មេរៀនទី៤៩

តើក្រុមគ្រួសាររបស់អ្នកអាចមានសុភមង្គលយ៉ាងដូចម្ដេច? (ភាគទី១)

លេង

ជាធម្មតាប្ដីប្រពន្ធថ្មីថ្មោងសង្ឃឹមថា សុភមង្គលដែលពួកគេមាននៅថ្ងៃរៀបការ នឹងស្ថិតស្ថេរជារៀងរហូត។ សេចក្ដីសង្ឃឹមនោះពិតជាអាចកើតឡើងបាន។ គ្រិស្តសាសនិកដែលបានរៀបការអស់ជាច្រើនឆ្នាំ និងដែលបានខំព្យាយាមធ្វើតាមយោបល់ពីគម្ពីរទទួលស្គាល់ថា ពួកគេអាចមានសុភមង្គលជារៀងរហូតបាន។

១. តើគម្ពីរមានយោបល់អ្វីសម្រាប់ប្ដី?

ព្រះយេហូវ៉ាបានឲ្យប្ដីធ្វើជាប្រមុខក្រុមគ្រួសារ។ (សូមអាន អេភេសូរ ៥:២៣) ព្រះយេហូវ៉ាតម្រូវឲ្យប្ដីធ្វើការសម្រេចចិត្តដែលនឹងផ្ដល់ប្រយោជន៍ដល់ក្រុមគ្រួសារ។ គម្ពីរឲ្យយោបល់ប្ដីថា៖ «ចូរស្រឡាញ់ប្រពន្ធជាដរាប»។ (អេភេសូរ ៥:២៥) តើនេះមានន័យយ៉ាងណា? ប្ដីដែលស្រឡាញ់ប្រពន្ធតែងតែប្រព្រឹត្តដោយសប្បុរសចំពោះនាងទាំងនៅផ្ទះទាំងនៅមុខអ្នកឯទៀត។ គាត់ការពារនាងឲ្យមានសុវត្ថិភាព ហើយខំអស់ពីសមត្ថភាពក្នុងការបំពេញសេចក្ដីត្រូវការរបស់នាងខាងផ្លូវកាយនិងផ្លូវចិត្ត។ (ធីម៉ូថេទី១ ៥:៨) សំខាន់បំផុត គាត់ជួយនាងឲ្យមានចំណងមិត្តភាពជិតស្និទ្ធជាមួយនឹងព្រះយេហូវ៉ា។ (ម៉ាថាយ ៤:៤) ជាឧទាហរណ៍ ប្ដីអាចអធិដ្ឋាននិងអានគម្ពីរជាមួយនឹងប្រពន្ធ។ ពេលប្ដីស្រឡាញ់និងថែរក្សាប្រពន្ធ នោះគាត់ពង្រឹងចំណងមិត្តភាពរបស់គាត់ជាមួយនឹងព្រះយេហូវ៉ា។—សូមអាន ពេត្រុសទី១ ៣:៧

២. តើគម្ពីរមានយោបល់អ្វីសម្រាប់ប្រពន្ធ?

បណ្ដាំរបស់ព្រះចែងថា ប្រពន្ធ«ត្រូវគោរពប្ដីយ៉ាងជ្រាលជ្រៅ»។ (អេភេសូរ ៥:៣៣) តើនាងអាចធ្វើដូច្នេះយ៉ាងដូចម្ដេច? នាងអាចគិតអំពីគុណសម្បត្តិរបស់ប្ដី និងអ្វីទាំងអស់ដែលប្ដីព្យាយាមធ្វើដើម្បីថែរក្សានាងនិងកូនៗ។ ម្យ៉ាងទៀត នាងអាចបង្ហាញការគោរពចំពោះប្ដីដោយគាំទ្រការសម្រេចចិត្តរបស់គាត់ និងដោយនិយាយយ៉ាងសប្បុរសទៅកាន់គាត់ ហើយនិយាយល្អអំពីគាត់ ទោះជាគាត់មិនមែនជាអ្នកគោរពប្រណិប័តន៍ព្រះយេហូវ៉ាក៏ដោយ។

៣. តើប្ដីប្រពន្ធអាចពង្រឹងចំណងអាពាហ៍ពិពាហ៍របស់ពួកគេតាមរបៀបណា?

