PWONY ME 50
Jo me Otwu Twero Bedo ki Yomcwiny Nining?—Bute me 2
Lutino obedo mic mua ki bot Jehovah. Jehovah mito ni lunyodo gugwok mic meno maber. Dok en omiyo tam me ryeko ma twero konyo lunyodo me timo meno. Tamme bene nyuto gin ma lutino myero gutim wek jo me ot gubed ki yomcwiny.
1. Tam ango ma Jehovah miyo bot lunyodo?
Jehovah mito ni lunyodo gumar lutinogi dok gutute matek me cwalo cawa malac kwedgi. En bene mito ni lunyodo gugwok lutinogi ki i jami ma twero wanogi dok guti ki cik ma igi lac me Baibul me pwonyo lutino. (Carolok 1:8) En owaco bot wegi lutino ni: ‘Wupwony lutinowu ki kit mabeco ma Jehovah pwoyo.’ (Kwan Jo Epeco 6:4.) Jehovah bedo ki yomcwiny ka lunyodo gilubo tirane ka gitye ka pwonyo lutinogi ki dok ka pe gimiyo tic meno bot ngat mukene.
2. Tam ango ma Jehovah miyo bot lutino?
Jehovah ociko lutino ni: “Wuwiny lunyodowu.” (Kwan Jo Kolocai 3:20.) Ka lutino giworo dok giwinyo lunyodogi, giweko Jehovah kacel ki lunyodogi gibedo ki yomcwiny. (Carolok 23:22-25) Yecu oweko lanen maber adada i kare ma en pud tidi. Kadi bed ni en onongo pe ki roc, en owinyo dok oworo lunyodone.—Luka 2:51, 52.
3. Wutwero nyikke cok bot Lubanga nining macalo jo me ot?
Ka in lanyodo, ngene kene ni imito ni lutinoni bene gumar Jehovah kit ma imarre kwede-ni. Itwero cobo meno nining? Ka itimo gin ma Baibul waco, ni: ‘Wubed ka pwonyo litinowu ki lok pa Jehovah kare ducu, wulok kwedgi ma wubedo i odiwu, ki ka wutye ka wot i yo.’ (Nwoyo Cik 6:7) Gwok in bene ingeyo ni myero ibed ka nwoyo lok moni bot lutino teretere wek wigi opo iye. Wang Baibul man nyuto ni myero ikwany kare me pwonyo lutinoni ki lok pa Jehovah kare ki kare. Bedo ber ka jo me ot gikwanyo kare cabit ki cabit me woro Jehovah kacel. Ka wupe ki lutino, pud wubinongo adwogi maber ka wukwanyo kare cabit ducu me kwano Lok pa Lubanga.
NONG NGEC MATUT
Nen tam mogo ma twero konyo jo ducu ma i ot me bedo agonya dok ma cwinygi yom.
4. Pwony lutinoni ki mar
Pwonyo latin twero bedo tek adada. Baibul twero konyi nining? Kwan Yakobo 1:19, 20, ci wunyam lapeny magi:
-
Lunyodo gitwero nyuto mar bot lutinogi nining ka gitye ka lok kwedgi?
-
Pingo lunyodo pe myero gupwony lutinogi ki kiniga? a
5. Gwok lutinoni
Me gwoko lutinoni, pire tek adada ni ilok ki latin acel acel lok madok i kom tim buto. Man twero bedo tek adada. Tuk VIDIO, ci wunyam lapeny ma lubo.
-
Pingo tek bot lunyodo mukene me lok bot lutinogi lok madok i kom tim me buto?
-
I yo ma nining ma lunyodo mukene gipwonyo kwede lutinogi lok i kom tim me buto?
Kit ma Baibul otito kwede con, lobo pa Catan-ni tye ka balle medde ameda. Kwan 2 Temceo 3:1, 13, ci wunyam lapeny man:
-
Jo maraco mogo ma kiloko i komgi i tyeng 13 ginywaro lutino i yo me buto. Dong pingo pire tek ni lunyodo gupwony lutinogi lok i kom buto ki kit me gwokke ki i kom jo ma gipyedo lutino?
Tika onongo ingeyo?
