NÍ KASEMI 50
Mɛni O Maa Pee Konɛ Bua Jɔmi Nɛ Hi O Weku ɔ Mi?—Fã 2
Bimɛ ji nike ní nɛ je Yehowa ngɔ. Yehowa hyɛɛ blɔ kaa fɔli nɛ a hyɛ nike ní nɛ ɔ nɔ saminya. Yehowa kɛ ga womi nɛ nile ngɛ mi ha fɔli konɛ e ye bua mɛ nɛ a pee jã. E kɛ ga womi ha bimɛ konɛ mɛ hu a le nɔ́ nɛ a maa pee nɛ bua jɔmi nɛ hi a weku ɔ mi.
1. Mɛni ga womi nɛ Yehowa kɛ ha fɔli?
Yehowa hyɛɛ blɔ kaa fɔli nɛ a suɔ a bimɛ, nɛ́ a ná be fuu kɛ ha mɛ. Jehanɛ hu ɔ, e suɔ nɛ fɔli nɛ a po a bimɛ a he piɛ kɛ je níhi nɛ maa ye mɛ awi ɔ he, nɛ́ a da Baiblo sisi tomi mlaahi a nɔ kɛ tsɔse mɛ. (Abɛ 1:8) Yehowa de tsɛmɛ ke: ‘Nyɛɛ ya nɔ nɛ nyɛɛ hi [nyɛ bimɛ ɔmɛ] lɛe ngɛ . . . Yehowa ga womi mi.’ (Kane Efeso Bi 6:4.) Yehowa bua jɔɔ ke fɔli da e blɔ tsɔɔmi nɔ kɛ tsɔse a bimɛ, nɛ a kɛ jamɛ a blɔ nya ní tsumi ɔ fɔ we ni kpahi a nɔ.
2. Mɛni ga womi nɛ Yehowa kɛ ha bimɛ?
Yehowa de bimɛ ke: “Nyɛɛ bu nyɛ fɔli ɔmɛ tue.” (Kane Kolose Bi 3:20.) Ke bimɛ jeɔ bumi kpo kɛ tsɔɔ a fɔli, nɛ a buɔ mɛ tue ɔ, a haa nɛ a fɔli ɔmɛ kɛ Yehowa bua jɔɔ. (Abɛ 23:22-25) Benɛ Yesu ji jokuɛyo ɔ, e pee nɔ hyɛmi nɔ́ kpakpa nɛ jokuɛwi ma nyɛ maa kase. E ngɛ mi kaa yayami ko be Yesu he mohu lɛɛ, se e ba e he si ha e fɔli ɔmɛ, nɛ e bu mɛ tue.—Luka 2:51, 52.
3. Mɛni o maa pee konɛ o weku ɔ nɛ hɛ kɛ su Mawu he?
Ke fɔlɔ ji mo ɔ, atsinyɛ jemi ko be he kaa o suɔ nɛ o bimɛ ɔmɛ nɛ a suɔ Yehowa kaa bɔ nɛ mo hu o suɔ lɛ ɔ. Kɛ o ma plɛ kɛ su oti nɛ ɔ he ha kɛɛ? Ja o pee nɔ́ nɛ Baiblo ɔ de nɛ ɔ. E de ke: ‘Nyɛɛ tsɔɔ nyɛ bimɛ [Yehowa munyu ɔ]. Nyɛɛ sɛɛ he ní be nɛ nyɛ ngɛ we mi, kɛ be nɛ nyɛ hia blɔ.’ (5 Mose 6:7) Kaa bɔ nɛ o le ɔ, loko o bimɛ ɔmɛ ma kai munyu ko ɔ, ja o ti mi ha mɛ si abɔ. Ngmami nɛ ɔ ngɛ tsɔɔe kaa, be fɛɛ be ɔ, e sa nɛ o hla he blɔhi nɛ o kɛ o bimɛ ɔmɛ nɛ sɛɛ Yehowa he ní. E maa hi kaa nyɛ maa to be nɛ́ daa otsi ɔ nyɛ bla kɛ kase Baiblo ɔ kaa weku. Ke nyɛ be bimɛ po ɔ, nyɛ ma ná he se ke nyɛ to blɔ nya nɛ nyɛ bla kɛ kase Mawu Munyu ɔ daa otsi.
MOO KASE BABAUU
Moo hyɛ ga womi komɛ nɛ maa ye bua konɛ nɔ fɛɛ nɔ ngɛ weku ɔ mi ɔ bua nɛ jɔ, nɛ́ e nu he kaa e ngɛ slɔkee.
