a nɛɛ ?

• Akɛ yaa húlulɔ Biblə ŋɔ tɔn-nwoo ləkɛɛ ɓə a pɛli əi wɔ húlu yii huwala-wala ?