NGUDO 49
Ndi Mini Zwine Zwa Nga Ita Uri Muṱa Waṋu U Takale?—Tshipiḓa 1
Vhathu vhane vha kha ḓi bva u vhingana, vha fhulufhela uri dakalo ḽe vha vha naḽo nga ḓuvha ḽe vha vhingana ngaḽo, ḽi ḓo dzula ḽi hone. Ḽi nga dzula ḽi hone. Vhakriste vho no fhedzaho miṅwaha minzhi vho vhingana na vhane vha tevhedza nyeletshedzo i bvaho Bivhilini, vha a zwi ḓivha uri zwenezwi zwi a konadzea.
1. Bivhili i ṋea vhanna nyeletshedzo ifhio?
Yehova o ṋea munna vhuḓifhinduleli ha u vha ṱhoho ya muṱa. (Vhalani Vhaefesa 5:23.) Yehova u lavhelela uri munna a dzhie phetho dzine dza ḓo vhuyedza muṱa. Bivhili i vhudza vhanna zwi tevhelaho, i ri: “Bvelani phanḓa ni tshi funa vhafumakadzi vhaṋu.” (Vhaefesa 5:25) Zwenezwo zwi amba mini? Munna ane a funa mufumakadzi wawe, u mu fara zwavhuḓi musi vhe vhavhili na musi vhe vhukati ha vhathu. U a mu tsireledza, a ita uri a dzule o takala na u mu ṋea zwine a zwi ṱoḓa. (1 Timotheo 5:8) Zwa ndeme vhukuma, u mu thusa uri a vhe na vhushaka ha tsini na Yehova. (Mateo 4:4) Sa tsumbo, a nga rabela na mufumakadzi wawe na u vhala Bivhili nae. Musi munna a tshi ṱhogomela mufumakadzi wawe, zwi ita uri onoyo munna a dzule e na vhushaka havhuḓi na Yehova.—Vhalani 1 Petro 3:7.
2. Bivhili i ṋea vhafumakadzi nyeletshedzo ifhio?
Bivhili i amba uri mufumakadzi u tea u ‘ṱhonifha munna wawe nga maanḓa.’ (Vhaefesa 5:33) A nga zwi itisa hani? A nga humbula nga ha nḓila ine munna wawe a vha muthu wavhuḓi ngayo na nga nḓila ine a ṱhogomela ngayo ene na vhana muṱani. A nga sumbedza uri u a mu ṱhonifha nga u tikedza phetho dzine a dzi ita, nga u amba nae zwavhuḓi na nga u mu amba zwavhuḓi naho e si mugwadameli wa Yehova.
3. Vhavhingani vha nga ita hani uri mbingano yavho i khwaṱhe?
Bivhili i amba zwi tevhelaho nga ha vhavhingani, i ri: “Vhuvhili havho vha [ḓo] vha ṋama nthihi.” (Mateo 19:5) Zwenezwo zwi amba uri vha tea u lwisana na tshiṅwe na tshiṅwe tshine tsha nga fhungudza lufuno lwavho. Vha nga ita zwenezwo nga u ṱwa vhoṱhe, u somolelana zwa haṋwani na u amba nḓila ine vha ḓipfa ngayo vho vhofholowa. Vha dzhia Yehova hu ene wa ndeme u fhira zwithu zwoṱhe. Fhedzi nga nnḓa ha Yehova, a vha tendeli muthu na muthihi kana tshithu na tshithihi tshi tshi vha tsha ndeme u fhira mufarisi wavho. A vha ḓoweli muṅwe muthu nga ho kalulaho u fhira mufarisi wavho.
GUDANI ZWO ENGEDZEAHO
Gudani uri ndi vhulivhisi vhufhio vhu re Bivhilini vhune ha nga khwaṱhisa mbingano yaṋu.
4. Vhanna, funani vhafumakadzi vha vhoiwe ni vha fare zwavhuḓi
Bivhili i amba uri “vhanna vha fanela u funa vhafumakadzi vhavho sa mivhili yavho.” (Vhaefesa 5:28, 29) Zwenezwi zwi amba mini? Ṱalelani VIDIO, ni kone u fhindula mbudziso i tevhelaho.
-
Munna a nga sumbedza hani uri u funa mufumakadzi wawe na uri u na ndavha nae?
Vhalani Vhakolosa 3:12, ni kone u fhindula mbudziso i tevhelaho:
-
Munna a nga sumbedza hani zwo ṅwalwaho kha iyi vese mbinganoni yawe?
