Eri rọnmọren obọ e fiẹrorhọ taghene omamerhomẹ rẹ aye i vwori ẹdẹ aye a rọnmọ na, ono rhirhiẹ ye bẹmẹdẹ. Ọnọ sabu phia omaran. Ilele Kristi ri rọnmọren ẹgbukpe buebun ne, ra damoma ha urhebro i Baibol ruiruo, i rheri taghene ọ sabu phia.

1. Urhebro ọgo yi Baibol na o tiobọnu rẹn esa?

Jehova ọ ha esa mwu no rhiẹ urhomu ekrun. (Se Ephesians 5:23.) Jehova o fiẹrorhọ taghene esa ono brorhiẹn ri na rhua erere vwe ekrun ọnẹyen. Baibol na ọ ha urhebro rẹn esa taghene: “Are i rhe vwo ẹguọlọ kpahen ene are.” (Ephesians 5:25) Me yẹ ọrana o mevirhọ? Esa ro vwo ẹguọlọ kpahen aniẹ, o dje uruemru esiri phia riẹn uvuẹn oghwa ọrhẹ uvuẹn afiede. Ọ damoma sẹroriẹ, jeghwai yẹ ye oborẹ ọ guọlọre ọke ephian. (1 Timothy 5:8) Ọrọ mai ghanren, ọ ha userhumu riẹn sẹrorẹ obọdẹn onyerẹnkugbe rhẹ i Jehova. (Matthew 4:4) Jerẹ udje, ọnọ sabu lele aniẹ nẹrhomo, jeghwai lelie se i Baibol na kugbe. Esa ro vwo ẹguọlọ kpahen aniẹ, ọrhọ hẹrote yi, nọ sẹrorẹ onyerẹnkugbe yi rhẹ i Jehova.—Se 1 Peter 3:7.

2. Urhebro ọgo yi Baibol na o tiobọnu rẹn ene?

Ẹmro Osolobrugwẹ ọ tare taghene ane “ọ họghọ okokodo rẹn esa ye.” (Ephesians 5:33) Marhẹ ono ruie lele? Ọnọ sabu rhe roro kpahen omamọ iruemru rẹ esa ye o vwori, ọrhẹ omẹdamu ọnẹyen rọ hẹrote yi ọrhẹ emọ aye. Ọnọ ji sabu dje ọghọ phia nyoma rọ hobọtua orhienbro yi, tẹmro riẹn dẹndẹn, ji ta omamọ ẹmro kpahiẹn rẹn awọrọ, ọrhọ tobọ rhianẹ ọvwọ ga i Jehova-a.

3. Marhẹ esa ọrhẹ ane ine ru ruẹ orọnmo aye gbanhonrhọ?

Baibol na ọ tare kpahen eri rọnmọ ne taghene: “Aye awanva ni ne rhiẹ ugboma owu.” (Matthew 19:5) Ọnana o mevirhọ taghene aye ina wọnrọn haso oborẹ ọnọ suẹ ẹhẹriẹ uvuẹn orọnmo aye. Aye e ruẹ ọnana nyoma aye a ghwọghọ ọke kugbe, jeghwai ta iroro aye ọrhẹ oborẹ oma o ruẹ aye rẹn owuowọnwan. Aye i vwa lẹrhẹ emru yanghene ohworho ọrọrọ nọ ghanren omamọ rẹn aye ghwẹ i Jehova ọrhẹ ọrẹ aye i rọnmọre-en. Aye a jomarhotọre neneyo aye i je rhe vwo onyerẹnkugbe rọ kpẹnkpẹn phan rhẹ ọwọrọ rẹ aye i vwa rọnmọ.

 YONO KODO RHỌ

4. Esa—are i vwo ẹguọlọ kpahen ane are, jeghwai hẹrote yi

5. Ene—are i vwo ẹguọlọ kpahen esa are, jeghwai mwuọghọ riẹn

Baibol na o jiririe rẹn ane no mwuọghọ rẹn esa ye, sẹ ọ ga i Jehova yanghene ọvwọ ga ye-e. Se 1 Peter 3:1, 2, orho ru, are i gba kpahenrhọ enọ enana:

• Orhianẹ esa ọvwọ ga i Jehova-a, itiọrurhomẹmro, we fiẹrorhọ ọke rọ nọ mọ ga ye. Marhẹ wu ne ru sabu ha userhumu riẹn? Wu rorori taghene wu ne rhe ghwoghwo riẹn ọke ephian, gbinẹ ọrẹ wu ne rhiẹ ane ro vwo uruemru esiri ọrhẹ ọghọ? Mesoriẹ?

Esa ọrhẹ ene ina sabu kwomakugbe brorhiẹn ri serhọ. Ọrẹn, ọkezẹko ane o kwerhọ orhienbro  esa ye-e. Uvuẹn erhirhiẹ ọnana, ọnọ sabu nyoma ọghọ ọrhẹ omeriotọre ta riẹn oborẹ o rorori, o ji fo nọ karorhọ taghene i Jehova ọ yẹ esa ye ohwan ro no brorhiẹn ri serhọ harẹn ekrun na. Omarana, ọnọ vi hobọtua orhienbro esa ye te ekete omẹgbanhon ọnẹyen o teri. Orho ru omaran, no toroba omamerhomẹ ọrẹ ekrun na. Se 1 Peter 3:3-5, orho ru, are i gba kpahenrhọ onọ ọnana:

• Marhẹ oma o ru i Jehova ọke ane orho mwuọghọ rẹn esa ye?

6. Wu na sabu fi ebẹnbẹn kparobọ uvuẹn orọnmo ọnọ

 ME WU YONORIN?

Esa ọrhẹ aniẹ ina sabu vwo omamerhomẹ orhianẹ aye a họghọ rẹn owuowọnwan, vwo ẹguọlọ kpahen omoma aye, ji ha iruemru-urhi i Baibol ruiruo.

Ẹzẹkoko

• Marhẹ esa ono ru sabu toroba omamerhomẹ uvuẹn orọnmo?

• Marhẹ ane ono ru sabu toroba omamerhomẹ uvuẹn orọnmo?

• Orhianẹ wu rọnmọ ne, uruemru-urhi i Baibol ọgo yọ nọ sabu bọn orọnmo ọnọ gbanhonrhọ?