ESI ITUUGHẠ PHỌ 50

Nạ Kaḍighi Eeghe Kụ Eghunotu Anạ Omoọgh Oḅaạl Olhoghi Ekpịgh 2

PEGH

Ibạm anmụny oḍighi inmo k’aZihova. Kụ odị rawạ dị odẹ r’onhiin komaạr opạm inmo phọ ipẹ phọ. AZihova amiteom ni oromha dị aḍighi olọ osụ-olhoghi dị katue aloghonhaạn ḍighaạgh odẹ r’onhiin oḍighi iduọn phọ. Oromha phọ odị aḍeenhaan kẹn ni iyaạr dị ibạm anmụny koḍighi omiteom aani oḅaạl olhoghi siphẹ eghunotu phọ.

1. AZihova atoma odẹ r’onhiin oḍighi eeghe?

AZihova rawạ mọ odẹ r’onhiin ophomhoghiạn nmụny abidị oḅilhẹ owạ ghan mem orọl r’abidị. Odị rawạ kẹn ni dị bidị kokoph nmụny phọ abidị osighẹ esi ikarạph kụ oḅilhẹ osighẹ sinhị-iilhogh aBaibul phọ otughemhiọm bidị. (Proverbs 1:8) Odị aḅenhị burudẹ mọ: ‘Iikonomom nmụny phọ anyinha . . . oroma phọ aZihova.’ (Ibạl Efesọs 6:4.) Olhoghi aZihova raḅaạl ghan ni mem dị odẹ r’onhiin odaphạn iiḅakiọm mọ odị mem dị rookonhom nmụny abidị, kụ u/leti onhọn oye dool phọ abidị.

2. AZihova atoma ibạm anmụny oḍighi eeghe?

AZihova atọ aḅenhị ibạm anmụny mọ: “Inaghanạn ghan burudẹ r’aburunhiin phọ anyina.” (Ibạl Kolosị 3:20.) Mem dị ibạm anmụny olhọgh eegu kụ oḅilhẹ onhaghanhạn ghan burudẹ r’aburunhiin abidị, olhoghi aZihova r’olhoghi odẹ r’onhiin phọ abidị raḅaạl ghan ni. (Proverbs 23:22-25) AZizọs aḍighi ni emạ eḍeenhaan mem mọ aḍighi bọ obumoọny phọ. Ghalhamọ r’iduọn odị amhunhughan bọ kụ odẹ r’onhiin phọ odị u/munhughan bọ, odị alhọgh ghan ni eegu aḅilhẹ anhaghanhạn odẹ r’onhiin odị.—Luk 2:51, 52.

3. Ika kụ idị eghunotu anạ koḍuraan otuman Enhaạn?

Eḍighi maạr dị nạ aḍighi odẹ obobọ onhiin, iikia i/lo mọ nạ rawạ ni dị anmụny phọ anạ kopomhoghiạn aZihova idiphọ anạ. Nạ kaḍighi ika kụ iphẹn phọ emite? Daphạn itọ aBaibul phọ eḅẹm bọ mọ: “Nạ amoọgh otughemhị anmụny phọ anạ [ikpo-onhụ phọ aZihova], kụ oghaạph ghan ilọ iphẹn phọ mem lọ nạ arọl ude k’anạ r’amem lọ nạ ratelhe eten.” (Deuteronomy 6:7) Itughemhị phọ iphẹn phọ remạ ghan oḅilhẹ ghan oghaạph araraạr phọ ipẹ nạ maghaạph bọ ni. Kụ dị iikia i/lo, nạ raḅenhị ghan ni iyaạr obumoọny anạ ibadị amem pidị ka/bula. Esi aBaibul phọ reḅẹm ghan mọ wạ ghan roopoogh oghaạph ghan ilọ aZihova oḅenhị ibạm anmụny phọ anạ. Emạn ni maạr osighẹ ghan amem torobọ awiki ophamạm iiseeny eghunotu. Eḍighi maạr dị nạ u/moọgh ibạm anmụny, nạ kamoọgh ni suọ esi owạ ghan amem otuughạ Ekpo-onhụ phọ Enhaạn torobọ awiki.

