EISHOMO 49
Eka Yaawe Neebaasa Kubamu Eta Okushemererwa?—Ekicweka 1
Abagore nibaba nibateekateeka ngu okushemererwa oku barikuba baine aha izooba ry’okugaitwa, nikwija kugumaho ebiro byona. Kandi buzima nikubaasa kugumaho. Abakristaayo abamazire obwire buraingwa omu bushwere, kandi abarikugyendera aha buhabuzi bwa Baibuli, nibagira ngu eki nikibaasika.
1. Baibuli neeha abashaija buhabuzi ki?
Yehova akatoorana omushaija kuba omutwe gw’eka. (Shoma Abaefeso 5:23.) Yehova naayenda ngu omushaija acwemu ebirikugasira eka ye. Baibuli neegira ngu abashaija baine kugumizamu ‘nibakunda abakazi baabo.’ (Abaefeso 5:25) Ekyo nikimanyisa ki? Omushaija oine rukundo naatwariza omukazi we omu muringo gw’embabazi, omuka n’omu rweteeraine. Naamurinda kutahikwaho akabi, kandi naateeraho kumureeberera omu by’omubiri n’omu nyehurira. (1 Timoseo 5:8) Ekikuru munonga, naamureeberera omu by’omwoyo. (Matayo 4:4) Nk’eky’okureeberaho, naashaba nawe kandi naashoma nawe Baibuli. Omushaija yaareeberera omukazi we omu muringo gwa rukundo, naaguma aine omukago murungi na Yehova.—Shoma 1 Petero 3:7.
2. Baibuli neeha abakazi buhabuzi ki?
Ekigambo kya Ruhanga nikigira ngu omukazi “ashemereire kutiina iba.” (Abaefeso 5:33) Eki naakikora ata? Naabaasa kuteekateeka aha mitwarize mirungi ya iba, n’okuteeraho kwe kumureeberera n’abaana baabo. Naayoreka ngu naaha iba ekitiinisa arikumushagika omu bi arikucwamu, kandi arikugamba nawe omu muringo gw’embabazi nari arikumugambaho gye, n’obu yaakuba atarikuheereza Yehova.
3. Omukazi na iba nibabaasa kuhamya bata obushwere bwabo?
Baibuli neegira ngu omukazi na iba nibaba bari omubiri gumwe. (Matayo 19:5) Eki nikimanyisa ngu baine kwetantara omuze gw’okwetaanisa. Nibagira obwire bw’okuba kumwe, kandi nibagambirana ebiteekateeko byabo n’enyehurira zaabo, omu muringo gwa rukundo batarikusherekana. Oyihireho Yehova, tihaine omuntu ondiijo nari ekintu ekindi eki barikutwara nka kikuru kukira omukago gwabo. Kandi buri omwe aharibo naayegyendesereza kutagira omukago gw’aha mara munonga n’omuntu ondiijo.
SHWIJUMA GYE
Reeba emisingye ya Baibuli erikubaasa kuhamya obushwere bwawe.
4. Omushaija aine kukunda omukazi we kandi akamufaho
Baibuli neegira ngu ‘abashaija bashemereire kukunda abakazi baabo nk’emibiri yaabo.’ (Abaefeso 5:28, 29) Eki nikimanyisa ki? Zaana VIDIYO, kubaasa kugarukamu ekibuuzo ekirikukurataho.
-
Ni mu miringo ki ei omushaija arikubaasa kworeka ngu naakunda omukazi we kandi ngu naamufaho?
Shoma Abakolosai 3:12, kubaasa kugarukamu ekibuuzo eki:
-
Omushaija naabaasa kworeka ata emitwarize egi omu bushwere?
5. Omukazi aine kukunda iba kandi akamuha ekitiinisa
Baibuli neehiga omukazi kuha iba ekitiinisa, yaaba naaheereza Yehova nari atarikumuheereza. Shoma 1 Petero 3:1, 2, kubaasa kugarukamu ebibuuzo ebi:
-
Baro ku araabe atarikuheereza Yehova, buzima nooba nooyenda ngu amuheereze. Nooteekateeka ngu niki ekirikubaasa kukora gye, n’okuguma noomubuurira obutaitsya, nari n’okumutwariza gye kandi okamuha ekitiinisa? Ahabw’enki?
Abakazi na baibabo nibabaasa kucwamu gye hamwe. Kwonka obumwe, omukazi naabaasa kutaikirizana na iba. Kyaba kityo, naaba aine kugamba eki arikuteekateeka aikaikaine kandi omu muringo gw’ekitiinisa, kwonka aine kumanya ngu Yehova akaha iba obujunaanizibwa bw’okucwamu eby’oburungi bw’eka ye. Omukazi aine kuteeraho kushagika iba omu kucwamu kwe. 1 Petero 3:3-5, kubaasa kugarukamu ekibuuzo eki:
Yaakora atyo, naayongyera aha kushemererwa kw’eka. Shoma-
Yehova naayehurira ata omukazi yaaha iba ekitiinisa?
6. Noobaasa kusingura oburemeezi omu bushwere bwawe
Tihariho obushwere obuhikiriire. N’ahabw’ekyo, omukazi na iba baine kukora hamwe, kusingura oburemeezi omu bushwere bwabo. Zaana VIDIYO, kubaasa kugarukamu ebibuuzo ebirikukurataho.
-
Omu vidiyo egi, ni bumanyiso ki obumwe obwayorekire ngu omukago gw’omukazi na iba guriyo nigufa?
-
Bakakora ki kuhamya obushwere bwabo?
Shoma 1 Abakorinso 10:24 na Abakolosai 3:13. Bwanyima y’okushoma buri kyahandiikirwe, garukamu ekibuuzo eki:
-
Okugyendera aha buhabuzi obu nikihamya kita obushwere?
Baibuli neegira ngu twine kuhaana ekitiinisa. Okuha ekitiinisa nikitwariramu okutwariza omuntu omu muringo gw’embabazi kandi ogutari gw’okumugarura ahansi. Shoma Abarooma 12:10, kubaasa kugarukamu ekibuuzo eki:
-
Ahabw’enki omushaija nari omukazi ataine kutegyereza mugyenzi we kuba niwe yaabanza kumuha ekitiinisa?
ABAMWE NIBAGIRA NGU: “Nyowe n’omukundwa wangye titukiine omukago guhami nk’oku twabaire turi.”
-
Noobaasa kushoboorora ota ngu Baibuli neebaasa kubahwera?
OMU BUGUFU
Omukazi na iba nibashemererwa baaba nibakundana, barikuhaana ekitiinisa, kandi barikugyendera aha misingye ya Baibuli.
Okweijutsya
-
Omushaija naabaasa kureeta ata okushemererwa omu bushwere?
-
Omukazi naabaasa kureeta ota okushemererwa omu bushwere?
-
Ku oraabe ori omu bushwere, ni musingye ki ogwa Baibuli ogurikubaasa kuhamya obushwere bwawe?
JUMBURA EBINDI
Manya obuhabuzi oburikubaasa kubahwera kwesiimira amagara omu ka yaanyu.
Reeba vidiyo y’ekyeshongoro erikworeka emigisha erikuruga omu kugyendera aha buhabuzi bwa Ruhanga omu bushwere bwawe.
Yetegyereze eki kirikumanyisa omushaija kuba omutwe gw’eka.
“Abakazi, Ahabw’enki Mwine Kworobera Emitwe Yaanyu?” (Omunaara gw’Omurinzi, Mei 15, 2010)
Omushaija nʼomukazi we bakasingura bata oburemeezi bwʼamaani, otwariiremu nʼokugaitururwa?.