Nesi ɖɔkɩyaa kɩfama sɔɔlaa se taa leleŋ weyi panɩɣ pe-nesi ɖɔkʋʋ wiye yɔ, ɛwɛɛ mbʋ tam. Toovenim taa lɛ, pɩpɩzɩɣ nɛ pɩla mbʋ. Nesi ɖɔkɩyaa mba pɔɖɔkɩ nesi nɛ pileɖi nɛ pañakɩ pana nɛ pɔɖɔŋ Bibl lɔŋ tasʋʋ yɔɔ yɔ, panawa se pɩpɩzɩɣ nɛ pɩla mbʋ.

1. Lɔŋ weyi Bibl tasɩɣ walaa?

Walʋ Yehowa lɩzaa se ɛkɛ hɔʋ ñʋʋdʋ. (Kalɩ Efɛɛzɩ mba 5:23.) Yehowa sɔɔlaa se walʋ ɛkpaɣ lɩmaɣza wena awazɩɣ ɛ-hɔʋ yɔ. Bibl tasɩɣ lɔŋ walaa nɛ kiheyiɣ-wɛ se: «Iwolo pɩ-yɔɔ nɛ ɩsɔɔlɩ mɩ-halaa.» (Efɛɛzɩ mba 5:25) Pʋ-tɔbʋʋ lɛ suwe? Walʋ weyi ɛsɔɔlɩ ɛ-halʋ yɔ, ɛlakɩ-ɩ camɩyɛ lakasɩ paa pɛwɛ ɖɩɣa yaa pɛwɛ samaɣ taa yɔ. Ɛkandɩyɩɣ ɛ-yɔɔ se kɩdɛkɛdɩm nabʋyʋ ɛtaatalɩ-ɩ, ɛlakɩ e-ɖoŋ ɖeɖe se ɛcɔnɩ ɛ-yɔɔ tomnaɣ yɔɔ nɛ ɛlakɩ ɖɔɖɔ mbʋ piyeki se ɛwɛɛ taa leleŋ taa yɔ. (1 Timootee 5:8) Kɔzɩ kɔzɩ lɛ, ɛɖɛɣ nɔɔ nɛ ɛcɔŋnɩ ɛ-halʋ fezuu taa kɩcɛyɩm ɖeɖe. (Maatiyee 4:4) Pɩ-taa nabʋyʋ lɛ se ɛ nɛ ɛ-halʋ patɩmɩɣ nɛ pakalɩɣ Bibl. Ye walʋ ɛcɔŋnɩ ɛ-halʋ kɩcɛyɩm ɖeɖe camɩyɛ nɛ sɔɔlɩm yɔ, taabalɩyɛ kɩbanɖɛ wɛɣ walʋ ɛnʋ nɛ Yehowa pɛ-hɛkʋ taa.—Kalɩ 1 Pɩyɛɛrɩ 3:7.

2. Lɔŋ weyi Bibl tasɩɣ halaa?

Bibl tasɩɣ lɔŋ halʋ se «ɛña ɛ-walʋ siŋŋ.» (Efɛɛzɩ mba 5:33) Ɛzɩma ɛpɩzɩɣ nɛ ɛla mbʋ? Ye ɛmaɣzɩɣ ɛ-walʋ wɛtʋ kɩbandʋ yɔɔ nɛ ɛmaɣzɩɣ ɖɔɖɔ pana wena ɛlɛ ñakɩ se ɛcɔnɩ ɛ nɛ e-piya pɔ-yɔɔ yɔ, pɩsɩɣnɩ-ɩ nɛ ɛla mbʋ. Ɛbɛ ɛpɩzɩɣ nɛ ɛtasɩ labʋ nɛ ɛwɩlɩ se ɛñaŋ ɛ-walʋ? Ɛɖʋʋ nesi lɩmaɣza wena walʋ kpakɩɣ yɔ nɛ ɛyɔɔdʋʋnɩ-ɩ nɛ nɔɔ kɩbaŋa. Ɛyɔɔdʋʋ ɖɔɖɔ ɛ-walʋ yɔɔ tɔm kɩbandʋ paa ɛlɛ ɛtɩkɛ Krɩstʋ tʋ yɔ.

3. Ɛzɩma nesi ɖɔkɩyaa pɩzɩɣ nɛ pɛcɛyɩsɩ pe-nesi ɖɔkʋʋ?

