Vava yakala yo nkento bekazalanga, bevingilanga vo e kiese kina bamona muna lumbu kia lukazalu lwau kiakwamanana yakwele mvu. Ediadi dilenda vangama. Akristu ana bakazala se kolo ye bevanganga ngolo za lemvokela malongi ma Bibila bazeye wo vo ediadi dialudi.

1. Nkia malongi Bibila kivananga kwa akala?

Yave wavana kiyekwa kia twadisa e nzo kwa yakala. (Tanga Efeso 5:23.) Yave ozolele vo e nzengo o yakala kebakanga zatwasanga e nluta kwa esi nzo andi yawonso. Bibila kivovesanga akala vo: “Nuzolanga akazi eno.” (Efeso 5:25) Ediadi aweyi disongele? O yakala dianzodi, osonganga ngemba kwa nkaz’andi diakala muna nzo yovo vana fulu kia ndonga. Okuntaninanga muna vonza ye ovanvanga mawonso muna lungisa e nsatu zandi za kinitu ye mambu mankaka kavuidi o mfunu. (1 Timoteo 5:8) Vana ntandu, okunsadisanga mu kala ye ngwizani ambote yo Yave. (Matai 4:4) Muna bonga e nona, osambanga yo tanga Bibila kumosi yo nkaz’andi. Vava yakala dianzodi ketokanenanga e wete dia nkento andi, osiamisanga kikundi kiandi yo Yave.—Tanga 1 Petelo 3:7.

2. Nkia malongi e Bibila kivananga kwa akento?

Diambu dia Nzambi divovanga vo: “Nkento kafwete toma zitisanga yakala diandi.” (Efeso 5:33) Aweyi o nkento kalenda wo vangila? Muna yindulanga e fu yambote ya nkaz’andi yo vanga ngolo za toma kunlunga-lunga kumosi yo wan’au. Olenda mpe zitisa nkaz’andi muna yikamanga e nzengo zandi yo songa ngemba vava kemokenanga yandi yovo vava kevovelanga yakala diandi kwa wantu ankaka, kana nkutu vo ke sambilanga Yave ko.

3. Aweyi akazi balenda siamisina longo lwau?

Bibila kivovanga mu kuma kia akazi vo: “Yau awole bekala se nitu mosi.” (Matai 19:5) Ediadi disongele vo, akazi bafwete vanganga e ngolo mu venga mambu malenda kubafila mu vambana. Balenda wo vanga muna viokesanga e ntangwa kumosi yo songaziananga e ngindu muna mpila yambote. Katula kaka Yave, ke bafwete yambula ko vo konso lekwa yovo muntu ankaka, kasunda o mfunu muna zingu kiau avo ke nkaz’au ko. Akazi bafwete venga fu kia songanga e nzol’a kimakangu kwa muntu ankaka.

 ZAYA DIAKA MANKAKA

4. Akala nuzolanga yo toma lunga-lunga akazi eno

5. Akento nuzolanga yo zitisa akazi eno

Bibila kikasakesanga nkento vo kazitisanga nkaz’andi kana nkutu vo ke sambilanga Yave ko. Tanga 1 Petelo 3:1, 2, i bosi, vana e mvutu za yuvu eyi:

• Avo nkaz’aku ke sambilanga Yave ko, ka lukatikisu ko vo ozolele vo kasambila Yave. Aweyi olenda kunsadisila? Nga ofwete kunsilanga umbangi ntangwa zawonso yovo ofwete songanga fu yambote yo kunzitisa? Ekuma?

O yakala yo nkento balenda baka nzengo zambote entwadi. Kansi, ezak’e ntangwa, dilenda kala vo nkento katambulwidi nzengo za yakala diandi ko. Avo diadi divangamene, o nkento olenda songa ngindu zandi kwa yakala kuna ngemba ye luzitu; kansi kafwete zaya vo Yave wavana kwa yakala e mbebe yabaka e nzengo muna wete dia esi nzo. O nkento kafwete vanga mawonso muna yikama nzengo za nkaz’andi. Avo ovangidi wo, osadisa kimana awonso muna nzo bakala ye kiese. Tanga 1 Petelo 3:3-5, i bosi, vana e mvutu za kiuvu eki:

• Aweyi Yave kemonanga vava nkento kezitisanga yakala diandi?

 6. Olenda sunda mambu mampasi muna longo

 MAMBU MASINA MA LONGI DIADI

Yakala yo nkento balenda kala ye kiese vava betoma zolananga, zitisa muntu yo nkwandi yo sadila nkanikinu mia Bibila.

Nkia Mambu Olongokele?

• Adieyi o yakala kafwete vanga kimana longo lwandi lwakala lwakiese?

• Adieyi o nkento kafwete vanga kimana longo lwandi lwakala lwakiese?

• Avo wakazala, nkia nkanikinu wa Bibila ulenda siamisa longo lwaku?