OZUMALƐDƖYƐ 50
Kɛ Ɩkɛyɛ Na Wʋ Abusunwa Bɛ Anyɩ Iale a?—Ɔfʋã 2
Nnwuakula dɩ akyɛdɩ mɔɔ bɔzʋ̃ Gyehova ɛkɛnɩ. Ikilaa ɔhʋanɩ kɛɛ, awʋvʋlɔ kehila ɔzɔ akyɛdɩ nɩ zʋ bʋwɔ. Gyehova ma awʋvʋlɔ fʋlɔdulɛ mɔɔ nɣɛlɛbɛ wɔ numɔ mɔɔ ɩkɔwʋwa bɛ ma bɛkɛyɛ zɔ. Yɩ fʋlɔdulɛ sʋ̃ bʋwa nnwuakula ma bɔnwʋ mɔɔ bɛyɛ a, ɩkɛma abusunwa yi nu kɛyɛ anyɩnlɩlelɛ.
1. Mɩnla fʋlɔdulɛ yɛ Gyehova fa ma awʋvʋlɔ a?
Gyehova ikilaa ɔhʋanɩ kɛɛ awʋvʋlɔ kɔlɔ bo nnwuakula na bɛanyia mmɩlɩ sʋ̃maa bɛama bɛ. Akʋ̃ sʋ̃, ɩpɛ kɛɛ awʋvʋlɔ bɔ bo nnwuakula nwʋ banɩ wɔ asianɩ nwʋ na bɛfa Bayɩbʋlʋ nu egyinalɛzʋ-ndwokɔ bɛtɩdɩ bɛ. (Ɛɣɛlɛwulɛ 1:8) Ɩkã ikile ɛzɩlɛmaa kɛɛ: ‘Bɛdɩdɩ [bo nnwuakula] kɛmɔ ye Niibenyia ɩpɛ yɩ nɩ.’ (Kɩnga Ɛfɩsɛsɩmaa 6:4.) Sɛ awʋvʋlɔ tiye odwokɔ eyi na bɛáfa bɛ asɛdɩ mɔɔ bɛlɛ kɛɛ bɛzabɛ bɛkɛdɩdɩ bo nnwuakula nɩ bɛma abiye fʋlɔ a, ɩma Gyehova anyɩ de baaba.
2. Mɩnla fʋlɔdulɛ yɛ Gyehova fa ma nnwuakula a?
Gyehova tu nnwuakula fʋlɔ kɛɛ: ‘Bediye bɛ awʋvʋlɔ bo odwokɔ.’ (Kɩnga Kolosiyiamaa 3:20.) Sɛ nnwuakula di bɛ awʋvʋlɔ nni na betiye bɛ a, ɩma Gyehova nɩɩ bɛ awʋvʋlɔ munwala bɛ anyɩ de. (Ɛɣɛlɛwulɛ 23:22-25) Gyisɛsɩ wɔ azɩlɛ yɩ zʋ nɩ, ɩyɛlɩ ndianwʋba mɔɔ nnwuakula kɔhʋla kozuma. Ɩwɔ numɔ kɛɛ nɩ tanɩ íni yɩ nwʋ dɩyɛ, naasʋ̃ ilili yɩ awʋvʋlɔ nni na idiyeli bɛ ɩávalɩ nwʋmɔ kɛɛ nɩ bɔtɔ sini nɩ.—Luuku 2:51, 52.
