Jitaʼchik ít tomkinének, in léʼchik ka kʼwajiy kulbél tin tsablóm abal etsʼey, ani in éjtowalchik ka kʼwajiy antsanáʼ. Yan i tomkinél axi pel i ólchix kʼal a Jehová antsanáʼ tin tʼajámal ti kwéntaj, kom in belkámal an tsalpadh kaw axi kʼwajat ti Biblia.

1. ¿Jantʼoj in ulal an Biblia abal kwaʼal kin tʼajaʼ an inik axi tómkidh?

A Jehová in jilchámal an inik abal játs kin ókʼnaʼ in yanél (ka ajiy Efesios 5:​23). Ani in léʼ abal kʼal jawaʼ kin takuy, etsʼey kin tólmiy in yanél. An Biblia in uchál axéʼ an inik axi tómkidh: «Max it tómkidh inik, ka kʼanidhaʼ a kʼimádhil» (Efesios 5:​25). ¿Jantʼiniʼ neʼets kin tʼajaʼ? An inik neʼets kin tejwamédhanchij i kʼanidhomtaláb in kʼimádhil, bélits max yab u tsuʼtáb kʼal jitaʼ. In beletnál, in pidhál jawaʼ in yéjenchal ani in tʼajál ti kwéntaj jawaʼ in atsʼál (1 Timoteo 5:8). Pero jawaʼ más exbadh játs abal in tólmiyal abal ka kʼwajiy más utat kʼal a Jehová (Mateo 4:4). Jun i tʼiplab, in tsápnanchal ka oláts ani kin ajiy an Biblia kʼal jajáʼ. An inik neʼets ka kʼwajiy más utat kʼal a Jehová, max kin tsápnanchij kin béletnaʼ in kʼimádhil (ka ajiy 1 Pedro 3:7).

2. ¿Jantʼoj in ulal an Biblia abal kwaʼal kin tʼajaʼ an uxum axi tómkidh?

An Biblia in uchál axéʼ an uxum axi tómkidh: «Tómkidh uxum, a kwaʼal a uchbíl ka kʼakʼnaʼ a tomkíl» (Efesios 5:​33). ¿Jantʼiniʼ in éjtowal kin tʼajaʼ? In tomnál kin tsalpay kʼal patal jawaʼ in tʼajál alwaʼ in tomkíl ani an tsapláb axi in tʼajál abal ka beletnáj jajáʼ ani an tsákamchik. Jayej neʼets kin tejwamédhanchij abal in kʼakʼnál, max kin tólmiy kʼal jawaʼ in takuyámal kin tʼajaʼ, max kin tawnaʼ kʼal i kʼanidhomtaláb ani max yab kin kawiliy, bélits max yab in kʼakʼnál a Jehová.

3. ¿Jantʼoj in éjtowal kin tʼajaʼ axi tómkidh, abal ka kʼwajiychik más junkudh?

An Biblia in ulal axéʼ tin kwéntaj an tomkinél: «Ejtíl max júnkatsits tin eb» (Mateo 19:5). Axéʼ in léʼ kin uluw abal yab jaykʼiʼ kwaʼal ka ukʼchíxin. Jaxtám in tsápnanchal etsʼey ka kʼwajiy junax, ka tʼilmátschik ani kin ólnaʼ jawaʼ in atsʼál. Jayej u tʼajáxchik ti kwéntaj ani yab in jilál abal ka pelkan nibal jantʼoj, expidh a Jehová. Ani yabchik in watʼadh júnkuwal kʼeʼat jitaʼ axi yab pel in tomkíl o in kʼimádhil.

 ABAL KA EXÓBNAʼ MÁS

4. Tómkidh inik, ka kʼanidhaʼ ani ka béletnaʼ a kʼimádhil

5. Tómkidh uxum, ka kʼanidhaʼ ani ka kʼakʼnaʼ a tomkíl

An Biblia in ulal abal an uxum kwaʼal kin kʼakʼnaʼ in tomkíl, bélits max yab in tʼojonchal a Jehová. Ka ajiychik 1 Pedro 3:​1, 2 ani ka tsálpaychik kʼal axéʼ:

• Tatáʼ a léʼ abal a tomkíl kin kʼakʼnaʼ a Jehová. Pero, ¿jantʼiniʼ walám más neʼets ka ejtow ka tólmiy, max etsʼey kit kʼwajiy ka ólchij kʼal an Biblia, o max ka punchij jun i alwaʼ tʼiplab ani ka kʼakʼnaʼ? ¿Jaleʼ ta tsálpayal antsanáʼ?

An inik ani in kʼimádhil in éjtowalchik ka tʼojon junkudh ani kin tʼajaʼ yan jantʼoj alwaʼ. Bélits antsanáʼ, an uxum yab etsʼey neʼets ka tsálpaxin  jantʼiniʼ in tomkíl. Tam ka watʼey antsanáʼ, in éjtowal kin ólchij in tomkíl jawaʼ in tsálpayal, pero kwaʼal kin tʼajaʼ kʼal yan i kʼakʼnaxtaláb. Jayej, kwaʼal kin tʼilaʼ abal an inik játs axi pidhnének in uchbíl kʼal a Jehová abal kin ókʼnaʼ in yanél. Kwaʼal kin tsápnanchij kin tólmiy in tomkíl kʼal jawaʼ in tsalpayámal kin tʼajaʼ. Axéʼ neʼets kin tʼajaʼ abal ka kʼwajiychik kulbél. Ka ajiychik 1 Pedro 3:​3-5 ani ka tsálpaychik kʼal axéʼ:

• ¿Jantʼiniʼ in atsʼál a Jehováʼ tam kin tsuʼuw abal an mimláb in kʼakʼnál in tomkíl?

6. A éjtowalchik ka tsʼejkaʼ an kʼibataláb

 JAWAʼ I EXOBNÁMAL

Jun i tomkinél in éjtowal ka kʼwajiy más kulbél max ka kʼanidháxin, ka kʼakʼnáxin ani kin eyendhaʼ tin ejatal an tsalpadh kaw axi ti Biblia.

Ki tʼilaʼ jawaʼ i exóbnaʼ

• ¿Jantʼoj in éjtowal kin tʼajaʼ an inik abal ka kʼwajiy más kulbél kʼal in kʼimádhil?

• ¿Jantʼoj in éjtowal kin tʼajaʼ an uxum abal ka kʼwajiy más kulbél kʼal in tomkíl?

• Max tatáʼ it tómkidh, ¿jantʼoj tam tsalpadh kaw axi tin Biblia a éjtowal ka eyendhaʼ abal kit kʼwajiy más junkudh kʼal a tomkíl?