4. Moo je suɔmi mi kɛ tsɔse o bimɛ
Bi tsɔsemi be gbɔjɔɔ be komɛ. Se kɛ Baiblo ɔ maa ye bua mo ha kɛɛ? Nyɛɛ kane Yakobo 1:19, 20, nɛ́ nyɛ susu sane bimihi nɛ nyɛɛ se nɛ ɔmɛ a he:
-
Mɛni fɔli maa pee kɛ je suɔmi kpo ke a kɛ a bimɛ ngɛ ní sɛɛe?
-
Mɛni he je nɛ e sɛ nɛ fɔlɔ ko nɛ tsɔse e bi be mi nɛ fɔlɔ ɔ mi mi fu ɔ? a
5. Moo po o bimɛ a he piɛ
Bɔ nɛ pee nɛ o po o bimɛ ɔmɛ a he piɛ ɔ, e he hia wawɛɛ nɛ o kɛ a kpɛti nɔ fɛɛ nɔ nɛ sɛɛ bɔmi nami he ní. Enɛ ɔ peemi he ma nyɛ maa wa. Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
-
Mɛni he je nɛ e he wa ha fɔli komɛ kaa a kɛ a bimɛ maa sɛɛ bɔmi nami he ní ɔ?
-
Mɛni blɔ nɔ nɛ fɔli komɛ gu nɛ a kɛ a bimɛ sɛɛ bɔmi nami he ní?
Kaa bɔ nɛ a gba kɛ fɔ si ɔ, yi wu tso ní peepeehi ngɛ nɔ yae wawɛɛ nitsɛ ngɛ je ɔ mi. Nyɛɛ kane 2 Timoteo 3:1, 13, nɛ́ nyɛ susu sane bimi nɛ ɔ he:
-
Nimli yayamihi nɛ a tu a he munyu ngɛ kuku 13 ɔ mi ɔ, a kpɛti ni komɛ kɛ jokuɛwi náa bɔmi aloo a peeɔ mɛ nisɛ níhi. Enɛ ɔ he ɔ, mɛni he je nɛ e he hia nɛ fɔli nɛ a tsɔɔ a bimɛ bɔmi nami he ní, kɛ bɔ nɛ a ma plɛ kɛ po a he piɛ ngɛ nihi nɛ peeɔ jokuɛwi nisɛ ní ɔ a he ɔ?
Anɛ o le lo?
Yehowa Odasefohi pee womihi kɛ videohi nɛ yeɔ bua fɔli nɛ a tsɔɔ a bimɛ bɔmi nami he ní, konɛ a po a he piɛ kɛ je nihi nɛ peeɔ jokuɛwi nisɛ ní ɔ he. Kaa nɔ hyɛmi nɔ́ ɔ, hyɛ:
-
Moo Po O Bimɛ A He Piɛ (video)
-
“Moo Tsɔɔ O Bimɛ Bɔmi Nami He Ní” (O Hɛ Nɛ Tsɛ̃! No. 5 2016)
6. Moo bu o fɔli
Bimɛ ma nyɛ ma je bumi kpo kɛ ha a fɔli kɛ gu bɔ nɛ a kɛ mɛ tuɔ munyu ha a nɔ. Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
-
Mɛni he je nɛ se nami ngɛ he kaa bimɛ kɛ a fɔli maa sɛɛ ní ngɛ bumi mi ɔ?
-
Mɛni blɔ nɔ nɛ bimɛ maa gu nɛ a kɛ a fɔli maa tu munyu ngɛ bumi mi?
Nyɛɛ kane Abɛ 1:8, nɛ́ nyɛ susu sane bimi nɛ ɔ he:
-
Kɛ e sa nɛ bimɛ nɛ a pee a ní ha kɛɛ ke a fɔli tsɔɔ mɛ nɔ́ nɛ e sa nɛ a pee?
7. Nyɛ bla kɛ kase Baiblo ɔ kaa weku
Wekuhi nɛ a sɔmɔɔ Yehowa a toɔ be pɔtɛɛ ko ngɛ otsi ɔ mi nɛ a blaa kɛ kaseɔ Baiblo ɔ. Mɛni nyɛ ma nyɛ maa pee ngɛ nyɛ weku Mawu jami ɔ mi? Mo je VIDEO ɔ, nɛ́ nyɛ susu sane bimihi nɛ nyɛɛ se nɛ ɔmɛ a he.
-
Mɛni weku ko ma nyɛ maa pee konɛ a nyɛ nɛ a pee Weku Mawu Jami daa otsi?