Lucaden pa Jehovah giyubo jami akwano ki vidio mapol ma konyo lunyodo me pwonyo lutinogi lok kom buto ki kit me gwokke ki i kom jo ma gipyedo lutino. Me labolle, nen:
-
Gwok Lutinoni (vidio)
-
“Kit me Pwonyo Latinni Lok i Kom Buto” (Awake! Nam. 5 2016)
6. Wor lunyodoni
Lutino matino ki me mwaka apar ki wiye gitwero nyutone ni giworo lunyodogi i kit ma giloko kwede botgi. Tuk VIDIO, ci wunyam lapeny ma lubo.
-
Pingo pire tek ni latin olok ki woro bot lunyodone?
-
Latin twero lok ki lunyodone i yo ma nyuto woro nining?
Kwan Carolok 1:8, ci wunyam lapeny man:
-
Latin myero odok iye nining ka lunyodone gumiye tira?
7. Wuwor Jehovah macalo jo me ot
Jo me ot ma gitye Lucaden pa Jehovah gikwanyo kare cabit ki cabit me woro Jehovah kacel macalo jo me ot. Woro pi jo me ot bedo nining? Tuk VIDIO, ci wunyam lapeny ma lubo.
-
Jo me ot gitwero bedo ki yub me woro pi jo me ot cabit ducu nining?
-
Lunyodo gitwero timo gin ango wek worogi pi jo me ot obed me kony dok me yomcwiny?—Nen cal ma tye i acakki me pwony man.
-
Gin ango ma weko bedo tek botwu me kwano Baibul kacel macalo jo me ot?
I kare pa Luicrael, Jehovah onongo mito ni jo me ot gunyam Ginacoya kare ki kare. Kwan Nwoyo Cik 6:6, 7, ci wunyam lapeny man:
-
Itwero tic ki cik ma iye lac man nining?
Jami ma wutwero timone i cawa me worowu pi jo me ot:
-
Wuyub jami ma kibinyamo i cokke.
-
Wukwan ci wunyam jami mutimme ma kicoyo i Baibul ma jo me otwu gimaro.
-
Ka itye ki lutino ma pud gitino, kwany jami ma wutwero tic kwede ki i bute me “Jami me Atima” i jw.org.
-
Ka itye ki lutino me mwaka apar ki wiye, wunyam pwony ma kiyubo pi bulu ma tye i jw.org.
-
Wutuk goga i kom jo ma kicoyo lok komgi i Baibul.
-
Wunen ci wunyam vidio mo ki i jw.org.
JO MOGO GIWACO NI: “Lok me Baibul tek ma lutino pe twero niang iye.”
-
In kono iwaco ningo?
WOT WIYE WIYE
Jehovah mito ni lunyodo gumar lutinogi, gupwonygi, dok gugwokgi; ki ni lutino guwor dok guwiny lunyodogi; Jehovah bene mito ni jo me ot guwore kacel.
Ngo ma ipwonyo?
-
Lunyodo gitwero pwonyo ki gwoko lutinogi nining?
-
Lutino gitwero nyuto woro bot lunyodogi nining?
-
Adwogi mabeco ango ma wunongo ka wukwanyo kare cabit ki cabit me woro Jehovah kacel macalo jo me ot?
TIM KWED
Gin ango ma latinni myero opwony i kare-ni ma bikonye ka odoko ngat madit?
Nen tam ma Baibul miyo bot jo ma gwoko lunyodogi ma dong gutii.
“Gin Ango ma Baibul Waco i Kom Gwoko Lunyodo ma Dong Guteggi?” (Pwony ma tye i jw.org)
Nen kit ma laco mo ma onongo pe ngeyo kit me gwoko lutino odoko wego maber.
Nen kit ma wege gitwero jingo kwede wat i kingi ki awobegi.
“Wege Gitwero Dongo Wat Macok i Kingi ki Awobegi Nining?” (Wi Lubele, Novemba 1, 2011)
a I Baibul, “pwony” kwako miyo cik ki tira ki dong konyo ngat moni me loko kite ki tam marac. Ento pe kwako tic ki gero kacel ki leb marac.—Carolok 4:1.
