ILINNIAGASSAQ 49
Ilaqutariittut qanoq pilluarsinnaavisi? – Immikkoortoq 1
Katerlaat neriuutigisarpaat inuunertik naallugu aappariinnerminni pilluassallutik. Pilluartuarsinnaappullu! Kristumiummi ukiorpassuarni aappariissimasut siunnersuutinillu Biibilimeersunik maleruaasartut pilluartarput.
1. Uiusut Biibilimi qanoq siunnersorneqarpat?
Uiusoq ilaqutariinni ittuusussatut Jehovamit toqqarneqarpoq. (Efesossimiut 5:23 atuarsiuk). Taamaattumik Jehovap kissaatigaa ilaquttaminut iluaqutaasunik aalajangiisassasoq. Uiusut Biibilimi ima peqquneqarput: “Nuliasi asajuarsigit.” (Efesossimiut 5:25) Tamanna qanoq isumaqarpa? Isumaqarpoq kisimiikkaluaraangamilluunniit uiusup nuliani inussiarnersumik pisassagaa, paarisassagaa aamma timikkut misigissutsikkullu pisariaqartitai matussuserniartassagai. (Timuutiusimut 1. 5:8) Pingaarnerpaamillu nuliani Jehovamut qanimut attaveqarsinnaaqqullugu ikiortassavaa. (Matiusi 4:4) Taamaaliorsinnaavoq nulianilu qinoqatigiittarnikkut Biibilimillu atuaqatigiittarnikkut. Uiusoq nuliaminik taamatut pinnittartoq Jehovamut attaveqarluartarpoq. – Petrusimit 1. 3:7 atuarsiuk.
2. Nuliaasut Biibilimi qanoq siunnersorneqarpat?
Biibilimi allassimavoq ‘nuliaasup uini ataqqingaassagaa’. (Efesossimiut 5:33) Taamaaliorsinnaavoq uimi pissusiisa nuannersut ilaquttaminillu pilersuiumalluni ilungersornerata qujamasuutigisarnerisigut. Uini arlaannik aalajangiigaangat tamanna ataqqillugu tapersersortassavaa. Aamma uini Nalunaajaasuunngikkaluarpalluunniit oqaloqatigigaangamiuk allanulluunniit eqqartoraangamiuk inussiarnersumik oqaluttarsinnaavoq.
3. Qanoq aappariilluartoqarsinnaava?
Biibilimi allassimavoq uiusoq nuliaasorlu ‘ataasiulissasut’. (Matiusi 19:5) Qanoq taamaattuarsinnaappat? Sapinngisaminnik asaqatigiittuartariaqarput. Taamaaliorsinnaappullu peqatigiittarnikkut aamma asannittumik ammasumillu misigissutsiminnik eqqarsaatiminnillu aapparminnut oqaluttuartarnermikkut. Aappartik, Jehova eqqaassanngikkaanni, inuunerminni pingaarnerpaatippaat. Soorunamilu inummut allamut naleqqutinngitsumik qanippallaartumik attaveqarnaveersaartarput.
ITISILIINEQ
Aappariilluarumallusi najoqqutassiat Biibilimeersut suut iluaqutigisinnaanerlugit paasiniaruk.
4. Uiususi – nuliasi asallugillu isumagilluartarsigit
Biibilimi allassimavoq ‘uiusut nuliatik timimittut asasariaqaraat’. (Efesossimiut 5:28, 29) Tamanna qanoq paasisariaqarpa? VIDEO takusiuk apeqqullu tulliuttoq eqqartorlugu.
-
Uiusup nuliaminik asanninnini isumassuininilu ilaatigut qanoq ersersissinnaavaa?
Kolossimiut 3:12 atuarsiuk apeqqullu una eqqartorlugu:
-
Uiusoq allassimaffimmi eqqaaneqartutut nuliaminut qanoq pissuseqarsinnaava?
