CHILONGESA 49
Uno Tanga Yove Yinahase Kupwa Ngachilihi Yakuwahilila?—Chihanda 1
Vapwevo nalunga vaze vanalimbate veji kushinganyekanga ngwavo kuwahilila navevwa halikumbi lyakulimbata chitwalilileho haya myaka. Chinahase kupwa vene ngocho. Vaka-Kulishitu vaze vanashimbula muulo, vaze nawa vanazate nangolo mangana vakavangize vyuma yahanjika Mbimbiliya, vatachikiza ngwavo chishina kana chamuchano.
1. Jindongi muka jamuMbimbiliya jize vahana malunga?
Yehova atongola lunga apwenga mutwe watanga. (Tanga Wavaka-Efwesu 5:23.) Yehova asaka lunga asakulenga kanawa vyuma vize navikafwa tanga yenyi. Mbimbiliya yalweza malunga ngwayo: “Twalenuho lika kuzanganga mapwevo jenu.” (Wavaka-Efwesu 5:25) Uno echi chasakiwa kulinga ika? Chasakiwa lunga wazangi kusolwelanga pwevo lyenyi likoji nge vali hembo chipwe hakachi kavatu. Atela kumukinganga, nakumuzakama nakumutondela vyuma vyasakiwa. (WaChimoteu 1, 5:8) Chachilemunyi, atela kumukafwa apwenga nausoko wakukola naYehova. (Mateu 4:4) Chakutalilaho, nahase kulombelanga hamwe napwevo lyenyi nakutangilanga hamwe Mbimbiliya. Nge lunga mwazakamanga pwevo lyenyi nakumusolwela zangi, kaha mwatwalaho kupwa sepa lyaYehova.—Tanga WaPetulu 1, 3:7.
2. Jindongi muka jamuMbimbiliya jize vahana mapwevo?
Mazu aKalunga ahanjika ngwawo, pwevo “atela kupwa nakalemesa chikuma kuli lunga lyenyi.” (Wavaka-Efwesu 5:33) Uno nahase kulinga ngachilihi ngocho? Nahase kushinganyeka havilinga vyamwaza vyalunga lyenyi, nomwo ali nakukilikita mangana amuzakame nakuzakama vana vavo. Nahase nawa kusolola kalemesa hakukundwiza vyuma mwasakula lunga lyenyi, nakuhanjikanga nenyi nalikoji, nakuhanjikanga vyuma vyamwaza hali ikiye, numba tuhu lunga lyenyi kalemesa Yehovako.
3. Uno valunga napwevo vanahase kuzamisa ngachilihi ulo wavo?
Mbimbiliya yahanjika hali vapwevo nalunga vaze valimbata ngwayo: “Ava vavali navakapwanga mujimba umwe.” (Mateu 19:5) Echi chalumbununa nge vatela kukilikita mangana valihende kukala chuma chize nachineha ukalu muulo wavo. Veji kulinganga ngocho hakupwanga hamwe nakushimutwila muzangi nakulilweza vyuma vali nakushinganyeka nomwo vali nakwivwa. Vamona ngwavo kakweshi chuma chipwe mutu uze apwa wamulemu kuhambakana muka-zuvo yavoko shina Yehova kaha. Veji kupwanga nawa vakuvanguluka kuchina navalikata chikuma namutu weka.
LINANGULE VYAKUJIMINYINA
Wana jindongi jamuMbimbiliya jize jinahase kuzamisa ulo wove.
4. Enu malunga, zangenunga mapwevo jenu nakuvazakamanga
Mbimbiliya yahanjika ngwayo, malunga “vatela kuzanganga mapwevo javo nganomu vazanga mijimba yavo.” (Wavaka-Efwesu 5:28, 29) Uno echi chalumbununa ika? Talenu VINDIYO, nakushimutwila hachihula chinakavangizaho.
-
Jijila muka jimwe jize lunga mwasolwelamo ngwenyi azanga pwevo lyenyi nakumuzakama?
Tangenu Wavaka-Kolose 3:12, nakushimutwila hachihula chino:
-
Uno lunga nahase kusolola ngachilihi vilinga kana muulo wenyi?
5. Enu mapwevo, zangenunga malunga jenu nakuvavumbika
Mbimbiliya yakolezeza pwevo avumbikenga lunga lyenyi, numba nge lunga lyenyi azachila Yehova chipwe chiku. Tangenu WaPetulu 1, 3:1, 2, nakushimutwila havihula vino:
-
Nge wasomboka kulunga uze kalemesa Yehovako, twafwelela uli nakusaka naikiye alemesenga Yehova. Washinganyeka ngwove jila yakumukafwilamo shina kumwambulilanga lwola lwosena tahi, nyi kumusolwelanga vilinga vyamwaza nakumuvumbika? Mwomwo ika?
Chapwa chamwaza vapwevo nalunga kulivwasana hakusakula vyakulinga. Chipwe ngocho, lwola lumwe pwevo nahase kupwa navishinganyeka vyakulihandununa nevi vyalunga lyenyi. Ngocho nahase kumulweza vishinganyeka vyenyi mukavumbi. Oloze atela kwanuka nawa ngwenyi Yehova ahana lunga mulimo wakusakula vyuma vize navikafwa tanga. Shikaho atela kuzata nangolo akundwize vyuma nakase lunga lyenyi. Nge mwalinga ngocho, kaha tanga nayipwa yakuwahilila. Tangenu WaPetulu 1, 3:3-5, nakushimutwila hachihula chino:
-
Uno Yehova mwevwa ngachilihi nge pwevo mwahana kalemesa lunga lyenyi?
6. Munahase kukumisa ukalu muulo wenu
Kakwatwama ulo wakukupukako. Shikaho pwevo nalunga vatela kuzachila hamwe mangana vakumise ukalu. Talenu VINDIYO, nakushimutwila havihula vinakavangizaho.
-
Kweseka navindiyo, vyuma muka vyasolwele nge zangi yavava vapwevo nalunga yaputukile kuhola?
-
Vyuma muka valingile mangana vazamise ulo wavo?
Tangenu Wavaka-Kolinde 1, 10:24 naWavaka-Kolose 3:13. Hanyima yakutanga chisoneka hichisoneka shimutwilenu hachihula chino:
-
Uno kukavangiza awa mazu chinahase kuzamisa ngachilihi ulo?
Mbimbiliya yamba ngwayo twatela kuvumbikanga vakwetu. Kuvumbika mutu chapwa kumusolwela likoji nakalemesa. Tangenu Wavaka-Loma 12:10, nakushimutwila havihula vino:
-
Uno mutu atela kuvandamina muka-zuvo yenyi amuvumbike numba naikiye amuvumbike tahi? Mwomwo ika?
VATU VAMWE NGWAVO: “Ami namuka-zuvo yami katwalizanga ngana muze twalizangile hakavangako.”
-
Uno naumulumbunwina ngachilihi ngwove Mbimbiliya yinahase kuvakafwa?
CHISHINA UNALINANGULA
Vapwevo nalunga vanahase kupwa vakuwahilila nge navalisolwelanga zangi nakavumbi nakukavangiza jindongi jamuMbimbiliya.
Kuhituluka
-
Uno lunga nahase kulingisa ngachilihi ulo wenyi upwenga wakuwahilila?
-
Uno pwevo nahase kulingisa ngachilihi ulo wenyi upwenga wakuwahilila?
-
Nge watwama muulo, lundongi muka lwamuMbimbiliya lunahase kuzamisa ulo wove?
WANA VYAVIVULU
Wana vyuma vize munahase kulinga mwatanga mangana mupwenga vakuwahilila.
Tala vindiyo yamwaso yize nayisolola kuwaha chatwama hakukavangiza jindongi jaKalunga muulo wove.
Wana omwo chalumbunukila kuliluula kuwata walunga.
“Enu Mapwevo, Mwomwo Ika Mwatela Kuliluula Kumitwe Yajitanga?” (Kaposhi Kakutalila, May 15, 2010)
Wana omwo vyuma yahanjika Mbimbiliya haulo vinahase kukafwa vaze valimbata.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
