О ром тай и ромни, надинен пес завинаги те овен зомкха щастлива, кизом си ко бияв. О християня, колато си прандеме бут бреша тай ден всичко пестар, за те керен со пхенел и Библия, жанен, кай си възможно те овен зомкха щастлива завинаги.

1. Саве съвекя дел и Библия е роменге?

О Йехова диняс е ромес и задача те овел е семействоскоро шеро, демек ов те водинел е семействос. (Четине Ефесяни 5:23.) О Йехова мангел о ром те лел решения, колато ка помагинен е целоне семействоске. И Библия пхенел е роменге: „Дехен тумаре ромниен.“ (Ефесяни 5:25) Сар о рома ка сикавен, кай дехен пе ромниен? О ром сикавел, кай дехел пе ромня, като икерел пес лачшес ласа, ма само англал околенде, ама кана си коркоре-да. Ов дикхел пе ромняке тай дел всичко пестар, за те овел ой щастливо тай за те овен ла о необходима букя. (1 Тимотей 5:8) О най-важно си, кай ов помагинел лаке те овел лачши амалин е Йеховаса. (Матей 4:4) Например ов молинел пес пе ромняса тай четинел и Библия заедно ласа. Кана о ром дикхел пе ромняке тай сикавел, кай дехел ла, ов пазинел по амалипе е Йеховаса. (Четине 1 Петър 3:7.)

2. Саве съвекя дел и Библия е ромниенге?

И Библия пхенел, кай и ромни „требе бут те уважинел пе ромес“. (Ефесяни 5:33) Сар ой ка сикавел, кай уважинел лес? Като мислинел кизом лачшо мануш си лакоро ром тай кизом бут букя керел ов, за те дикхел ла тай е чшавен. Също сикавел, кай уважинел лес, като дел всичко пестар, за те подкрепинел о решения, колато лел лакоро ром, тай като винаги хоратинел леса лачшипнаса тай пхенел шукар букя за леске, даже ако ов на служинел е Йеховаске.

3. Со требе те керен о ром тай и ромни, за те барярен и любов машкар песте?

И Библия пхенел, кай о ром тай и ромни „ка овен сар йекх мануш“. (Матей 19:5) Ако иси букя, колато циден лен йекх аверестар, он требе те ден всичко пестар, за те отчшиен лен тай те овен сар йекх. Също требе те овен често заедно тай те хоратинен песке, като сикавен любов тай като пхенен всичко со си ленгере вогиенде. Освен о Йехова, най-важно е ромеске требе те овел лескери ромни тай най-важно е ромняке требе те овел лакоро ром. Он на требе те мукен никхой тай нищо те овел машкар ленде. Он пазинен по семейство, като на домукен те ачшон близка декхаса, ковато нанай ленгоро ром или ленгери ромни.

 РОДЕ ПО-ХОРЕСТЕ

4. Ромален, дехен тумаре ромниен тай дикхен ленге

5. Ромнялен, дехен тай уважинен тумаре ромен

И Библия пхенел, кай си шукар и ромни те сикавел уважение кариг пе роместе, даже ако ов на служинел е Йеховаске. Четинен 1 Петър 3:1, 2 тай хоратинен калке въпросиенге:

• Ако то ром на служинел е Йеховаске, сигурно бут мангес ов те ачшовел амаро пхрал. Со мислинес, кай ка овел по-шукар: постоянно те хоратинес леске е Йеховаске или те сикавес, кай дехес лес тай кай уважинес лес? Соске?

Шукар си, кана о ром тай и ромни си йекхе гогяте, кана лен решение. Ама подекхана е  ромняке ащи те на харешинел лакере ромескоро решение. Тогава ой ащи те пхенел леске со мислинел, като хоратинел спокойно леса тай сикавел уважение кариг лесте. Ама нанай те бистерел, кай о Йехова диняс лакере ромес и задача те решинел со си най-лачшо е семействоске. Ой требе те дел всичко пестар, за те подкрепинел лескоро решение. Ако керел калка букя, ка помагинел те овел щастие ленгере кхересте. Четинен 1 Петър 3:3-5 тай хоратинен калке въпросиеске:

• Сар чувствинел пес о Йехова, кана и ромни сикавел уважение кариг пе роместе?

6. Ащи те решинен о проблемя машкар туменде

 СО СИКЛИЛЯМ

О ром тай и ромни ащи те овен щастлива, кана дехен пес, уважинен пес тай керен со пхенел и Библия.

О най-важна букя таро уроки

• Со ащи те керел о ром, за те овел по-щастливо лескоро семейство?

• Со ащи те керел и ромни, за те овел по-щастливо лакоро семейство?

• Ако синян прандеме, саве съвекя тари Библия ащи те помагинен те овел по-бари любов те семействосте?