3. Kɛ abusunwa nɩ, kɛ ɩkɛyɛ na bɛaɣike Nyamɩnlɩ a?
Sɛ ɛdɩ ɔwʋvʋlɔ a, pɩlazunɛ bela íni nwʋmɔ kɛɛ ɛpɛ kɛɛ wu nnwuakula dɔ Gyehova kɛmɔ ɔdɔ yɩ nɩ. Kɛ ɛkɛyɛ na wʋayɛ zɔ a? Fá Bayɩbʋlʋ nu odwokɔ eyi yɛ́ egyima: “Fá [Gyehova yɩ odwokɔ] wula bɛ ahʋnlɩnɩ nu, na kã nwʋmɔ odwokɔ kile bɛ wɔ mmɩlɩ mɔɔ bɔwɔ awudo, [nɩɩ] mmɩlɩ mɔ boluwa ɔhʋanɩ zʋ.” (Ditilonɔmi 6:7) Sɛ bɛkã kɛɛ “fa wula bɛ ahʋnlɩnɩ nu a,” kɛ yɩ tʋ kile a? Ikile kɛɛ bɛkɛda bekedĩ mɔɔ bɛlɛ bekilehilee bo nnwuakula nɩ nu mbɔmɩ sʋ̃maa. Sɛ ɛkã odwokɔ be kile wʋ mma na wʋábɛ kɛɛ bɛ ɛɣɛɛlɛ fi a, mɩnla yɛ ɛkɛyɛ a? Ɩsɛ kɛɛ ɛta tĩ numɔ kile bɛ. Ɔzɔ ɛhɛlɛlɛ odwokɔ yɩ kile kɛɛ, ɩsɛ kɛɛ bɛpɩbɛ ɔhʋanɩ azʋlɔtʋ mɔɔ ɩkɛma bɛkɛda bɛkɛhã Gyehova nwʋ odwokɔ bekehile bo nnwuakula. Mɔɔ ɩkɔwʋwa ma bɛkɛyɛ eyi yɛ lɛ kɛɛ, bɛkɛyɛ nhyɩhyɛlɩyɛ ma bɛ abusunwa yɩ kɔwɔ numɔ kozuma Bayɩbʋlʋ dapɛnɩ bela. Sɛ béni nnwuakula po na bɔbɔ numɔ bosuma Nyamɩnlɩ Odwokɔ yɩ dapɛnɩ bela a, sa ɩbʋwa bɛ paa.
SUMÁ SƲ̃MAA
Kilá nninyeni azʋlɔtʋ mɔɔ ɩkʋla ɩbʋwa abusunwa ma benyia banɩwɔlɛ nɩɩ anyɩnlɩlelɛ.
4. Ɔzʋ̃ ɔlɔlɛ nu tɩdɩ wʋ nnwuakula
Nnwuakula ɛdɩdɩlɛ ɩ́la azɩ. Mɩnla ɔhʋanɩ zʋ yɛ Bayɩbʋlʋ kɔhʋla kɔwʋwa wʋ a? Kɩnga Gyemisi 1:19, 20 (NWT), na akʋ̃ bozunzú ndwokɔɣizialɛ eyimmɔ nwʋ:
-
Sɛ awʋvʋlɔ bɛ nɩɩ bɛ mma bɔ nkɔmmɔ a, kɛ ɩkɛyɛ na bɛahile kɛɛ bɔdɔ bɛ a?
-
Mɩnla ti mɔɔ íni kɛɛ awʋvʋlɔ bɛtɩnyɩa bo nnwuakula wɔ mmɩlɩ mɔ bɛva ɛya a? a
5. Bɔ́ wʋ nnwuakula nwʋ banɩ
Sɛ ɔkɔwɔ wʋ nnwuakula nwʋ banɩ a, ihyinyia paa kɛɛ ɛ nɩɩ bɛ bɔ nna nu nkitanwʋlilɛ nwʋ nkɔmmɔ. Ɩyɛ a, eyi ɩyɛlɛ ɩ́la azɩ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Mɩnla ti mɔɔ ɩyɛ sɩ ɩma awʋvʋlɔ be kɛɛ bɛ nɩɩ bo nnwuakula kɛhã nna nwʋ odwokɔ a?
-
Mɩnla ɔhʋanɩ yɛ awʋvʋlɔ be boluwa zʋ bɛ nɩɩ bɛ mma wɔ nna nwʋ nkɔmmɔ a?
Bayɩbʋlʋ hanlɩ dianlɩ kɛnɩ kɛɛ, tanɩyɛlɛ kɔhɔ yɩ anyunu wɔ Setanɩ oyuwadɩ yi nu, na ɔzɔ la yɛ ɩkɔlɩɩ ɔzʋlɔ nnɛ a. Kɩnga 2 Timoti 3:1, 13, na akʋ̃ bozunzú odwokɔɣizialɛ eyi nwʋ:
-
Amumuyɛmaa mɔɔ bɛhanlɩ bɔ nwʋ odwokɔ wɔ nkyɩkyɛmi 13 nɩ, bɛfa nna nwʋ odwokɔ bedide nnwuakula anzɛnyɩɩ bɛ nɩɩ bɛ da. Sɛ ɔzɔ a, mɩnla ti yɛ ihyinyia kɛɛ awʋvʋlɔ bɛ nɩɩ bo nnwuakula bɔ nna nwʋ nkɔmmɔ na bɔbʋwa bɛ ma bɔnwʋ kezimɔ bɔkɔwɔ bɔ nwʋ banɩ wɔ amumuyɛmaa nwʋ a?
