Ovakupasane ovape ve zera kutja ondjoroka ndji ve na yo meyuva rawo rorukupo mai karerere nga aruhe. Nu oyo mai yenene okukarerera. Ovakriste mba kupasana oure woruveze orure nu mba ungura oukukutu okuṱakamisa omirari vyOmbeibela ve tjiwa kutja imbwo ouatjiri.

1. Ombeibela i yandja ondunge iṋe kovarumendu mba kupa?

Jehova wa yandja omerizirira komurumendu ngwa kupa okuhongorera po eṱunḓu re. (Lesa Ovaefese 5:23.) Jehova u vanga kutja eye ma tjite ozondando nḓu maze eta ouwa keṱunḓu. Ombeibela i tja nai kovarumendu mba kupa: “Suvereye ovakazendu veṋu.” (Ovaefese 5:25) Hapo iho matji hee ye? Omurumendu ngwa suvera omukazendu we, u mu tjinda momuano omuwa indu tji ve ri ponganda, na indu tji ve ri pu novandu varwe. Eye u mu tjevera koumba nu u kondja okutjita kutja ma kare nondjoroka mokumupa oviṋa mbi ma hepa korutu na momuinyo. (1 Timoteus 5:8) Kombanda yaavihe, eye u mu vatera kutja ma kare noupanga wopopezu ku na Jehova. (Mateus 4:4) Otjotjihorera, eye ma yenene okukumba nokulesa Ombeibela pu nomukazendu we. Indu omurumendu tji ma ṱakamisa omukazendu we momuano omuwa, eye u kara noupanga ouwa ku na Jehova.—Lesa 1 Petrus 3:7.

2. Ombeibela i yandja ondunge iṋe kovakazendu mba kupwa?

Embo ra Mukuru ri tja omukazendu ngwa kupwa “nga yozike omurumendu we.” (Ovaefese 5:33) Hapo ma yenene vi okutjita nao? Eye ma yenene okuripura ohunga novikaṋena oviwa vyomurumendu we, nozongondjero eye nḓe tjita okurikendera ku ye novanatje vawo. Wina ma yenene okuraisa ondengero mokuyandja oruvara kozondando nḓu ma tjiti, nokuhungira ku na ye poo ohunga na ye momuano omuwa, nandarire kutja omurumendu we ke rikotamene ku Jehova.

3. Ovikwaye ovakupasane mbi mave yenene okutjita kutja ve pamise orukupo rwawo?

Ombeibela i tja nai ohunga novandu mba kupasana: ‘Aveyevari mave rire onyama imwe.’ (Mateus 19:5) Ihi matji hee kutja owo mave sokurwisa otjiṋa ngamwa atjihe tji matji tjiti kutja pe kare ohaṋi pokati kawo. Owo ve tjita nao mokutwa po oruveze okukara pamwe, nokuraerasana omeripura nomuano mu mave fula aruhe. Owo kave sokuyandjera otjiṋa poo omundu warwe okurira omunanḓengu morukupo rwawo, pendje na Jehova. Owo ve kengeza kutja ave ha tungu oupanga wopopezu tjinene ku nomundu warwe.

 KONḒONONA OUKOTO

4. Varumendu, suvereye nokuṱakamisa ovakazendu veṋu

5. Vakazendu, suvereye nokutenga ovarumendu veṋu

Ombeibela i tunduuza omukazendu okutenga omurumendu we, kainatja kutja u karera Jehova poo indee. Lesa 1 Petrus 3:1, 2, nu okuzambo hungirira komapuriro nga:

• Tji wa kupwa i yomurumendu ngu ha karere Jehova, otjiperi kutja u vanga kutja ma ute okumukarera. Hapo mo munu kutja omuano uṋe mbu mau yenene okumuvatera? Mo munu kutja mo sokuhungira ku ye ohunga nOmbeibela oruveze aruhe, poo mo sokurira omukazendu wongaro ombwa nu ngu raisa ondengero? Omena raye?

Omurumendu nomukazendu mba kupasana mave yenene okutjita ozondando ozombwa pamwe. Posi ya, povikando tjiva mape ya omukazendu a pitasana oumune ku nomurumendu we. Eye ma yenene okuraera omurumendu we oumune we, momuano omuwa nu wondengero.  Posi ya, eye ma sokutjiwa kutja Jehova wa yandja omerizirira komurumendu okutya kutja ovikwaye mbi ri ovisemba keṱunḓu. Eye ma sokukondja pu ma yenene okuyandja oruvara kozondyero ze. Tji ma tjiti nao, eye u tjita kutja eṱunḓu arihe ri kare nondjoroka. Lesa 1 Petrus 3:3-5, nu okuzambo hungirira kepuriro ndi:

• Jehova u fula vi indu omukazendu tji ma raisa ondengero komurumendu we?

6. Ove mo yenene okutuurunga omauzeu morukupo rwoye

 OKUYARUKIRA PO OUSUPI

Omurumendu nomukazendu mba kupasana mave yenene okukara nondjoroka indu tji va suverasana, tji va tengasana na indu tji mave ṱakamisa omirari vyOmbeibela.

Okurizemburukisa

• Omomuano uṋe omurumendu mu ma yenene okutjita kutja orukupo ru kare nondjoroka?

• Omomuano uṋe omukazendu mu ma yenene okutjita kutja orukupo ru kare nondjoroka?

• Indu tji wa kupwa poo okukupa, omurari uṋe wOmbeibela mbu mau yenene okukuvatera kutja u kare norukupo oruwa?