Reʼ taqeh koreʼ xkibʼan kaxaro inkaaj kikʼraam i suqkiil kʼuxliis reʼreʼ, pan chuʼnchel i kikʼachariik. Eh reʼ wilih ne inkireq. Reʼ taqeh ajnimaneel kʼih haabʼ inkikʼam chi kaxaro kehtʼal i wilih ruum chi kikojom kikʼux reh rukojariik pan kikʼachariik taqeh naʼojbʼal wilik pan Santo Laj Huuj.

1. ¿Chajariik taqeh naʼojbʼal iruyeew i Santo Laj Huuj reh i bʼahilbʼees?

Reʼ Jehová xuyeew qʼabʼ chi reʼ bʼahilbʼees ne irukʼam rubʼeeh i rufamilia (chawil Efesios 5:​23). Eh iraaj chi reʼ i bʼahilbʼees ne iruchih i holohik reh i rufamilia. Reʼ Santo Laj Huuj iruyeew keh taqeh bʼahilbʼees i naʼojbʼal wilih: «Cha kʼax taq awehkʼeen» (Efesios 5:​25). ¿Chajariik iraaj ruqʼorom i wilih? Reʼ bʼahilbʼees irukʼax i rehkʼeen noq iruqʼoreej pan chaqʼlamiil pan rupaat eh jeʼ woʼ chuwach chuʼnchel i kʼachareel. Irukʼax i rehkʼeen eh iruyeew reh i aajwaal wach chi reh pan rutibʼkaal eh irubʼiraj reh nikʼwach wilik (1 Timoteo 5:8). Eh na woʼ ruyeʼem reh i rehkʼeen i aajwaal wach chi reh pan uxlabʼal (Mateo 4:4). Jeʼ rukabʼ noq iril wach i Santo Laj Huuj eh irubʼan rutiij ruukʼ. Mi reʼ bʼahilbʼees irukʼax i rehkʼeen, kow i ramigohiil ruukʼ i Jehová (chawil 1 Pedro 3:7).

2. ¿Chajariik taqeh naʼojbʼal iruyeew i Santo Laj Huuj reh i ehkʼenbʼees?

Reʼ ruqʼorbʼal i Dios iruqʼor chi reʼ ehkʼenbʼees «ko ruman chi naruyeʼem ruloqʼil i rubʼahiil» (Efesios 5:​33, TNM). ¿Nikʼwach ne ruyeew ruloqʼil i rubʼahiil? Ko ruman chi ne irukapaaj chi riij taqeh holohik naʼojbʼal wilik reh i rubʼahiil eh ne woʼ irukapaaj chi riij nikʼwach i rukʼaxariik inbʼanarik eh nikʼwach inkʼaxarik taqeh ruhalakʼuun. Eh ne woʼ irukʼuhtaaj chi looqʼ chi reh taqeh i ruchih i rubʼahiil noq iruqʼoreej pan chaqʼlamiil eh noq holohik inqʼorik chi riij kuukʼ i tokoom, atoobʼ ta reʼ i rubʼahiil maʼ reʼ ta ajnimaneel.

3. ¿Chajariik nakibʼanam taqeh bʼahilbʼees ehkʼenbʼees reh chi kow i kikaxaro?

Reʼ Santo Laj Huuj iruqʼor keh taqeh kaxaro: «Taqe kiʼibʼ reʼ reʼ naa kikahniik chi xa jinaj chik taqe» (Mateo 19:5). Reʼ wilih iraaj ruqʼorom chi maʼ na ta kikanaam chi ne injotʼik i kikʼaxooj chi kiwach. Ruum aj reʼ nakisam kiqʼiij reh wihʼik kikabʼcheel eh qʼorik chi kiwach chi riij inkikapaaj inkikʼraaj, ruukʼ chaqʼlamiil eh pan rukorkiil. Eh maʼ inkiyeew ta woʼ qʼabʼ chi jenoʼ naʼojbʼal, bʼanooj oon jenoʼ kʼachareel ne inchʼaqwik keh ruukʼ i Jehová eh ruukʼ i kuchʼihil. Eh inkikʼraaj kiibʼ chi maʼ ne ta inkikʼsaj qʼiij ruukʼ jenoʼ kʼachareel mi maʼ reʼ i kuchʼihil.

 CHATZʼIR RIIJ I KʼAHCHIʼ ATIJEM

4. Bʼahilbʼees chakʼax eh chawil awehkʼeen

5. Ehkʼenbʼees, chakʼax eh chayeew ruloqʼil abʼahiil

Reʼ Santo Laj Huuj iruqʼor reh i ehkʼenbʼees chi ne iruyeew ruloqʼil i rubʼahiil atoobʼ ta iruloqʼej wach i Jehová oon maʼchih. Chawil taq i 1 Pedro 3:​1, 2 eh tiqʼoroq taq chi riij:

• Mareh inawaaj chi reʼ abʼahiil ne imponik chi rajloqʼineel i Jehová. ¿Inaqʼor na chi ne iraaj ruloqʼem wach i Jehová mi xaqʼor reh i kʼuhbʼaal iqal iqal oon inaqʼor chi mi holohik anaʼojbʼal eh inayeew ruloqʼil ne iraaj ruloqʼem wach i Jehová? ¿Chaaj woʼ reet jeʼ reʼ inakapaaj?

Reʼ ehkʼenbʼees eh reʼ bʼahilbʼees ne inkichih i holohik pan kikʼachariik. Xa reʼ laʼ wilik pech reʼ ehkʼenbʼees maʼ ne ta imponik chuwach i ne iru chih i rubʼahiil. Mi jeʼ reʼ, ne irubʼan chi reʼ ehkʼenbʼees ne iruqʼor reh i rubʼahiil chajariik irukapaaj pan chaqʼlamiil eh pan rukorkiil. Ko ruman woʼ chi ne inkʼulik pan rukʼux chi reʼ bʼahilbʼees yeʼooj qʼabʼ reh ruum i Jehová chi ne iruchih i holohik reh i rufamilia eh ruum aj reʼ ko ruman chi reʼ ehkʼenbʼees ne irubʼan chuʼnchel i wilik pan qʼabʼ reh rukojariik rukʼux ruukʼ i ne iruchih i rubʼahiil. Jeʼ reʼ ne inwihʼik suqkiil kʼuxliis pan paat. Chawil taq i 1 Pedro 3:​3-5 eh tiqʼoroq taq chi riij:

• ¿Chajariik iruqʼor i Jehová chi riij i ehkʼenbʼees reʼ irukʼuhtaaj i loqʼil reh i rubʼahiil?

6. Reʼ taqeh kaxaro ne kiʼelik korik chupaam taqeh kʼaxkilal

 KʼOLOQ PAN AKʼUX

Reʼ bʼahilbʼees eh i ehkʼenbʼees ne irubʼan chi suq kikʼux wilaʼ inkikʼax kiibʼ, inkiyeew kiloqʼil chi kiwach eh mi inkikoj pan kikʼachariik taqeh naʼojbʼal inkitijej pan Santo Laj Huuj.

Reʼ xkahnik pan akʼux

• ¿Chajariik narubʼanam i bʼahilbʼees reh chi suq kikʼux pan kikaxarohiil?

• ¿Chajariik narubʼanam i ehkʼenbʼees reh chi suq kikʼux pan kikaxarohiil?

• Mi hat kaxaro, ¿chajariik chi naʼojbʼal inatijej pan Santo Laj Huuj ne irukowej akaxarohiil?