5. Nuliaasusi – uisi asallugillu ataqqisigit
Biibilimi nuliaasoq peqquneqarpoq uini ataqqissagaa, Jehovamut kiffartortuunngikkaluarpalluunniit. Petrusimit 1. 3:1, 2 atuarsigit apeqqutillu uku eqqartorlugit:
-
Nalunaajaasuunngitsumik ueqaruit kissaatigissagunarpat Jehovamut kiffartortunngornissaa. Suna kinguneqarluarnerpaassasoraajuk – uinnut oqaluussiuarneq imaluunniit pissuserinneq ataqqinnittuunerlu? Sooq?
Uiusoq nuliaasorlu ajunngitsunik aalajangeeqatigiissinnaasarput. Ilaannikkulli nuliaasup uini isumaqatigineq ajorpaa. Taamaakkuni isummani uiminut ataqqinnilluni annissinnaavaa, eqqaamasariaqarpaali uini ilaqutariinnut pitsaanerpaamik aalajangiisussatut Jehovamit akisussaaffilerneqarsimasoq. Taamaattumik uimi aalajangigaa isumaqatiginngikkaluaruniulluunniit tapersersoruniuk ilaqutariinniittut tamarmik pilluassapput. Petrusimit 1. 3:3-5 atuarsigit apeqqullu una eqqartorlugu:
-
Nuliaasup uini ataqqigaangagu Jehova qanoq misigisarpa?
6. Aappariilluaqqilersinnaavusi
Aappariit tamarmik naammalluinnanngitsuupput. Taamaattumik ajornartorsiuteqaleraangat aappariit suleqatigiillutik aaqqiiniartariaqartarput. VIDEO takusiuk apeqqutillu tulliuttut eqqartorlugit.
-
Aappariit asaqatigiikkunnaariartornerat qanoq erserpa?
-
Qanoq aappariilluaqqilerpat?
Korintimiunut 1. 10:24 aamma Kolossimiut 3:13 atuarsigit. Allassimaffiit ataasiakkaarlugit atuariarlugit apeqqut una eqqartorsiuk:
-
Siunnersuutip maleruarneratigut qanoq aappariilluartoqarsinnaava?
Biibilimi allassimavoq ataqqeqatigiissasugut inussiarnerfigeqatigiissasugullu. Romamiut 12:10 atuarsiuk apeqqutillu uku eqqartorlugit:
-
Uiusut nuliaasullu aatsaat aapparminnit ataqqineqarunik taanna ataqqinnittuliorfigissavaat? Sooq taama isumaqarpit?
OQARTOQARTARPOQ: “Aapparalu immitsinnut ungasillisimavugut.”
-
Iluaqutigisinnaasaa Biibilimeersoq suna oqaluttuarerusuppiuk?
EQIKKAANEQ
Uiusoq nuliaasorlu asaqatigiikkunik, ataqqeqatigiikkunik najoqqutassiallu Biibilimeersut maleruarunikkit pilluarsinnaassapput.
Uteqqiineq
-
Aappariinnerminni pilluarnerujumallutik uiusoq susinnaava?
-
Aappariinnerminni pilluarnerujumallutik nuliaasoq susinnaava?
-
Aappariinnissinni najoqqutassiaq Biibilimeersoq suna iluaqutigisinnaavisiuk?
NAMMINEQ MISISSUGASSATIT
Ilaqutariittut pilluarsinnaajumallusi siunnersuutit atuakkit.
Guutip siunnersuutai aappariinnermi qanoq iluaqutaasinnaasut musikvideumi takuuk.
Uiusup ittuuneranik ataqqinninneq qanoq paasisariaqartoq misissoruk.
Aappariit aamma avikkaluarlutik ajornartorsiutitik qanoq qaangerpaat?
Soqutigisinnaasatit allat
APEQQUTIGINEQARTARTUT
Jehovap Nalunaajaasuisa Biibilimik pikkorissartitsinerat suugami?
Jehovap Nalunaajaasuisa Biibilimik pikkorissartitsinerat akeqanngilaq, Biibilimillu nutsigaq sunaluunniit atorsinnaavat. Aamma ilaquttatit ikinngutitilluunniit pikkorissarnermut ilaserisinnaavatit.