5. Vhafumakadzi, funani vhanna vha vhoiwe ni vha ṱhonifhe
Bivhili i ṱuṱuwedza mufumakadzi uri a ṱhonifhe munna wawe naho munna wawe a sa shumeli Yehova. Vhalani 1 Petro 3:1, 2, ni kone u fhindula mbudziso dzi tevhelaho:
-
Arali ni na munna a sa shumeli Yehova, zwi tou pfala uri ni a ṱoḓa a tshi shumela Yehova. Ndi nḓila ifhio ya khwiṋe ine na nga mu thusa ngayo? Naa ni vhona u nga ni tea u dzula ni tshi khou mu vhudza nga ha Bivhili tshifhinga tshoṱhe? Kana naa ndi khwiṋe u vha mufumakadzi wavhuḓi, a re na vhuthu na ane a ṱhonifha? Ndi ngani ni tshi ralo?
Munna na mufumakadzi vha nga ita phetho dzavhuḓi vhoṱhe. Fhedzi nga tshiṅwe tshifhinga, mufumakadzi a nga kha ḓi sa tendelana na munna wawe. A nga vhudza munna wawe zwine a khou zwi humbula o dzika na nga ṱhonifho, fhedzi u tea u dzula a tshi zwi humbula uri Yehova o ṋea munna vhuḓifhinduleli ha uri a ite phetho muṱani. U fanela u ita zwoṱhe zwine a nga kona uri a tikedze phetho dzine dza itwa nga munna wawe. Musi mufumakadzi a tshi ita zwenezwo, zwi ita uri muṱani hu vhe na dakalo. Vhalani 1 Petro 3:3-5, ni kone u fhindula mbudziso i tevhelaho:
-
Yehova u ḓipfa hani musi mufumakadzi a tshi ṱhonifha munna wawe?
6. Ni nga kunda thaidzo mbinganoni yaṋu
A hu na mbingano i si na thaidzo. Ndi ngazwo vhavhingani vha tshi tea u shumisana u itela u kunda dzenedzo thaidzo. Ṱalelani VIDIO, ni kone u fhindula mbudziso dzi tevhelaho.
-
Kha vidio, ndi mini zwo sumbedzaho uri lufuno lwa vhavhingani lu vho thoma u fhungudzea?
-
Vho ita mini u itela u khwaṱhisa mbingano yavho?
Vhalani 1 Vhakorinta 10:24 na Vhakolosa 3:13. Ni tshi fhedza u vhala dzenedzi vese, ni fhindule mbudziso i tevhelaho:
-
U shumisa yeneyi nyeletshedzo zwi nga khwaṱhisa hani mbingano?
Bivhili i amba uri ri fanela u hulisana. U hulisa muṅwe zwi amba u mu fara zwavhuḓi na u mu ṱhonifha. Vhalani Vharoma 12:10, ni kone u fhindula mbudziso dzi tevhelaho:
-
Naa mufarisi u tea a thoma a lindela mufarisi wawe a tshi mu hulisa u thoma? Ndi ngani ni tshi ralo?
VHAṄWE VHATHU VHA AMBA URI: “Nṋe na mufarisi wanga a ri tsha funana u fana na u thomani.”
-
Ni nga vha ṱalutshedza hani uri Bivhili i nga vha thusa?
NO GUDA MINI?
Munna na mufumakadzi vha nga takala arali vha tshi funana, u ṱhonifhana na u shumisa zwine vha zwi guda Bivhilini.
Ni Kha Ḓi Zwi Humbula?
-
Munna a nga ita hani uri mbingano i takadze?
-
Mufumakadzi a nga ita hani uri mbingano i takadze?
-
Arali ni mbinganoni, ndi zwifhio zwe na zwi guda Bivhilini zwine zwa nga khwaṱhisa mbingano yaṋu?
WANANI ZWO ENGEDZEAHO
Gudani nga ha nyeletshedzo dzine dza nga ita uri muṱa waṋu u dzule wo takala.
Ṱalelani vidio ya muzika ine ya sumbedza phaṱhutshedzo dzine na dzi wana nga u tevhedza nyeletshedzo dzi bvaho kha Mudzimu musi ni mbinganoni.
Gudani uri zwi amba mini u ṱhonifha uri munna ndi ene a re na vhuḓifhinduleli ha u ranga phanḓa muṱa.
“Vhasadzi, Ndi Ngani Ni Tshi Fanela U Ḓiṱukufhadzela Vhuṱoho?” (Tshiingamo, 15 May 2010)
Vhaṅwe vhavhingani vho lugisa hani thaidzo dze vha vha vhe nadzo u katela na u ṱalana?
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
