Ɔba mla ɔnyā nōo lɛ iyi uwa ɛpɛpɛ gē leyice ka eeye néē lɛ ɛ̄cī aflɛyi néē lɛ iyi uwa a géē yɔ piyoo. Ó kē lɔfu lɛ a. Ɔba mla ɔnyā nōo wɛ Ācɛ O Yɛce Ukraist nōo kē lɛ iyi uwa gboji ɛ, nōo kē yɔ i ceyitikwu o ya ɛɛ kéē bi ukɔ́ ku Ubáyíbu le yuklɔ jé peee ka ɛnyā tɔɔtɛ gla.

1. Ukɔ́ nyá nɛ Ubáyíbu je lɛ ācɛ nōo wɛ ɔba a?

Ujehofa lɛ ɔba fu kóō wɛ otrɛyi ku apɔlɛ. (Jé Ācɛ Ɛ́fēsɔsi 5:23.) Ujehofa dɔka ku ɔba kóō ya ōmiya nōo géē lɛ itene lɛ apɔlɛ ku nu. Ubáyíbu da ācɛ nōo wɛ ɔba a kahinii: “Ɔba dóódu cíkā ō yíhɔtū tá ɔnyā nū.” (Ācɛ Ɛ́fēsɔsi 5:25) Ɔdi wɛyi ɛlā nyā? Ɔba nōo yihɔtu ku ɔnyā nu gē ya odee mla ɔ ɔwɛ ogbonɛnɛ, eko néē yɔ ɔlɛ mla eko néē yɔ mla ācɛ ɔhá. Ó gē ceyitikwu je ogbotu lɛ ɔ, ó gē ya kóō gweeye klla ya aɔdā nōo wɛ ɛgbá ku nu a lɛ ɔ. (1 Utímōti 5:8) Ofiyɛ duu a, ó gē ta ɔ abɔ kóō lɛ ɛma olɔhi mla Ujehofa. (Umátiyu 4:4) Ocabɔ, ó lɔfu gbɔɔkɔ klla jé Ubáyíbu tɔha mla ɔnyā nu. Ɔdaŋ ka ɔba yihɔtu ɔnyā nu lɔɔlɔhi, ó géē ya ku ɔba a kóō gbo ɛma nɛ ó lɛ mla Ujehofa a tu.—Jé 1 Upíta 3:7.

2. Ukɔ́ nyá nɛ Ubáyíbu je lɛ ācɛ nōo wɛ ɔnyā a?

Ɛlā ku Ɔwɔico kahinii: “Ɔnyā í lɛ ojīlīmā ce ɔbá nū piíí.” (Ācɛ Ɛ́fēsɔsi 5:33) Ɛgɛnyá nɛ ó gáā ya ɛnyā a? Ó gē gbɛla lɛyikwu auce olɔhi nɛ ɔba nu lɛ a, ó klla gē leyi yɛ ɛgɛ nɛ ɔba a gē ceyitikwu ō ya ɛgbá ku nu mla aku ayipɛ a. Ó gē lɛ ojilima ce ɔba nu ŋma lɛ ō ta ɔ abɔ cɛɛ ku ōmiya nɛ ɔba nu ya a kóō le ŋmɛyi ɔwɛ olɔhi. Ó géē kɛla lɛ ɔ klla kɛla lɛyikwu ɔ ɔwɛ ogbonɛnɛ, ɔdaŋ ka ɔcɛ a i ka ō wɛ ɔcɛ ō gba Ujehofa ɛ̄gbā ŋ.

3. Ɛgɛnyá nɛ ɔba mla ɔnyā géē lɔfu tu obatɔha ku uwa iyē a?

