О неве брачна парија надинена пе кај о бахталипе со осетинѓе ле кеда леле пе, ка трајнел засекогаш. Ама, дали акава шај те овел чаче? Оја, шај! О христијања сој тане бут берша ко брако хем кола со трудинена пе те икерен пе ко советија тари Библија, џанена кај адава шај те овел чаче.

1. Саво совет дела и Библија е роменге?

О Јехова денѓа задача е ромеске те овел поглавари ки фамилија. (Читин Ефешаните 5:23.) О Јехова очекујнела лестар те анел одлуке башо шукарипе е фамилијакоро. И Библија советинела е ромен: „Манген тумаре ромњен“ (Ефешаните 5:25). Сар шај те керен адава? Јекх ром кова со мангела пле ромња секогаш постапинела лаја љубезно, бизи разлика дали тане кхере или јавере манушенцар. Ов заштитинела ла хем дела пло најшукар те шај те грижинел пе башо лакере физичка хем емоционална потребе (1. Тимотеј 5:8). А сој најважно, ов грижинела пе башо лакере духовна потребе (Матеј 4:4). На пример, ов молинела пе хем читинела и Библија заедно пле ромњаја. Кеда јекх ром мангипаја грижинела пе пле ромњаке, ов аракхела пло амалипе е Јеховаја. (Читин 1. Петрово 3:7.)

2. Саво совет дела и Библија е ромњенге?

Е Девлескоро Лафи вакерела кај и ромни „ваљани хор те поштујнел пле роме“ (Ефешаните 5:33). Сар шај те керел адава? Ој шај те размислинел башо шукар особине со иси лакере роме хем башо адава кобор ов трудинела пе те грижинел пе лаке хем ленгере чхавенге. Исто аѓаар, ој шај те сикавел кај поштујнела ле аѓаар со поддржинела лескере одлуке, љубезно тани леа хем керела лестар шукар лафи кеда тани е јаверенцар. Адава керела ле чак кеда лакоро ром на служинела е Јеховаске.

3. Сар шај тло брако те овел позорало?

И Библија вакерела кај о брачна парија „ка овен јекх тело“ (Матеј 19:5). Адалеске, на ваљани те дозволинен хари по хари те оддалечинен пе јекх јекхестар хем аѓаар те шудрол ленгоро мангипе. Адалеске бут важно тано те накхавен време заедно хем отворено хем љубезно те керен лафи башо адава со мислинена хем сар осетинена пе. Ола на смејнена те дозволинен нешто или некој — освен о Јехова — те овел ленге поважно таро пумаро брачно партнери. Посебно мора те пазинен те на овен превише паше некасаја со нане ленгоро брачно партнери.

 ДОЗНАЈН ПОВИШЕ

4. Тумен о рома — манген хем грижинен тумен шукар тумаре ромњенге

5. Тумен о ромња — манген хем поштујнен тумаре ромен

И Библија поттикнинела е ромњен те поштујнен пумаре ромен, бизи разлика дали ола служинена е Јеховаске или на. Читин 1. Петрово 3:1, 2, а пало адава керен лафи башо акала пучиба:

• Ако тло ром на служинела е Јеховаске, ту сигурно мангеа ов те почминел те керел адава. Со мислинеа, кова тано о најшукар начин те поможине леске — цело време те сведочине леске или те ове шукар хем љубезно ромни која со сикавела поштовање? Соске мислинеа аѓаар?

Шукар тано о ром хем и ромни те анен одлуке заедно. Ама, несаво пути и ромни шај иси ла  јавер мислење таро лакоро ром. Тегани, и ромни шај ко јекх љубезно хем смирено начин те вакерел пло мислење. Ама, на ваљани те бистрел кај о Јехова денѓа одговорност е ромеске те анел одлуке е фамилијаке. Адалеске, ој ваљани те дел пло најшукар те поддржинел и одлука со ка анел лакоро ром. Адалеа ој керела те овел шукар атмосфера ко кхер. Читин 1. Петрово 3:3-5, а пало адава керен лафи башо акава пучибе:

• Сар дикхела о Јехова ки ромни со поштујнела пле роме?

6. О проблемија ко брако шај те решинен пе

 СО СИКЛИЛЕМ

О ром хем и ромни ка овен бахтале ко пумаро брако ако мангена пе, поштујнена пе хем ако применинена о библиска начелија.

Сар ка одговорине?

• Со шај о ром те керел те шај о брако те овел бахтало?

• Со шај и ромни те керел те шај о брако те овел бахтало?

• Ако сиан ко брако, кова библиско начело мангеа те применине?