Ezi a?
Gyehova Dasɩvʋlɔmaa bɛyɛ awuuku nɩɩ vidiyo sʋ̃maa mɔɔ ɩbʋwa awʋvʋlɔ ma bekilehile bo nnwuakula nna nwʋ odwokɔ na bɛawɔ bɛ mma nwʋ banɩ wɔ amumuyɛmaa nwʋ. Kɛ ndianwʋ nɩ, kilá:
-
“Kilehilé Wʋ Nnwuakula Nna Nwʋ Odwokɔ” (Awake! No. 5 2016)
6. Bu wʋ awʋvʋlɔ
Nnwuakula, mmɩlantɩyɛ nɩɩ nɣɛdɛkɛ kɔhʋla kehile kɛɛ bobu bɛ awʋvʋlɔ iluwa kezimɔ bɛ nɩɩ bɛ kɛdɩndɛ nɩ zʋ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Sɛ kuakula be nɩɩ yɩ awʋvʋlɔ tɩndɛ wɔ annidi ɔhʋanɩ zʋ a, mɩnla mfasʋ yɛ ɩwɔ zʋ a?
-
Sɛ kuakula be nɩɩ yɩ awʋvʋlɔ tɩndɛɛ a, kɛ ɩkɛyɛ na iahile kɛɛ ibu bɛ a?
Kɩnga Ɛɣɛlɛwulɛ 1:8, na akʋ̃ bozunzú odwokɔɣizialɛ eyi nwʋ:
-
Sɛ kuakula be yɩ awʋvʋlɔ ma ɔhʋanɩhilelɛ yɩ a, kɛ ɩsɛ kɛɛ ɩyɛ yɩ dɩyɛ ise a?
7. Ɛ nɩɩ wʋ abusunwa bɔwɔ́ numɔ bɔzʋ̃mɩ Gyehova
Mmusunwa mɔɔ bɛdɩ Gyehova Dasɩvʋlɔmaa nɩ, bɛyɩ mmɩlɩ besiye ahanlɩ dapɛnɩ bela bɛfa bosuma Bayɩbʋlʋ yɩ. Kɛ bɛyɛ yɩ bese a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Kɛ ɩkɛyɛ na abusunwa be bɛahʋla bɛayɛ abusunwa ɔzʋ̃mɩnlɛ dapɛnɩ bela a?
-
Mɩnla yɛ ɔwʋvʋlɔ be kɔhʋla kɛyɛ na ama yɩ abusunwa ɔzʋ̃mɩnlɛ ɩavalɩ yɩ abusunwa yɩ nwʋ na ɩayɛ anyɩnlɩlelɛ a?—Kilá mfonyini mɔɔ ɩwɔ ozumalɛdɩyɛ eyi yɩ tʋwɔlɛ nɩ.
-
Mɩnla yɛ ɩkɔhʋla ɩkɛma ɩkɛyɛ sɩ kɛɛ, ɛ nɩɩ wʋ abusunwa bokozuma dɩyɛ bɔkɔwɔ nu a?
Wɔ tɩɩtɩɩ Yizilaya nɩ, nɩ Gyehova kila ɔhʋanɩ kɛɛ mmusunwa kozunzu Ɛhɛlɛlɛ Odwokɔ yɩ nwʋ eɣile bela. Kɩnga Ditilonɔmi 6:6, 7, na akʋ̃ bozunzú odwokɔɣizialɛ eyi nwʋ:
-
Kɛ ɩkɛyɛ na wʋava egyinalɛzʋ-odwokɔ eyi wʋali egyima a?
Adwɩnɩhilelɛ ma abusunwa ɔzʋ̃mɩnlɛ:
-
Sa bɔkʋla besiyeziye bɔ nwʋ bɛma asafʋ dɩyɛzumanlɛ.
-
Sa bɔkʋla bɛkɩnga na bɛazunzu Bayɩbʋlʋ nu odwokɔ be mɔɔ wʋ abusunwa yɩ bɛ anyɩ keleli nwʋmɔ.
