Bankuelani ya yimpa kekanisaka ti kiese yina bakevuandaka na yau na kilumbu na bau ya dikuela kemanisa ve. Yalenda salama mpe mutindu yina. Baklisto yina mekuelanaka ntama mpe yina kesalaka ngolo samu na kusadila malongi ya Biblia mezaba ti yalenda salama.

1. Yinki malongi Biblia mepesa na babakala?

Yehova ponaka bakala samu yandi vuanda mfumu ya dibuta. (Tanga Baefezo 5:23.) Yehova kena kulomba na bakala, yandi baka banzengolo yina kenatina dibuta mambote. Biblia melomba na babakala: ‘Beno tatamana kuzola banketo na beno.’ (Baefezo 5:25) Yinki yazola monisa? Bakala ya nzola kesadilaka nketo na yandi mambu na mutindu ya mbote, yavuanda na kati ya yinzo to na kisika ya bantu mingi. Yandi ketaninaka nketo na yandi na mambu ya yimbi mpe yandi kesalaka ngolo samu na kukokisa bansatu na yandi ya kinsuni mpe ya makanisi. (1 Timoteo 5:8) Yina meluta mfunu, yandi kesalaka nionso samu na kukokisa bansatu ya kimpeve ya nketo na yandi. (Matayo 4:4) Na kifuani, yandi lenda sambila mpe kutanga Biblia kintuadi na nketo na yandi. Kana bakala kena kutanina nketo na yandi na nzola nionso, yandi ketanina kinkundi na yandi na Yehova.—Tanga 1 Piere 3:7.

2. Yinki malongi Biblia mepesa na banketo?

Mpova ya Nzambi metuba ti nketo ‘fueti vuanda na luzitu ya ngolo na bakala na yandi.’ (Baefezo 5:33) Yinki mutindu yandi lenda sala yau? Nketo lenda kanisa bikadulu ya mbote ya bakala na yandi mpe bangolo yina yandi kena kusala samu na kukokisa bansatu na yandi mpe ya bana na bau. Yandi lenda monisa diaka luzitu na kupesaka maboko na banzengolo yina bakala na yandi kebakaka mpe na kutubaka na kumikitisa nionso na ntadisi na yandi mpe samu na diambu metadila yandi, ata kana bakala na yandi kele kisadi ya Yehova ve.

3. Yinki mutindu bankuelani lenda kumisa ngolo dikuela na bau?

Biblia metuba samu na bankuelani: ‘Bau zole kevuanda nsuni mosi.’ (Matayo 19:5) Yazola tuba ti bafueti nuanisa mabanza ya kusosa kusala mambu muntu na muntu na mutindu na yandi. Bakenunga yau na kulutisaka ntangu kintuadi mbala na mbala mpe na kukabulaka na puelele mpe na nzola nionso mabanza mpe banguilu na bau. Bakebikaka kima to muntu mosi ve—katula kaka Yehova—vuanda mfunu kuluta nkuelani na bau. Bakesalaka keba na kukuna ve kinkundi ya yimbi na bakala to na nketo yankaka.

 KOTA NA MPINDA

4. Babakala—beno zola mpe beno tanina banketo na beno

5. Banketo—beno zola mpe beno zitisa babakala na beno

Biblia kena kukindisa nketo na kuzitisaka bakala na yandi yavuanda yandi kele kisadi ya Yehova to ve. Tanga 1 Piere 3:1, 2, mpe na manima tadila biuvu yayi:

• Kana nge kele na bakala yina kesambilaka Yehova ve, kondua ntembe nge kevuandaka na nsatu ti yandi sambila Yehova. Samu na nge, yinki diambu meluta mbote ya kusala—kusamunina yandi ntangu nionso to kumonisila yandi bikadulu ya mbote mpe kuzitisa yandi? Samu na yinki?

Babakala mpe banketo lenda baka banzengolo kintuadi. Kasi, na bantangu yankaka nketo lenda sepela ve na nzengolo ya bakala na yandi. Yandi lenda monisa mabanza na yandi na ndembama  mpe na luzitu nionso, kasi yandi fueti zaba ti Yehova pesaka bakala kiyekua ya kubaka banzengolo samu na mambote ya dibuta. Yandi fueti sala ngolo na kupesa maboko na nzengolo ya bakala na yandi. Na kusalaka mutindu yina, yandi ketunga kiese na kati ya yinzo na bau. Tanga 1 Piere 3:3-5, mpe na manima tadila kiuvu yayi:

• Yinki mutindu Yehova kekukimonaka kana nketo kena monisa luzitu na bakala na yandi?

6. Nge lenda nunga bampasi yina lenda bima na dikuela na nge

 BUNKUFI

Bakala mpe nketo lenda vuanda na kiese kana bakena kuzolana, kupesana luzitu, mpe kusadila bansikudukusu ya Biblia.

Mvutukulu

• Yinki mutindu bakala lenda pesa maboko samu dikuela vuanda na kiese?

• Yinki mutindu nketo lenda pesa maboko samu dikuela vuanda na kiese?

• Kana nge kele ya kukuela, yinki nsikudukusu ya Biblia lenda sadisa samu na kukumisa dikuela na nge ngolo?