MURU 49
Munaire Avi Ira Banja Linyu Likale Losangalala? — Mbali Yowambeela
Athu kakeda telana wene, kanoembekezela ira kanerenga kala mosangalala monga mwemo vyaliliathu vadambo la ukwatiwa. Moi vyevi pivyowandeya. Akiristu anayo kakalile m’banja wathawi indendayi noesaesa arela malangizo a m’Baibulo kanoiziwa ira vyevi pivyowandeya.
1. Kodi Baibulo linapeleka malangizo woi avi wa alombwana otela?
Yehova oova-a mulombwana otela udindo okala muru wa banja laye. (Welengani Aifeso 5:23.) Eeno Yehova unoembekezela ira mulombwana asakulenga vyongo vyevyo vinakami-e banja laye. Baibulo linolangiza alombwana otela ira: “Dowananive omeluwana a-iyaninyu.” (Aifeso 5:25) Kodi vyevi vinatapulela n’ni? Mulombwana wachikodi unoira vyongo momuwomela murima iyanae kakala waekiwa kapena kakala na athu amo-iwa. Unoonechecha ira iyanae ngotitiedeya koma teto unosangalala, moi unomuva-a vyongo vyetene vyevyo unafuneela liye. (1 Timoteyu 5:8) Koma yofuneya vinjinji choi unokami-a iyanae kala vausamwali olimba na Yehova. (Mateyu 4:4) Mofwanafwani-a, unopepela teto welenga Baibulo limo-i na iyanae. Mulombwana amuwomeluwangana iyanae no musamalela, unokala vausamwali olimba na Yehova. — Welengani 1 Petulo 3:7.
2. Kodi Baibulo linapeleka malangizo woi avi wa a-iyana oteluwa?
Mawu a Mulungu kanaonga ira iyana oteluwa “alemekezenga vinjinji mamunae.” (Aifeso 5:33) Kodi unaire avi vyevi? Unafuneela ganizela makalelo apama anayo mamunae un’na liye koma teto tindi lelo un’na liye vomusamalela teto samalela a-imiwa. Unotonyi-eda teto ira unolemekeza mamunae agwilizananga na vyevyo mamunae usakulile liye, aonganga mwaulemu koma teto aonganga vyongo vyapama vyokuza lombwanoyo ngakale akala ira mamunaeyo kanatumikela Yehova.
3. Kodi athu otelana kanalimbi-e avi banja liwa?
Voonga vya athu otelana Baibulo linaonga ira: “Ambin’layo kanoza kakale thuthu limo-i.” (Mateyu 19:5) Vyevi vinatapulela ira kanofuneela esaesa ira vyetene vyevyo kanawande athu ira chikondiwa chiambeele yeva. Aluwa kanoira vyevi, kaesaesanga thawi detene fwanya thawi yoendela limo-i, wandelana vyam’murimani teto wandelana maganizwiwa momasuwa koma teto mwachikondi. Iyavo Yehova, aluwa kanoona ira mulombwana kapena iyaniwa gofuneya vinjinji kwaranya yongo kapena muthu uliwetene. Koma teto kanoesaesa pewa lemeelana kapena waleda vinjinji na muthu woi kai mamuniwa kapena iyaniwa.
FUNJEDANI VYOWENJEDELEYA
Onani makundo a m’Baibulo anayo kanakami-e ira banja linyu likale lolimba.
4. Alombwana muomeluwengana koma teto samalela pama a-iyaninyu
Baibulo linaonga ira: “Alombwana kawomeluwengana a-iyaniniwa ngati matutwiwa.” (Aifeso 5:28, 29) Kodi vyevi vinatapulela n’ni? Onelani VIDIYO, era eeno tapanyani yofuka yo-arelela.
-
Kodi mulombwana unatonyi-ede avi ira unowomeluwana koma teto samalela iyanae?
Welengani Akolose 3:12, era eeno tapanyani yofuka yo-arelela:
-
Kodi mulombwana unamutonyi-ede avi iyanae makalelo anala?
5. A-iyana muwomeluwengana nolemekeza amamuninyu
Baibulo linolimbi-a a-iyana ira kalemekezenga amamuniwa kaya kanotumikela Yehova kapena katinamutumikela. Akala mamuninyu kanalambela Yehova, kan’nakaikela ira munofuna ira aambeele mutumikela. Welengani 1 Petulo 3:1, 2, era eeno tapanyani vyofuka vyo-arelavi:
-
Kodi ndila yapama yomukami-edela mamuninyu ira aambeele tumikela Yehova, kumulaleela thawi detene kapena mulemekeza vinjinji koma teto kumutonyi-eda makalelo apama? Chifukwa n’ni munaonga eeno?
Vinokala pama vinjinji mulombwana na iyanae kasakulanga vyoira limo-i. Komave thawi dimo-i, iyana unokoza oogwilizana na vyevyo mamunae usakulile liye. Vyera eeno, iyanoyo unafuneela sambaula maganizwaye modeka koma teto mwaulemu. Koma teto unafuneela zindikila ira Yehova oopeleka udindo wa mamunae osakula vyongo vyokuza banja liwa. Eeno unafuneela ira vyetene vyevyo unawade liye, ira vyevyo mulombwanoyo usakulile liye viende pama. Airanga vyevi unokami-eda ira banja laye likalenga mosangalala. Welengani 1 Petulo 3:3-5, era eeno tapanyani yofuka yo-arelela:
-
Kodi Yehova unavwa avi iyana alemekezanga mamunae?
6. Pivyowandeya mali-a mavuto a m’banja linyu
Kavali banja lookaana mavuto. Eeno athu otelana kanafuneela ira vyongo mogwilizana ira kamali-e mavutwiwa. Onelani VIDIYO, era eeno tapanyani vyofuka vyo-arelavi.
-
Muvidiywela, chin’ni inatonyi-eda ira mulombwana na iyanaele koo-iya womeluwana ngati wan’le?
-
Kodi kairile n’ni ira kalimbi-e banja liwa?
Welengani 1 Akorinto 10:24 na Akolose 3:13. Mwawelenga lemba lililetene, tapanyani yofuka yo-arelela:
-
Kodi arela malagizo anala unakami-e avi ira banja likale lolimba?
Baibulo linaonga ira ninafuneela lemekezana. Lemekezana unotangani-avo irelana vyongo mooma murima koma teto mwaulemu. Welengani Aroma 12:10, era eeno tapanyani vyofuka vyo-arelavi:
-
Kodi athu otelana kanafuneela embekezela ira mulombwana kapena iyanae ngunoyo unafuneela ambeela mulemekeza ira naliyene amulemekezenga? Chifukwa n’ni munaonga eeno?
ATHU AMO-IWA KANAONGA IRA: “Banja li-u kalinaenda paama chifukwa kaninagwilizana ngati wan’le.”
-
Kodi munaakami-e avi iziwa ira Baibulo linokoza akami-a ira banja liwa liendenga pama?
VYEVYO NIFUNJEDILE IYO
Mulombwana na iyanae kanokoza sangalalanga akala kanawomeluwana, lemekezana, koma teto arela makundo a m’Baibulo.
Vyofuka Vyoweli-eda
-
Kodi mulombwana unaire n’ni ira banja laye likale losangalala?
-
Kodi mu-iyana unaire n’ni ira banja laye likale losangalala?
-
Akala muli vabanja, kodi tilikundo la m’Baibulo liivi lelo linakami-e ira banja linyu likale lolimba?
ONANI VIMO-I
Onani vyevyo vinaukami-eni ira musangalalenga m’banja linyu.
Onelani vidiyo ineyo inatonti-eda riya wo-indi-eda chito malangizo a Mulungu.
Onani vyevyo gonjela mulombwana monga muru wa banja unatapulelaathu.
“Akazi, N’chifukwa Chiyani Muyenera Kugonjera Amuna Monga Mutu?” (Nsanja ya Olonda, May 15, 2010)
Onani mwemo indi-eda chito malangizo a m’Baibulo unakami-edeleathu banja lelo linagumana na mavuto alukulu.