គម្ពីរចែងអំពីគូអាពាហ៍ពិពាហ៍ថា៖ «ពួកគេទាំងពីរនាក់នឹងទៅជាសាច់ឈាមតែមួយ»។ (ម៉ាថាយ ១៩:៥) នេះមានន័យថាពួកគេត្រូវយកឈ្នះអ្វីក៏ដោយដែលអាចធ្វើឲ្យពួកគេមិនសូវស្រឡាញ់គ្នាដូចពីមុន។ ពួកគេអាចពង្រឹងចំណងអាពាហ៍ពិពាហ៍របស់ពួកគេ ដោយចំណាយពេលជាមួយគ្នាជាទៀងទាត់ និងដោយប្រាប់អំពីគំនិតនិងអារម្មណ៍ចំពោះគ្នាទៅវិញទៅមកយ៉ាងស្មោះអស់ពីចិត្ត។ ក្រៅពីព្រះយេហូវ៉ា ពួកគេមិនឲ្យអ្នកណាឬអ្វីក៏ដោយសំខាន់ជាងគូរបស់ពួកគេទេ។ ជាពិសេស ពួកគេប្រុងប្រយ័ត្នដោយមិនមានទំនាក់ទំនងជិតស្និទ្ធហួសហេតុពេកជាមួយនឹងអ្នកមិនមែនជាគូរបស់ខ្លួន។

បង្កើនចំណេះ

សូមមើលគោលការណ៍គម្ពីរដែលអាចជួយពង្រឹងចំណងអាពាហ៍ពិពាហ៍របស់អ្នក។

៤. ប្ដីទាំងឡាយ ចូរស្រឡាញ់និងថែរក្សាប្រពន្ធ

គម្ពីរចែងថា៖ «ប្ដីត្រូវស្រឡាញ់ប្រពន្ធ ដូចស្រឡាញ់រូបកាយរបស់ខ្លួន»។ (អេភេសូរ ៥:២៨, ២៩) តើនេះមានន័យយ៉ាងណា? លេងវីដេអូ រួចពិភាក្សាសំណួរដូចតទៅ៖

វីដេអូ: ប្ដីទាំងឡាយ ចូរស្រឡាញ់ប្រពន្ធដូចស្រឡាញ់រូបកាយរបស់អ្នក (៩:៥៣)

តើប្ដីអាចបង្ហាញថាគាត់ស្រឡាញ់និងថែរក្សាប្រពន្ធតាមវិធីណាខ្លះ?

សូមអាន កូឡុស ៣:១២ រួចពិភាក្សាសំណួរនេះ៖

តើប្ដីអាចបង្ហាញគុណសម្បត្តិទាំងនេះក្នុងអាពាហ៍ពិពាហ៍របស់គាត់យ៉ាងដូចម្ដេច?

៥. ប្រពន្ធទាំងឡាយ ចូរស្រឡាញ់និងគោរពប្ដី

គម្ពីរលើកទឹកចិត្តប្រពន្ធឲ្យគោរពប្ដី ទោះជាគាត់ជាអ្នកបម្រើព្រះយេហូវ៉ាឬមិនមែនក៏ដោយ។ សូមអាន ពេត្រុសទី១ ៣:១, ២ រួចពិភាក្សាសំណួរដូចតទៅ៖

បើអ្នកមានប្ដីដែលមិនមែនជាអ្នកជឿព្រះយេហូវ៉ា អ្នកច្បាស់ជាចង់ឲ្យគាត់ទៅជាអ្នកគោរពប្រណិប័តន៍លោកដូចអ្នកដែរ។ ប៉ុន្តែ រវាងការនិយាយប្រាប់ប្ដីឥតឈប់អំពីព្រះ និងការប្រព្រឹត្តល្អដោយបង្ហាញការគោរពចំពោះប្ដី តើអ្នកគិតថាវិធីមួយណាមានប្រសិទ្ធភាពជាង? ហេតុអ្វី?

ប្ដីនិងប្រពន្ធអាចសហការគ្នាដើម្បីធ្វើការសម្រេចចិត្តល្អ។ ប៉ុន្តែ ជួនកាលប្រពន្ធប្រហែលជាមិនយល់ស្របជាមួយនឹងប្ដីទេ។ ទោះជាយ៉ាងនោះក្ដី នាងប្រហែលជាប្រាប់គំនិតរបស់នាងដោយស្លូតបូតនិងដោយការគោរព តែនាងត្រូវទទួលស្គាល់ថាព្រះយេហូវ៉ាឲ្យភារកិច្ចដល់ប្ដីជាអ្នកសម្រេចចិត្តថាអ្វីល្អបំផុតសម្រាប់ក្រុមគ្រួសារ។ នាងត្រូវខំអស់ពីសមត្ថភាពក្នុងការគាំទ្រការសម្រេចចិត្តរបស់ប្ដី។ ពេលនាងធ្វើដូច្នេះ នាងជួយឲ្យក្រុមគ្រួសារទាំងមូលមានសុភមង្គល។ សូមអាន ពេត្រុសទី១ ៣:៣-៥ រួចពិភាក្សាសំណួរនេះ៖