-
Sɛ ɔwɔ nnwuakula ngyɩkɩ̃ɩ̃ ngyɩkɩ̃ɩ̃ a, sa ɔkʋla ɔtwɩ̃ anzɛnyɩɩ ɛpɩlɩntɩ mɔɔ nnwuakula fa suma dɩyɛ wɔ jw.org zʋ ɛma bɛ.
-
Sɛ ɔwɔ nnwuakula mɔɔ bɛ anyɩ dɩ a, sa ɔkʋla ɛ nɩɩ bɛ sunzu ndwokɔ mɔɔ ɩfalɩ mmɩlantɩyɛ nɩɩ nɣɛdɛkɛ nwʋ mɔɔ ɩwɔ jw.org zʋ nɩ nwʋ.
-
Ɛ nɩɩ wu nnwuakula yɛ Bayɩbʋlʋ nu odwokɔ be nwʋ dɩlama wɔ awudo.
-
Sa bɔkʋla bekila vidiyo be mɔɔ ɩwɔ jw.org zʋ na bɛazunzu nwʋmɔ.
ABIYEMMƆ BƐKÃ KƐƐ: “Ɩyɛ sɩ kɛɛ nnwuakula kɛdɩ Bayɩbʋlʋ yɩ tʋ.”
-
Mɩnla yɛ ɛkɛhã a?
YƖ DƆKƆWƆLƐ
Gyehova pɛ kɛɛ awʋvʋlɔ dɔ bo nnwuakula, bɛtɩdɩ bɛ, na bɔbɔ bɔ nwʋ banɩ. Nnwuakula sʋ̃, ɩsɛ kɛɛ bobu bɛ awʋvʋlɔ na betiye bɛ. Akʋ̃ sʋ̃ ɩpɛ kɛɛ mmusunwa bɔ numɔ sʋ̃mɩ yɩ.
Kɛ Okowuwa Ekeze a?
-
Kɛ ɩkɛyɛ na awʋvʋlɔ bɛadɩdɩ bo nnwuakula na bɛawɔ bɔ nwʋ banɩ a?
-
Kɛ ɩkɛyɛ na nnwuakula bɛahile kɛɛ bobu bɛ awʋvʋlɔ a?
-
Sɛ abusunwa be yɛ nhyɩhyɛlɩyɛ suma Bayɩbʋlʋ dapɛnɩ bela a, mɩnla mfasʋ yɛ bekenyia a?
PƖBƐ́ SƲ̃MAA
Mɩnla yɛ sɛ wʋ ɣa suma a, ɩkɔhʋla ikeziyeziye yi wɔ mmɩlɩ mɔ inyii nɩ a?
“Nninyeni Ahyiã Mɔɔ Ihyinyia Kɛɛ Nnwuakula Suma” (Awake! No. 2 2019)
Kilá fʋlɔdulɛ mɔɔ Bayɩbʋlʋ fa ma bɛzabɛ mɔɔ bekilaa bɛ awʋvʋlɔ mɔɔ bɛ alʋbɔ hɔ anyunumi nɩ.
Kilá kezimɔ benyia be mɔɔ nɩ ízi kezimɔ ɩkɛdɩdɩ yɩ nnwuakula nɩ, ɩɣa ɩyɛlɩ ɛzɩlɛba.
Gyehova Yɩ Ehilehilelɛ Ɩma Yɛhʋla Yɛyɩkyɩ Yɛ Abusunwa (5:58)
Kilá kezimɔ ɛzɩlɛmaa kɔhʋla kɛhyɛ bɛ nɩɩ bo nnwuakula mmenyia bɔ ɔhɔnwʋvalɛ nu ɛzɩzɩbɛ.
“Kɛ Ɩkɛyɛ Na Ɛzɩlɛmaa Bɛahʋla Bɛava Bɛ Mma Mmenyia Ɔhɔnwʋ a?” (Ɔwɩɛnɩlɛ Aɣanɩ, November 1, 2011)
a Wɔ Bayɩbʋlʋ nu nɩ, “ɛdɩnyɩanlɛ” ikile kɛɛ bɛkɛdɩnɣɛ abiye, bɛkɛva ɔhʋanɩhilelɛ bɛkɛma yɩ, na bɛawʋwa yɩ ma ɩazɩnza wɔ subanɩ tanɩ be nwʋ. Iáhile kɛɛ bɛkɛyɛ abiye ayɛkwa anzɛnyