Atheli avyaani, annachuna wi ohakalala yoowo yonnaaya nihiku noopacerya mu othela waya okhale wawiikhalelaru. Nave ela enanwerya weereya. Akristu yaawo apanke othela mu iyaakha sincipale nave aniilipixerya opharihela miruku sa Mpiipiliyani aasuwela wi ela ti yooweryeya.

1. Miruku taani Piipiliya onaavaheiye alopwana athenle?

Yehova omvaha murici mulopwana othenle wi ahooleleke echoko awe. (Mwaalakhanye Éfeso 5:23.) Yehova onaweherya wi mulopwana apakeke soolakelela seiho sinahaala oruuhela mphurelo echoko awe. Piipiliya onnaaleela alopwana athenle: “Mwaakhweleke asaarinyu.” (Éfeso 5:25) Ela enataphulela eheeni? Mulopwana oosivela onnaakhaliha amwaariye mooreera murima, ari owaani naari vaavaa aryaaya ni achu akina. Owo onnaakhapelela nave onnapaka owetha wawe wi akhwaaniherye soothowa soomwiilini ni sa mmuupuweloni sa amwaariye. (1 Timóteo 5:8) Nyenya echu yoochuneyaxa, owo onnamukhaviherya okhalano onthamwene wawaacameleya ni Yehova. (Mateu 4:4) Ntoko yootakiherya, owo onanwerya ovekela ni omwaalakhanya Piipiliya ni amwaariye. Vaavaa mulopwana onamukhapeleleiye mwaariye moosivela, owo onnalipiha onthamwene awe ni Yehova.—Mwaalakhanye 1 Pedro 3:7.

2. Miruku taani Piipiliya onaavaheiye athiyana atheliwe?

Masu a Muluku analoca wi muthiyana otheliwe onaphwanela ‘waacicimihaka aiyawe.’ (Éfeso 5:33) Ti mwawiihai owo oneereiye awerye weerano yeela? Owo onanwerya wooniherya othamalela mikhalelo saphaama sa aiyawe ni wiilipixerya awo anapakaaya wi emukhapelele vamoha ni anamwane aya. Owo tho onanwerya wooniherya ncicimiho moorweela wa okhaviherya soolakelela awo anapakaaya ni oloca mooreera murima wa yaawo ni vooloca sa yaawo, naamwi awo ehimulapelaka Yehova.

3. Ti mwawiihai atheli eneeraaya elipihe othela waya?

Piipiliya onnaloca sa atheli: “Oweli awo eni ekhale mutxhu mmoharu.” (Mateu 19:5, BNM) Eyo enataphulela wi awo anaphwanela owaniha ni echu vyakala yeeyo yaahaala weeriha wi osivela waya ovukuwe. Awo anneerano yeela moorweela wa omaliha elukuluku vamoha ni oloca muupuwelo ni miyoonelo saya wa mukina ni mukhwaawe mootaphuwa ni moosivela. Awo haneemererya wi echu vyakala naari muchu mukina—ohiya Yehova—okhala echu yoochuneyaxa opwaha oothelana aya. Xaxaxa awo annakhalano ekaasoope wi ehipake onthamwene woohiphwanelela ni muchu mukina.

 OHUSERYA MWAWIISEELA

4. Alopwana nyu—mwaasiveleke ni waakhapelela phaama asaarinyu

5. Athiyana nyu—mwaasiveleke ni waacicimiha asiiyanyu

Piipiliya onnamuceenyerya muthiyana otheliwe waacicimiha aiyawe moohipwacha yaamurumeelaka Yehova naari hooye. Mwaalakhanye 1 Pedro 3:1, 2, nave voocharela muthokororye makoho anacharela:

• Waakhanle wi aiyanyu hanamurumeela Yehova, moohikhwa minikwa, nyuwaano munnachuna wi awo yeereno yeeyo. Tuuvi ori mukhalelo waphaama wa waakhaviherya yaawo? Apwanne munoona wi munaphwanela waalaleeryaka ilukuluku soothene, naari munaphwanela okhala muthiyana oosivela, ooreera murima, ni oocicimiha? Ntakhara heeni?

Mulopwana ni mwaariye ananwerya opakaka soolakelela saphaama vamoha. Nyenya mu ilukuluku ikina, muthiyana onanwerya oheemererya yoolakelela ya aiyawe. Owo onanwerya oloca muupuwelo ni moonelo awe moomaaleleya ni mwa ncicimiho, nyenya onaphwanela osuwela wi  Yehova ohaavaha murici aiyawe wa olakelela yeeyo eri yaphaama wa echoko. Owo onaphwanela opaka owetha wawe wi akhaviherye yoolakelela ya aiyawe. Moorweela wa weerano yeela, owo onahaala okhaviherya echoko yoothene okhala yoohakalala. Mwaalakhanye 1 Pedro 3:3-5, nave voocharela muthokororye nikoho nla:

• Ti mwawiihai Yehova onooneiye vaavaa muthiyana onooniheryeiye ncicimiho wa aiyawe?

6. Nyuwaano munanwerya ovootha makacamiho mu othela wanyu

 MUKWASU

Mulopwana ni muthiyana ananwerya okhala oohakalala wakhala wi awo annasivelana, annacicimihana nave annapharihela malakiheryo a Mpiipiliyani.

Makoho awuuluulela

• Ti mwawiihai mulopwana othenle oneereiye apake makupa awe wi akhaleno othela woohakalala?

• Ti mwawiihai muthiyana otheliwe oneereiye apake makupa awe wi akhaleno othela woohakalala?

• Waakhanle wi mwa mutheli, nlakiheryo taani na Mpiipiliyani nnahaala okhaviherya olipiha othela wanyu?