OLHEGHERI OBUGHẸ

Ooḅeghiọn raraạr dị nạ aḍighi keloghonhaạn ḍighaạgh eghunotu phọ anạ omhoọgh eephọ r’oḅaạl olhoghi.

4. Sighẹ ephomhoghiạn kụ atughemhiọm nmụny phọ anạ

Ipaanhaạn edi ni otughemhị ibạm anmụny. Kuolọ ika kụ idị aBaibul phọ katue aloghonhaạn ḍighaạgh? Ibạl Jems 1:19, 20, kụ eeḅeghiọn sipuru phọ iphẹn:

Ika kụ idị odẹ r’onhiin kotue oḍeenhaan ephomhoghiạn mem dị bidị roḅaanhaạn nmụny abidị?
Eeghe kụ iḍighi kụ i/nighẹ bọ dị odẹ obobọ onhiin kaliọm obumoọny odị mem dị iyaạr repin olhoghi? a

5. Koph nmụny phọ anạ

Orue oghoph ibạm anmụny phọ anạ, emạn ni maạr dị nạ kaḅenhị torobọ onyọ abidị iyaạr dị orolhạn esi remạ ghan. Eeni kekparanhaạn ni nyinhạ oḍighi iduọn phọ. Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Koph Nmụny Ph’anạ Asighẹ Esi Ikarạph (2:58)

Uḍighi ika kụ reḍighi ghan bọ ipaanhaạn dị odẹ r’onhiin koḅenhị ibạm anmụny phọ abidị iyaạr dị orolhạn esi remạ ghan?
Ighẹn areten kụ edị abuniin aburudẹ r’abunhiin mosighẹ oḅenhiọm ibạm anmụny phọ abidị iyaạr dị orolhạn esi remạ ghan?

Idiphọ aBaibul phọ aghaạph bọ, aḅirinhi phọ aSetan rabeeph ghan bịn kalhoghorị. Ibạl 2 Timoti 3:1, 13, kụ eeḅeghiọn ḍipuru phọ aḍiẹn:

Abuniin abuḍighinhom ikarạph phọ oghol bọ siphẹ ekpịgh phọ 13 rotolhạn ghan esi ibạm anmụny obobọ kooḅoghọgh riisi aloor ibạm anmụny eten dị i/ikpeanhaạn. Odaphạn iphẹn phọ, eeghe kụ iḍighi kụ emạn bọ maạr dị odẹ r’onhiin koḅenhị ibạm anmụny phọ abidị iyaạr dị orolhạn esi remạ ghan, r’ilọ oghoph asiloor abidị osighẹ esi abuphẹ rotolhạn ghan bọ esi ibạm anmụny obobọ rooḅoghọgh ghan bọ riisi aloor ibạm anmụny eten dị i/ikpeanhaạn?

Nạ alegheri ni?

Abugbaanhaạn aZihova momiteom ni ibadị araraạr dị keloghonhaạn ḍighaạgh burudẹ r’aburunhiin orue oḅenhị ibạm anmụny phọ abidị iyaạr dị orolhạn esi remạ ghan, r’ilọ oghoph abidị osighẹ esi awe dị rotolhạn ghan esi ibạm anmụny obobọ rooḅoghọgh ghan riisi aloor ibạm anmụny eten dị i/ikpeanhaạn. Esi omaạm, pogh:

Vidio phọ Koph Nmụny Ph’anạ
Learn From the Great Teacher, emhuoghaạph phọ 10 r’ 32
“Otughemhị Obumoọny Phọ Anạ Iyaạr Dị Orolhạn Esi Remạ Ghan” (Awake! No. 5 2016)

6. Lọgh eegu odẹ r’onhiin anạ

Ibạm anmụny r’iḍoọgh kotue ni oḍeenhaan olhọgh eegu odẹ r’onhiin abidị dị eego esi eten phọ bidị roḅaanhaạn ghan bọ bidị. Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Mị Kaḅaanhaạn Ghan Ika Odẹ r’Onhiin Amhị? (2:19)

Uḍighi ika kụ emạn bọ ni maạr dị ibạm anmụny r’iḍoọgh koḅaanhaạn ghan odẹ r’onhiin abidị r’eten olhọgh eegu?
Onyọ iḍoọgh kaḅaanhaạn ika odẹ r’onhiin odị kụ eḍeenhaan olhọgh eegu?

Ibạl Proverbs 1:8, kụ eeḅeghiọn ḍipuru phọ aḍiẹn:

Ewạ mọ onyọ iḍoọgh azọ ika mem dị odẹ r’onhiin odị ongọ nyodị iiḅakiọm?

7. Iḅophoghạn eeseeny aZihova idiphọ eghunotu

Arughunotu Abugbaanhaạn aZihova omoọgh ni mem dị bidị rosighẹ ghan kotuughaạm Baibul phọ idiphọ eghunotu. Ropạm ghan ika iiseeny eghunotu phọ? Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Iiseeny Eghunotu—Ipaanhaạn r’Asuọ Phọ (8:04)

Eghunotu koḍighi ghan eeghe pidị ogbor ghan opạm Iiseeny Eghunotu?
Odẹ obobọ onhiin kaḍighi ika kụ eghunotu odị omooghọm suọ oḅilhẹ okelhọm iiseeny eghunotu phọ?—Miịn afoto oḅẹl opoḍi esi ituughạ phọ ephẹn phọ.
Eeghe araraạr kụ ketue eḍighi idị kekparanhaạn eghunotu phọ anạ ophạm iiseeny eghunotu?

Iḍiodi phọ epẹ Izrạl, aZihova awạ ghan mọ arughunotu ogbor ghan ooḅeghiọn Igẹ Iigbia phọ. Ibạl Deuteronomy 6:6, 7, kụ eeḅeghiọn ḍipuru phọ aḍiẹn:

Nạ kaḍighinhom ika ḍinhị-olhogh phọ aḍiẹn phọ?

Idị arughunotu kotue opạm iiseeny eghunotu:

Iikolhobian raraạr dị kotuughạ otu ituughạ.
Ibạl kụ eḅilhẹ eeḅeghiọn ilọ eḍeenhaan aBaibul dị eghunotu phọ anạ kokelhọm.
Eḍighi maạr dị nạ amhoọgh ibạm anmụny, nạ atue ni apogh raraạr dị oḍighinhaan ibạm anmụny siphẹ jw.org, dị ibạm anmụny phọ anạ koḍighi.
Eḍighi maạr dị nạ amhoọgh ibạm anmụny dị purukụ omhuunha ukpe, pọ iiḅeghiọn emhuoghaạph dị egbolhomaam bidị, dị edi jw.org.
Ibạm anmụny phọ anạ r’anạ otue ni ogbạ egberi eḍeenhaan aBaibul.
Ipogh kụ eḅilhẹ eeḅeghiọn vidio dị odi jw.org.

ABUNIIN AWE OOTUGHIẠN MỌ: “Amem i/lo otughemhị ibạm anmụny phọ abidị Baibul phọ.”

Nạ aatughiạn aani ika?

OGHAẠPH OOKARAGH

AZihova rawạ dị odẹ r’onhiin kopomhoghiạn oḅilhẹ okoph nmụny phọ abidị; ibạm anmụny kolọgh eegu kụ oḅilhẹ onaghanhạn ghan odẹ r’onhiin abidị; ḅilhẹ arughunotu koḅophoghạn ghan ooseeny nyodị.

Ooḅula

Ika kụ idị odẹ r’onhiin kotughemhị oḅilhẹ okoph ibạm anmụny abidị?
Ibạm anmụny koḍeenhaan ika mọ bidị olọgh ni eegu odẹ r’onhiin abidị?
Eeghe kụ asuọ owạ ghan amem torobọ awiki otuughạ ghan aBaibul phọ idiphọ eghunotu?

Utuughạ omhadạn:

Aḍiigbu

Puru aani bunhọn siphẹ ookpomhoghan phọ ilọ ophạm iiseeny eghunotu.

Enhọn iyaạr:

Your other goal