LUFUNJISHO 49
Kisemi Kyenu Kyafwainwa Kwikala Byepi Bulongo?—Lubaji 1
Bantu babena kwisongola balanguluka’mba lusekelo lo baji nalo pa juba ja masongola lukatwajijila myaka ne myaka. Ibyo lwafwainwa kutwajijila. Bena Kilishitu baikala mu masongola myaka yavula kabiji bebikako kwingijisha byaamba Baibolo baswa kuba’mba kino kyakonsheka.
1. Baibolo wakambizha banabalume kuba byepi?
Yehoba watongola mwanamulume kwikala mutwe wa kisemi. (Tangai Efisesa 5:23.) Yehoba ukeba mwanamulume kufuukulanga bintu byafwainwa kukwasha kisemi kyanji. Baibolo wakambizha banabalume amba: “Temwainga bakazhi benu.” (Efisesa 5:25) Akino kibena kulumbulula ka? Mwanamulume uji na butemwe umwesha kifyele mukazhanji pa nzubo nangwa inge uji na bantu bangi. Ulama bulongo mukazhanji ne kumulengela kwikala na lusekelo kabiji umupa bintu byo akeba ku mubiji ne kumukwasha kukasuluka mu milanguluko. (1 Timoti 5:8) Kyakilamo kunema ukwasha mukazhanji kukosesha bulunda bwanji ne Yehoba. (Mateo 4:4) Mwanamulume watemwa mukazhanji ulomba ne kutangila nanji pamo Baibolo. Inge mwanamulume saka alama bulongo mukazhanji, ukatwajijila kwikala na bulunda bwakosa ne Yehoba.—Tangai 1 Petelo 3:7.
2. Baibolo wakambizha banabakazhi kuba byepi?
Mambo a Lesa aamba’mba mwanamukazhi “wafwainwa kwikala na mushingi mukatampe ku mwatawanji.” (Efisesa 5:33) Mwanamukazhi wafwainwa kuba byepi kino? Wafwainwa kulangulukanga pa byubilo byawama biji na mwatawanji ne byo ebikako kumulama bulongo ne baana banji pamo. Kabiji umwesha’mba uji na mushingi inge ke atundaike bintu bifuukula mwatawanji ne kwisambanga mu mushingi ne kwambanga byawama pe aye nangwa kya kuba mwatawanji kechi wingijila Yehoba ne.
3. Bamulume ne mukazhi bafwainwa kukosesha byepi masongola abo?
Baibolo waamba pa besongola amba: “Abo bakekala ke mubiji umo.” (Mateo 19:5) Onkao mambo, bafwainwa kuchinuzhuka kuba bintu byafwainwa kupwisha butemwe bwabo. Bafwainwa kukoseshatu masongola abo inge kimye kyonse saka bekala pamo ne kwisambanga saka bekasulukila ne kwibuulanga bintu byonse biji ku muchima. Yehoba ye wafwainwa kwikala mutanshi mu masongola abo. Kepo palondela mulume ne mukazhi. Bamulume ne mukazhi kechi bafwainwa kusengulanga na muntu wabula mwinakwabo ne.
FUNJILAIPO BIKWABO
Monai mafunde aji mu Baibolo afwainwa kukosesha masongola enu.
4. Anweba banabalume temwai bakazhi benu ne kwibalamanga bulongo
Baibolo waamba’mba: “Banabalume bafwainwa kutemwa bakazhi babo byonka byo batemwa mibiji yabo.” (Efisesa 5:28, 29) Abino byambo byalumbulula ka? Tambai VIDYO, ne kwisamba buno bwipuzho.
-
Mu ñanyi mashinda mwanamulume mo afwainwa kumweshesha’mba watemwa mukazhanji ne kumulama bulongo?
Tangai Kolose 3:12, ne kwisamba buno bwipuzho:
-
Mwanamulume wafwainwa kumwesha byepi byubilo byo baambapo mu kino kinembelo mu masongola anji?
