Yan la nnan ni gaw, hkungran ai shani hta lu la ai ngwi pyaw lam hpe prat tup lu mayu ma ai. Dai hpe lu mai ai. Dinghku prat grai na sai Hkristan ni gaw, Chyum Laika hpaji jaw ga hpe shakut nna hkan sa yang, byin mai ai hpe chye wa ma ai.

1. Madu wa ni a matu gara Chyum Laika hpaji jaw ga nga ai kun?

Madu wa hpe dinghku a baw hku nna Yehowa lit jaw da ai. (Ehpesu 5:23 hpe hti u.) Dinghku a matu akyu lu shangun ai dawdan lam ni jahkrat ya na matu shi hpe Yehowa hpyi shawn da ai. Chyum Laika hta madu wa ni hpe ndai hku tsun da ai: “Madu jan ni hpe tsaw ra nga mu.” (Ehpesu 5:25) Dai gaw hpa lachyum rai kun? Tsawra myit nga ai madu wa gaw, madu jan hpe nta hta mung, kaga ni a man hta mung, tsawra myit madun ai. Madu jan shoihpa n nga hkra makawp maga ya nna, hkum hkrang hte hkamsha lam ni hpe lanu lahku ya ai. (1 Timohti 5:8) Grau nna gaw, wenyi lam hta woi awn ya ai. (Mahte 4:4) Ga shadawn, madu jan hte rau akyu hpyi nna Chyum Laika hti ai. Madu wa gaw madu jan hpe tsawra myit hte lanu lahku yang, Yehowa hte shi a hku hkau lam hpe kaja hkra galaw nga ai mung re.​—1 Petru 3:7 hpe hti u.

2. Madu jan ni a matu gara Chyum Laika hpaji jaw ga nga ai kun?

Chyum Laika hta madu jan ni hpe ndai hku tsun da ai: “Madu wa hpe hkrit hkungga nga u.” (Ehpesu 5:33) Gara hku galaw lu na kun? Madu wa a kaja ai atsam ningja ni, tinang hte ma ni a matu shakut shaja nga ai lam ni hpe myit mai ai. Madu wa a dawdan lam ni hpe madi shadaw ya ai, madu wa hpe ga shaga ai shaloi, shi a lam tsun ai shaloi, tsawra myit hte tsun shaga ai hku nna hkungga ai lam madun mai ai. Madu wa gaw n kamsham ai wa raitim, dai hku galaw mai ai.

3. Yan la ni gaw dinghku hpe ngang kang hkra gara hku galaw mai na kun?

Yan la ni hte seng nna Chyum Laika hta ndai hku tsun da ai: “Shan lahkawng gaw hkum shan langai sha tai na.” (Mahte 19:5) Dai gaw, tsawra myit yawm wa shangun ai gara lam hpe mung, ninghkap ra ai ngu ai lachyum re. Shada da a myit mang lam, hkamsha lam ni hpe asan sha tsun dan ai, shada da ayan aten jaw ai hku nna galaw mai ai. Yehowa hta lai nna, kadai hpe mung, gara lam hpe mung, ningrum ningtau hta na grau ahkyak shatai ai baw n galaw ai. Kaga ni hte ladu lai hku hkau ai baw n byin hkra mung sadi ai.

 Kahtap Hkaja

4. Madu wa ni, madu jan ni hpe tsawra nna lanu lahku u

5. Madu jan ni, madu wa ni hpe tsawra nna hkungga u

Madu wa gaw Yehowa hpe nawku tim, n nawku tim, hkungga na matu madu jan hpe Chyum Laika hta tsun da ai. 1 Petru 3:​1, 2 hpe hti nna, ndai ga san ni hpe bawngban u:

• N kamsham ai madu wa lu da yang, nang gaw Yehowa hpe nawku shangun mayu na re. Shi hpe karum ya lu ai kaja htum lam gaw, ayan hkaw tsun ai kun? (sh) kaja ai akyang lailen hte hkungga ai lam madun ai kun? Hpa majaw kun?

Madu wa hte madu jan gaw, kaja ai dawdan lam ni hpe rau jahkrat lu ai. Raitim kalang lang gaw, madu wa a dawdan lam hpe myit n hkrum chye ai. Dai shaloi, si mani ai hte hkungga ai hku tsun dan mai ai. Raitim, dinghku a matu dawdan lam  jahkrat na ahkang, madu wa hpe sha Yehowa jaw da ai lam dum ra ai. Madu wa a dawdan lam hpe kaja htum madi shadaw ging ai. Dai hku galaw ai gaw, nta ting ngwi pyaw hkra karum ya nga ai re. 1 Petru 3:​3-5 hpe hti nna, ndai ga san hpe bawngban u:

• Madu wa hpe madu jan hkungga ai lam madun yang Yehowa gara hku hkamsha ai kun?

6. Dinghku manghkang ni hpe tawt lai lu

 Kadun Dawk

Yan la ni gaw shada da tsawra na, hkungga na, Chyum Laika npawt tara ni hpe hkan sa na nga yang, ngwi pyaw lu ai.

Bai Maram

• Dinghku ngwi pyaw na matu madu wa ni hpa galaw lu ai kun?

• Dinghku ngwi pyaw na matu madu jan ni hpa galaw lu ai kun?

• Nang gaw dinghku hte rai yang, na a dinghku ngang kang hkra gara Chyum Laika npawt tara gaw karum ya lu ai kun?