Emunos iterak ebe esalakinete kesi iyalamasi ikar kere kwape kapak naaweniata kesi epeta. Eebo, epedoros ngun. Ikristayon luadautu apak naepol edukokina ido lueswamaata kagogong atupakinit aicoreta nuka Ebaibuli, ejenete ebe epedoros nuka aiyalama kokale.

1. Ani bo aicoretait naijaikinit Ebaibuli ikiliok?

Eseunit Yawe ekiliokit araut akou naka ekale. (Kosiom Ipeson 5:23.) Ekoto Yawe ngesi aitolomunun aseuneta nuingarakinete ekale aimedaun. Icorakinit Ebaibuli ikiliok ebe: “Kominasi angorokus.” (Ipeson 5:25) Inyo apolou naka akiro kangun? Ekiliokit loemin, eyait akeberu kasianut kotunga keda kapak naejaatar kesi bon. Eyuwarit ngesi akeberu kotoma oboro luepedorete adumakin nges ationis, ido epodokinit ipudesia luka akeberu ka aswam nuisiyalamikinito nges. (1 Timoteo 5:8) Nuepolok kakere, ingarakinit ngesi akeberu ainyikokinit ajaut keidicane loegogong keda Yawe. (Matayo 4:4) Kwape aanyunet, epedori ngesi nepepe keda akeberu ailipenen ka asiomenen Ebaibuli. Naepodokinitor ekiliokit akeberu, inyikokini eidicaneke ka Yawe araut loegogong.​—Kosiom 1 Petero 3:7.

2. Anyoin bo aicoretait naijaikinit Ebaibuli angor?

Ebala Akirot Naka Edeke ebe: “Koyongitenenei aberu da okilenike.” (Ipeson 5:33) Epone ani iswama ngesi ngun? Epedori ngesi aomoom nuikamunitos iponesio luajokak luka okilenike keda epone loiswama okilenike kagogong aidar ngesi ka ikecedwe. Epedori bobo ngesi aitodun ayongit kotoma aigangit aseuneta nuka okilenike, einer ka nges kasianut, keda einer nuejok nuikamunitos okilenike, karaida mam okilenike ijaanakini Yawe.

3. Epone ani epedoriata luedukokina aitogogong ekecedukone?

Kanuikamunitos luedukokina ebala Ebaibuli ebe: “Ngul luarei eraunos adiopetekuan.” (Matayo 19:5) Apolouke ebe ibusakinit kesi acoit idiobore yenepedori aitonokok akecemin. Iswamaete kesi ngun kopone loka ajaut nepepe keda aimor aomisio ka epone loepupio nginidiopet kakesi. Kilema aitopoloorit Yawe, mam ibusakinit idiokakesi aitopoloorit idiobore arai idiotunganan adepar yenikowaike. Kanoinoi, mam ekoto idiokakesi eisupane bobo keda idiotunganan yenimam erai yenikowaike.

 KISISIAU NUIPU

4. Ikiliok​—kominasi ido koyaitos akusingor ejok

5. Angor​—kominas ido koyongitos ikusikiliok

Isinyikokinit Ebaibuli aberu ayongit okilenike karaida ngol lomam ijaanakini Yawe. Kosiom 1 Petero 3:1, 2, kosodete aimor aingiseta nuta:

• Arai mam okilenikon ijaanakini Yawe, komam abuonokin ikoto jo nges araun loijaanakini Yawe. Iwomit ijo inyo epedori aingarakin nges​—ijo ameet alimonokin nges arai bo ijo aitodunit iponesio luejok keda ayongit nges? Kanuinyo?

Epedorete ikiliok keda angorokec aiswamaun aseuneta nuejok nepepe. Konye kapakio ace epedori amamut acamanar ajaun kiding ekiliokit ka akeberu. Ibusakinit aberu alimun kainapakina nueomit ngesi kitodunite ayongit ido ekoto ngesi aiitunit ebe Yawe ijaikinit okilenike aitolomunun aseuneta nuejok kotoma okale. Ibusakinit nges aswam nuepedori kere aigangit aseuneta nuka okilenike. Aswam ngun, eyauni aiyalama okale. Kosiom 1 Petero 3:3-5, kosodete aimor aingiset nata:

• Epone ani epupio Yawe arai itodikinit aberu okilenike ayongit?

 6. Ipedori ijo aipikor atiokisio kotoma odukone

 NUIDAU AISISIAUN

Epedorete ekiliokit keda aberu araut luiyalamasi arai eminanara, kitodunitos ayongit, ido kotupakinitos aicoreta nuka Ebaibuli.

Ainyogoor

• Epone ani epedoria ekiliokit ayaun aiyalama odukone?

• Epone ani epedoria aberu ayaun aiyalama odukone?

• Arai idukokina ijo, ani bo aicoretait naka Ebaibuli naepedori aitogogong ekonidukone?