5. Anweba banabakazhi temwai ne kupanga mushingi bamwatawenu
Baibolo watundaika banabakazhi kupa mushingi bamwatawabo nangwa kya kuba bengijila Yehoba nangwa ne. Tangai 1 Petelo 3:1, 2, ne kwisamba ano mepuzho:
-
Inge mwasongolwa ku mwanamulume wabula kwitabila mukebesha bingi kuba’mba naye apopwelenga Yehoba. Ñanyi jishinda jawama kumukwashishamo? Nanchi kumusapwilanga kimye kyonse kwafwainwa kumukwasha nyi? Abya kyafwainwa kumukwasha inge mwaikala mwanamukazhi wawama, wa lusa ne mushingi nyi? Mambo ka o mwaambila byobyo?
Bamulume ne mukazhi bafwainwa kufuukwilanga bintu byonse pamo. Nangwa byonkabyo, bimye bimo mwanamukazhi kechi wakonsha kutemwa byafuukulapo mwatawanji ne. Inge kyaikala bino, mwanamukazhi wafwainwa kubuula mwatawanji mu mushingi saka atekanya. Pano bino, mwanamukazhi wafwainwa kuyuka’mba Yehoba wapa mwanamulume luusa lwa kufuukula bintu byawama byafwainwa kukwasha kisemi kyanji. Wafwainwa kutundaika bintu byafuukula mwatawanji. Inge mwanamukazhi ke obe bino, ukakwasha kisemi kyonse kwikala na lusekelo. Tangai 1 Petelo 3:3-5, ne kwisamba buno bwipuzho:
-
Yehoba umvwa byepi ku muchima inge mwanamukazhi ke ape mushingi mwatawanji?
6. Mwakonsha kupwisha makatazho mu masongola enu
Bamulume ne mukazhi bonse babiji kafwako waoloka ne. Onkao mambo, bamulume ne mukazhi bafwainwa kwingijila pamo kupwisha makatazho a mu masongola abo. Tambai VIDYO, ne kwisamba ano mepuzho.
-
Mu vidyo ye mwatamba, ñanyi bintu byamwesha’mba bano bamulume ne mukazhi butemwe bwabo bwayilenga na kupwa?
-
Ñanyi bintu byo baubile pa kuba’mba bakoseshe jibiji masongola abo?
Tangai 1 Kolinda 10:24 ne Kolose 3:13. Inge mwatanga kila kinembelo, isambai buno bwipuzho:
-
Kwingijisha bishinka biji mu bino byepelo kwafwainwa kukosesha byepi masongola?
Baibolo waamba’mba twafwainwa kwinemeka atweba bene na bene. Kunemeka muntu kulumbulula kumubila lusa ne kumupa mushingi. Tangai Loma 12:10, ne kwisamba ano mepuzho:
-
Nanchi bamulume ne mukazhi bafwainwa kupembelelanga’mba kana mukwabo atendekelepo kumupa mushingi nyi? Mwakumbwila ka byobyo?
BANTU BAMO BAMBA’MBA: “Amiwa ne benakwami kechi twitemwa byo twitemenwe kala ne.”
-
Mwakonsha kwibalumbulwila byepi amba Baibolo wafwainwa kwibakwasha kutwajijila kwitemwa?
ÑANYI BISHINKA BYO MWAFUNDA?
Bamulume ne mukazhi bafwainwa kwikala na lusekelo mu masongola inge betemwa, kwipa mushingi ne kwingijishanga mafunde a mu Baibolo.
Mepuzho a kupitulukamo
-
Mwanamulume wafwainwa kuba byepi pa kuba’mba bekale bulongo mu masongola abo?
-
Mwanamukazhi wafwainwa kuba byepi pa kuba’mba bekale bulongo mu masongola abo?
-
Inge mwasongola nangwa kusongolwa, ñanyi mafunde a mu Baibolo afwainwa kwimukwasha kukosesha masongola enu?
KEBAI BISHINKA BIKWABO
Funjilaiko ku ano mashinda awama afwainwa kwimukwasha kwikala bulongo mu kisemi kyenu.
Tambai uno vidyo wa nyimbo ubena kwamba pa bintu byawama bifumamo mu kwingijisha mafunde a Lesa mu masongola enu.
Tangai muyuke byo kilumbulula kunekenena bamwatawenu kuba’mba bo baji na mwingilo wa kutangijila kisemi.
“Anweba Banabakazhi, Mambo ka o Mwafwainwa Kunekenena Bumutwe?” (Kyamba kya Usopa, May 15, 2010)
Monai bintu byaamba Baibolo pa masongola byo byafwainwa kukwasha bamulume ne mukazhi.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
