Banyalani ba batjha ba na le tshepo ya hore thabo eo ba bileng le yona ka letsatsi la bona la lenyalo e tla dula e le teng. Ho ka kgoneha hore ba dule ba thabile. Bakreste bao e leng kgale ba nyalane le ba sebeditseng ka thata ho sebedisa keletso e tswang ka Bibeleng ba a tseba hore ntho eo ya kgoneha.

1. Bibele e fa banna keletso efe?

Jehova o file monna boikarabelo ba ho ba hlooho ya lelapa. (Bala Baefese 5:23.) Jehova o lebelletse hore monna a etse diqeto tse tla tswela lelapa la hae molemo. Bibele e eletsa banna hore ba ‘tswele pele ho rata basadi ba bona.’ (Baefese 5:25) Ntho ee e bolelang? Monna ya lerato o tshwara mosadi wa hae ka mosa ha ba le ka tlung le ha ba na le batho ba bang. O a mo sireletsa ebile o etsa sohle seo a ka se kgonang ho mo fa dintho tseo a di hlokang e le hore a thabe. (1 Timothea 5:8) Ntho ya bohlokwa le ho feta ke hore o mo thusa hore a be le kamano e ntle le Jehova. (Matheu 4:4) Ka mohlala, o bala Bibele le ho rapela le mosadi wa hae. Monna o tla dula a na le kamano e ntle le Jehova haeba a hlokomela mosadi wa hae.​—Bala 1 Petrose 3:7.

2. Bibele e fa basadi keletso efe?

Lentswe la Modimo le re mosadi “o lokela ho ba le tlhompho e tebileng ho monna wa hae.” (Baefese 5:33) A ka etsa jwalo jwang? A ka nahana ka dintho tse ntle tseo monna wa hae a di etsang le hore na o sebetsa ka thata hakae ho mo hlokomela ha mmoho le bana ba bona. A ka boela a bontsha hore o a mo hlompha ka hore a tshehetse diqeto tseo a di entseng, a bue le yena ka mosa le hore a bue hantle ka yena le haeba e se morapedi wa Jehova.

3. Banyalani ba ka etsang e le hore lenyalo la bona le tshwarelle?

Ha Bibele e bua ka banyalani e re “ba babedi e tla ba nama e le nngwe.” (Matheu 19:5) Sena se bolela hore ba lokela ho lwantsha ntho e nngwe le e nngwe e ka fokodisang lerato la bona. Ba ka etsa sena ka hore ba qete nako ba le mmoho le hore ba bolellane ntho e nngwe le e nngwe ka bolokolohi. Monna kapa mosadi ha a lokela ho dumella ntho kapa motho le ha e le ofe hore a tle pele ho molekane wa hae ntle le Jehova. Hape ha a lokela ho tlwaelana ho feta tekano le motho le ha e le ofe.

 ITHUTE DINTLHA TSE DING

4. Banna ba lokela ho rata le ho hlokomela basadi ba bona

5. Basadi ba lokela ho rata le ho hlompha banna ba bona

Bibele e eletsa mosadi ho hlompha monna wa hae ho sa tsotellehe hore na o sebeletsa Jehova kapa tjhe. Bala 1 Petrose 3:1, 2 ebe le buisana ka dipotso tsena:

• Haeba o na le molekane ya sa sebeletseng Jehova, ha ho pelaelo hore o batla hore a mo sebeletse. O nahana hore tsela e molemo ya ho mo thusa ke efe? Na ke ho dula o mo bolella hore na Bibele e reng kapa ke hore o be mosadi ya hantle, ya mosa le ya nang le tlhompho? Ke hobaneng ha o tjho jwalo?

Banyalani ba ka etsa diqeto tse ntle ba le mmoho. Le ha ho le jwalo, ka dinako tse ding mosadi a ka nna a se ke a dumellana le monna wa hae.  A ka mo bolella maikutlo a hae ka tlhompho le ka boikokobetso empa o lokela ho hopola hore Jehova o file monna wa hae boikarabelo ba ho etsa diqeto tse nepahetseng bakeng sa lelapa. O lokela ho etsa sohle seo a ka se kgonang ho tshehetsa qeto eo monna wa hae a e etsang. Ha a etsa jwalo o etsa hore lelapa lohle le thabe. Bala 1 Petrose 3:3-5 ebe le buisana ka potso ena:

• Jehova o ikutlwa jwang ha mosadi a bontsha hore o hlompha monna wa hae?

6. O ka hlola mathata lenyalong la hao

 KAKARETSO

Banyalani ba ka thaba ha ba ratana, ba hlomphana ebile ba sebedisa dikeletso tse tswang ka Bibeleng.

Re Ithutileng?

• Monna a ka etsang e le hore ho be le thabo lenyalong la hae?

• Mosadi a ka etsang e le hore ho be le thabo lenyalong la hae?

• Haeba o lenyalong, ke keletso efe ya Bibele e ka o thusang hore o matlafatse lenyalo la hao?