ពេលប្រពន្ធបង្ហាញការគោរពចំពោះប្ដី តើព្រះយេហូវ៉ាមានអារម្មណ៍យ៉ាងណា?

៦. អ្នកអាចដោះស្រាយបញ្ហាក្នុងចំណងអាពាហ៍ពិពាហ៍ដោយជោគជ័យ

គ្មានចំណងអាពាហ៍ពិពាហ៍ណាល្អឥតខ្ចោះទេ។ ម្ល៉ោះហើយ គូអាពាហ៍ពិពាហ៍ត្រូវសហការគ្នាដើម្បីដោះស្រាយការពិបាកផ្សេងៗ។ លេងវីដេអូ រួចពិភាក្សាសំណួរដូចតទៅ៖

វីដេអូ: របៀបពង្រឹងចំណងអាពាហ៍ពិពាហ៍ (៥:៤៤)

ក្នុងវីដេអូ តើអ្វីខ្លះបង្ហាញថាប្ដីប្រពន្ធមិនសូវជិតស្និទ្ធគ្នាដូចពីមុន?
តើពួកគេបានធ្វើអ្វីខ្លះដើម្បីពង្រឹងចំណងអាពាហ៍ពិពាហ៍របស់ពួកគេ?

សូមអាន កូរិនថូសទី១ ១០:២៤ និងកូឡុស ៣:១៣។ ក្រោយពីអានខគម្ពីរនីមួយៗ សូមពិភាក្សាសំណួរនេះ៖

តើការធ្វើតាមយោបល់នេះ អាចពង្រឹងចំណងអាពាហ៍ពិពាហ៍យ៉ាងដូចម្ដេច?

គម្ពីរប្រាប់ថា យើងគួរលើកកិត្តិយសគ្នាទៅវិញទៅមក។ ការលើកកិត្តិយសរួមបញ្ចូលការប្រព្រឹត្តដោយសប្បុរស និងដោយការគោរពចំពោះអ្នកឯទៀត។ សូមអាន រ៉ូម ១២:១០ រួចពិភាក្សាសំណួរដូចតទៅ៖

តើប្ដីឬប្រពន្ធគួរចាំឲ្យគូរបស់ខ្លួនលើកកិត្តិយសខ្លួនមុនឬទេ? ហេតុអ្វី?

មនុស្សខ្លះនិយាយថា៖ «ខ្ញុំនិងគូរបស់ខ្ញុំមិនសូវជិតស្និទ្ធគ្នាដូចពីមុនទេ»។

តើអ្នកនឹងពន្យល់យ៉ាងណាថាគម្ពីរអាចជួយពួកគេបាន?

សេចក្ដីសង្ខេប

ប្ដីនិងប្រពន្ធអាចមានសុភមង្គលបាន បើពួកគេគោរពនិងស្រឡាញ់គ្នាទៅវិញទៅមក ហើយធ្វើតាមគោលការណ៍ក្នុងគម្ពីរ។

រៀនសាឡើងវិញ

តើតាមរបៀបណាប្ដីអាចជួយឲ្យចំណងអាពាហ៍ពិពាហ៍របស់គាត់មានសុភមង្គល?
តើតាមរបៀបណាប្រពន្ធអាចជួយឲ្យចំណងអាពាហ៍ពិពាហ៍របស់គាត់មានសុភមង្គល?
បើអ្នករៀបការហើយ តើគោលការណ៍មួយណាក្នុងគម្ពីរដែលអាចជួយពង្រឹងចំណងអាពាហ៍ពិពាហ៍របស់អ្នក?

រៀនចប់នៅថ្ងៃទី:

គោលដៅ

បើអ្នករៀបការហើយ សូមពិគ្រោះជាមួយនឹងគូរបស់អ្នកអំពីអត្ថបទណាមួយក្នុង jw.org ដែលទាក់ទងនឹងអាពាហ៍ពិពាហ៍។

គោលដៅផ្សេងទៀត:

Your other goal