Bibl yɔɔdʋʋ mba pɔɖɔkɩ nesi yɔ pɔ-tɔm se: «Pa-naalɛ pakaɣ kɛʋ tomnaɣ kʋɖʋmaɣ.» (Maatiyee 19:5) Pɩwɩlɩɣ se pɩwɛɛ se pakaɖɩnɩ mbʋ payɩ pɩpɩzɩɣ nɛ piyele nɛ tayʋʋ kɔɔ pɛ-hɛkʋ taa yɔ. Ye pakpakɩɣ alɩwaatʋ nɛ pacakɩ ɖama cɔlɔ nɛ peheyiɣ ɖama pa-lɩmaɣza faaa nɛ sɔɔlɩm yɔ, pɩsɩɣnɩ-wɛ nɛ pala mbʋ. Pɩtasɩnɩ Yehowa lɛ, paayeki se nabʋyʋ yaa nɔɔyʋ tɔm ɛmʋ ñɩm pɛ-ɛsɩndaa nɛ pɩkpaɖɩ pɛ-tɛŋga. Pɔcɔŋnɩ pa-tɩ yɔɔ camɩyɛ se pa-taa nɔɔyʋ ɛtaaɖʋ taabalɩyɛ kɩdɛkɛdɩyɛ nɛ nɔɔyʋ.

 TAZƖ NƐ PILIMI

4. Walaa, ɩsɔɔlɩ mɩ-halaa nɛ ɩcɔnɩ pɔ-yɔɔ camɩyɛ

5. Halaa, ɩsɔɔlɩ mɩ-walaa nɛ ɩñam-wɛ

Bibl seɣtiɣ halʋ se ɛña ɛ-walʋ paa ɛlɛ ɛtɩkɛ Yehowa sɛyʋ yɔ. Ɩkalɩ 1 Pɩyɛɛrɩ 3:1, 2; nɛ pʋwayɩ lɛ ɩtazɩ tɔm tʋnɛ tɩ-taa:

• Ye ña-walʋ ɛɛsɛɣ Yehowa yɔ, pɩtʋʋ fɛyɩ se ŋsɔɔlaa se etisi nɛ ɛsɛɛ Yehowa. Ŋmaɣzɩɣ se nʋmɔʋ ŋgʋ yɔɔ ŋpɩzɩɣ ŋtɩŋna nɛ ŋsɩnɩ-ɩ nɛ pɩkpaɖɩ? Ɛzɩma ŋsusuu-i tɔm paa ɛzɩmtaa yɔ yaa ɛzɩma ŋlɩzɩɣ wɛtʋ kɩbandʋ nɛ ŋwɩlɩɣ-ɩ nɛ ŋñaŋɩ-ɩ camɩyɛ yɔ? Ɛbɛ yɔɔ?

Halʋ nɛ ɛ-walʋ papɩzɩɣ nɛ pɛkpɛndɩ nɛ pakpaɣ lɩmaɣza kɩbana. Ɛlɛ nabʋyʋ taa halʋ pɩzɩɣ nɛ ɛwɛɛnɩ lɩmaɣza wena awɛ ndɩ nɛ ɛ-walʋ ñɩna yɔ.  Alɩwaatʋ ndʋ lɛ, pɩwɛɛ se halʋ eheyi ɛ-walʋ ɛ-lɩmaɣza nɛ nɔɔ kɩbaŋa nɛ ñamtʋ nɛ ɛtaasɔɔ se ɛ-walʋ Yehowa ha waɖɛ se ɛkpaɣ lɩmaɣza wena awazɩɣ ɛ-hɔʋ yɔ. Pɩwɛɛ se ɛñaɣ pana nɛ ɛɖʋ nesi lɩmaɣza wena ɛ-walʋ kpaɣaa yɔ. Ɩkalɩ 1 Pɩyɛɛrɩ 3:3-5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma pɩlakɩ Yehowa alɩwaatʋ ndʋ halʋ nɔɔyʋ ñaŋ ɛ-walʋ camɩyɛ yɔ?

6. Ŋpɩzɩɣ nɛ ŋwa kala wena ŋkatɩɣ ñe-nesi ɖɔkʋʋ taa yɔ

 TOBI LƐ

Ye halʋ nɛ ɛ-walʋ pɔsɔɔlɩ ɖama, pañaŋ ɖama nɛ pɔɖɔŋ Bibl paɣtʋ kila yɔɔ yɔ, papɩzɩɣ nɛ pɛwɛɛ koboyaɣ taa.

Tɔm taa tazʋʋ

• Ɛzɩma walʋ pɩzɩɣ nɛ ɛla nɛ koboyaɣ wɛɛ e-nesi ɖɔkʋʋ taa?

• Ɛzɩma halʋ pɩzɩɣ nɛ ɛla nɛ koboyaɣ wɛɛ e-nesi ɖɔkʋʋ taa?

• Ye ŋɖɔkɩ nesi yɔ, Bibl paɣtʋ kila wena pɩzɩɣ nɛ acɛyɩsɩ ñe-nesi ɖɔkʋʋ?