Casarashcauna tucui huras cushilla causangahua munanun. Ashca huatauna casarashca huauqui paniuna casnami causanushca Biblia rimashcaunara casusha ursarishcamanda.

1. ¿Ima camachishcara Biblia cun casarashca carima?

Jehová mandaca casarashca carira aillu uma angahua (leai Efesios 5:23). Chiraigu Jehová munanmi cari ali rurangaj ajllashcara apichu paihua aillura yanapangahua. Biblia casnami cariunama camachin: “Canguna huarmiunara llaquichi” nisha (Efesios 5:25). ¿Imasnara cari caita pactachina ushan? Cari paihua huarmira llaquishaga huasii shinallara shuj runauna ñaupais llaquishcara ricuchin. Paihua huarmira cuirasha pai ministishcaras cusha cushi sintirichu munan (1 Timoteo 5:8). Astaumbas cari paihua huarmira Jehovamanda yachachisha yanapana an (Mateo 4:4). Paihua huarmi pariju Bibliara leana, Diosta mañanas an. Jehovahua amigo tucuna munashaga cari paihua huarmira llaquisha cuirana an (leai 1 Pedro 3:7).

2. ¿Ima camachishcara Biblia cun casarashca huarmima?

Diospa Shimi nin “huarmiga paihua carira uyachu” (Efesios 5:33). ¿Imasnara huarmi caita pactachina ushan? Huarmi paihua cari ali rurashcaunara, imasna paita paihua huahuaunaras cuirangaj ashca ursarishcara iyarina an. Paihua cari rurashcaunara cushihua yanapan. Paihua cari Diosta sirvij mana ajpis paita llaquihua rimasha, paimanda shujcunahua ali rimashas paita valichishcara ricuchin.

3. ¿Imara rurana ushanun casarashcauna cushi causangahua?

Biblia casarashcaunamanda rimasha nin: “Ishquindi shu aichalla tucunaungami” (Mateo 19:5). Casarashcauna parijumanda llaquinusha catingaj parijulla timpu pasana ima iyashcara, ima sintishcaras pasajta llaquishcahua cuintanunas anun. Shinajpis casarashcauna ñaupa punda Jehová Diosta mas valichinun paihua quiquin cari o huarmi randimanda. Shinallara casarashcauna shuj carira, shuj huarmira munanamanda cuirarina anun.

 MAS YACHAI

4. Cari, camba huarmira llaquihua cuirai

5. Huarmi, camba carira llaquihua respetai

Bibliaga huarmira camachin paihua carira respetachu paihua cari Jehová Diosta sirvij o mana sirvij ajpis. Leaichi 1 Pedro 3:1, 2, huasha catij tapuimanda rimaichi:

• Camba cari Jehová Diosta mana adurajpi can munanguima camba cari Diosta adurachu. Camba cari Jehovara sirvichu nisha yanapangahua: ¿Tucui huras camba carira Bibliamanda yachachina anguichu? o ¿Paita llaquisha respetashcara ricuchina anguichu? ¿Imarasha shina iyangui?

Cari, huarmi pariju ima rurangaraushcara cuintanuna anun. Shinajpis huarmi huaquimbi paihua cari iyashcasna mana iyangachu. Casna tucujpi huarmi mana piñarisha respetuhua  pai iyashcara rimana ushan. Shinallara huarmi iyarina an carirami paihua aillura cuirachu Jehová ajllashcara. Chiraigu huarmi paihua cari aillura cuirangahua ima rurangaraushcara yanapana an. Shina rasha paihua aillu cushi causangaj yanapanga. Leaichi 1 Pedro 3:3-5, huasha catij tapuimanda rimaichi:

• ¿Imasnara Jehová sintin huarmi paihua carira respetashcara ricusha?

6. Casarashcauna problemagunara charishas alichina ushanunmi

 IMARA YACHASHCANGUI

Cari, huarmi llaquinusha respetasha Bibliamanda iyaigunara pactachisha cushi causana ushanun.

Iyaringaj

• ¿Imasnara cari yanapana ushan paihua aillu cushi causachu?

• ¿Imasnara huarmi yanapana ushan paihua aillu cushi causachu?

• Can casarashca ashaga aillu ucui cushi causangahua ¿ima Biblia camachishcara catinguima?