Ubáyíbu kɛla lɛyikwu ɔba mla ɔnyā nōo lɛ iyi uwa kahinii: “Uwá ɛplɛ́ɛpa kéē le pīya ɔkpíye ékpó.” (Umátiyu 19:5) Ɛnyā wɛ kéē cika ō nuunu tu ɔdā duuma nōo géē ya kéē kwu kɔ hi iyi uwa ta a. É gē ya ɛnyā ŋma lɛ ō le eko taajɛ ō yɔ mla iyi uwa ojigogo, ō kɔka tɔha ŋma ɔtu mla ō ka ɛgɛ nɛ ɔtu gē ya uwa lɛ a mla iyi uwa. É gáā cɛ lɛ ɔdā duuma amāŋ ɔcɛ duuma cɛgbá lɛ uwa fiyɛ obiye ku uwa ŋ, ayika Ujehofa foofunu. É gē leyi kwɛɛcɛ lɔɔlɔhi kéē hii yɔ kwu ɔcɛ ɔhá duuma ajaajɛ fiyɛ obiye ku uwa ŋ.

 JÉ GƆBU

4. Ɔba, yihɔtu ɔnyā uwɔ klla leyi kwu ɔ lɔɔlɔhi

5. Ɔnyā, yihɔtu ɔba uwɔ klla lɛ ojilima ce ɔ

Ubáyíbu ta ɔnyā ɔtu kwu ɔtu kóō lɛ ojilima ce ɔba nu ɔdaŋ ka ɔba a ka ō wɛ ɔcɛ ō gba Ujehofa amāŋ kóō wɛ ɔcɛ ō gba Ujehofa ŋ. Jé 1 Upíta 3:1, 2, cɛɛ ku aa kɔka lɛyikwu aɔka nōo ba nyā:

• Ɔdaŋ ku a lɛ ɔba nōó géē gba Ujehofa ɛ̄gbā ŋ, ó lɛ aafu ŋ, a géē dɔka kóō wa i gba Ujehofa ɛ̄gbā. Ɔdi wɛ ɔwɛ olɔhi fiyɛ duu nɛ a lɔfu ta ɔ abɔ a, a gbɛla ka ō yɔ i tɔɔna lɛ ɔ eko doodu nɛɛ kɛɛ ka ō yɔ i ya ɔdā olɔhi lɛ ɔ, ō gbonɛnɛ klla mafu ojilima lɛ ɔ? Ɔdiya?

Ɔba mla ɔnyā lɔfu ya ōmiya olɔhi tɔha. Naana a, ekoohi ɔnyā a i gáā lɔfu cɛtɔha  mɛmla ɔba a ŋ. Ó lɔfu da ɔba a ɔdā nɛ ó gbɛla ɔwɛ ku ojilima, amáŋ, ó cika ō jé ka Ujehofa kwu íkwu ɔɔma i lɛ ɔba a ō ya ōmiya olɔhi fiyɛ duu lɛ apɔlɛ a ɛ. Ó cika ō ya ɔdā nɛ ó ya gla o ya ɛɛ kóō je otabɔ lɛ ɔba nu ipu ōmiya nɛ ó ya a. Ɔdaŋ kóō yɔ i ya lɛ a, ó yɔ i ta ɛjɛɛji apɔlɛ a abɔ kéē yɔ i gweeye. Jé 1 Upíta 3:3-5, cɛɛ ku aa kɔka lɛyikwu ɔka nyā:

• Ɛgɛnyá nɛ ɔtu gē ya Ujehofa lɛ eko nɛ ɔnyā mafu ojilima lɛ ɔba nu a?

6. A lɔfu ya unwalu ɛyɛɛyɛyi nɛ a gē má ipu obatɔha ku uwɔ a lé gla

 ƆDI NƐ A NWU A?

Ɔba mla ɔnyā géē gweeye ɔdaŋ kéē yihɔtu iyi uwa, mafu ojilima lɛ iyi uwa klla bi aukɔ́ ku Ubáyíbu le yuklɔ.

Aɔka ō tu alɔ ɛlá kwu ɔdā nɛ alɔ nwu

• Ɛgɛnyá nɛ ɔba lɔfu ya ku anu mla ɔnyā nu kéē gweeye ipu obatɔha ku uwa a?

• Ɛgɛnyá nɛ ɔnyā lɔfu ya ku anu mla ɔba nu kéē gweeye ipu obatɔha ku uwa a?

• Ɔdaŋ ku a lɛ ɔba amāŋ ɔnyā lɛ ɛ, ukɔ́ ku Ubáyíbu nyá gáā ta uwɔ abɔ ku a lɔfu tu obatɔha ku aa iyē a?