-
Mɛni fɔlɔ ko maa pee konɛ a weku Mawu jami ɔ nɛ ye bua nɔ fɛɛ nɔ ngɛ weku ɔ mi, nɛ́ e pee bua jɔmi hulɔ?—Hyɛ foni nɛ ngɛ ní kasemi nɛ ɔ sisije ɔ.
-
Mɛni ma nyɛ ma ha nɛ e he nɛ wa ha o weku ɔ kaa nyɛ ma bla kɛ kase ní?
Ngɛ blema Israel ɔ, Yehowa hyɛɔ blɔ kaa wekuhi nɛ a sɛɛ Ngmami ɔ he ní be fɛɛ be. Nyɛɛ kane 5 Mose 6:6, 7, nɛ́ nyɛ susu sane bimi nɛ ɔ he:
-
Kɛ o weku ɔ kɛ sisi tomi mlaa nɛ ɔ ma tsu ní ha kɛɛ?
Ní komɛ nɛ nyɛ ma nyɛ maa pee ngɛ nyɛ weku Mawu jami ɔ mi:
-
Nyɛ susu níhi nɛ a maa kase ngɛ asafo mi kpe sisi ɔ he.
-
Nyɛɛ kane Baiblo mi sane ko nɛ o weku ɔ bua maa jɔ he nɛ nyɛ susu he.
-
Ke o ngɛ bimɛ tsɔwi ɔ, moo gbla aloo moo print jokuɛwi a ní kasemi níhi nɛ ngɛ jw.org ɔ nɔ ɔ eko nɛ o kɛ tsɔɔ mɛ ní.
-
Ke o ngɛ bimɛ nɛ a ye kɛ je jeha 13 kɛ ya si 19 ɔ, nyɛ susu munyu ko nɛ ngɛ jw.org ɔ nɔ nɛ kɔɔ nihewi kɛ yihewi a he ɔ he.
-
Nyɛɛ pee Baiblo mi sane ko he drama.
-
Nyɛɛ hyɛ video ko ngɛ jw.org ɔ nɔ nɛ nyɛ susu he.
NI KOMƐ DEƆ KE: “Jokuɛwi be nyɛe maa nu Baiblo ɔ sisi.”
-
Ke nɔ ko de jã a, mɛni o ma de?
NYA MWƆMI
Yehowa suɔ nɛ fɔli nɛ a suɔ a bimɛ, a tsɔse mɛ, nɛ a po a he piɛ. E suɔ nɛ bimɛ nɛ a je bumi kpo kɛ tsɔɔ a fɔli, nɛ a bu mɛ tue. Jehanɛ hu ɔ, e suɔ kaa wekuhi nɛ a pee kake kɛ kase e munyu ɔ.
Mi Nylɔmi
-
Mɛni blɔ nɔ fɔli maa gu kɛ tsɔse a bimɛ nɛ a po a he piɛ?
-
Mɛni blɔ nɔ bimɛ maa gu kɛ je bumi kpo kɛ tsɔɔ a fɔli?
-
Ke nyɛ to be kɛ pee weku Mawu jami daa otsi ɔ, kɛ nyɛ ma ná he se ha kɛɛ?
NÍ KPAHI NƐ MAA YE BUA MO
Mɛni níhi lɛ maa ye bua o bimɛ konɛ e dla mɛ be mi nɛ a ngɛ wae?
“Níhi Ekpa Nɛ E He Hia Nɛ Jokuɛwi Nɛ A Kase” (O Hɛ Nɛ Tsɛ̃! No. 2 2019)
Moo hyɛ ga womi nɛ Baiblo ɔ kɛ ha nihi nɛ a hyɛɔ a fɔli nɛ a wa a nɔ ɔ.
“Mɛni Baiblo ɔ De Ngɛ Fɔli Nɛ A Wa a A Nɔ Hyɛmi He?” (Munyu nɛ ɔ ngɛ Intanɛti ɔ nɔ)
Moo hyɛ blɔ nɔ nɛ nyumu ko nɛ jinɛ e li bɔ nɛ a tsɔseɔ bimɛ ha a gu kɛ tsɔse e bimɛ saminya.
Yehowa Tsɔɔ Wɔ Bɔ Nɛ E Sa Kaa Waa Fia Wa Weku ɔ Kɛ Ma Si Ha (5:58)
Moo hyɛ nɔ́ nɛ tsɛmɛ ma nyɛ maa pee konɛ huɛ bɔmi nɛ ngɛ a kɛ a bimɛ a kpɛti ɔ mi nɛ wa.
“Kɛ Tsɛmɛ Ma Plɛ Kɛ Hɛ Kɛ Su A Bimɛ A He Ha Kɛɛ?” (Hwɔɔmi Mɔ, November 1, 2011)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
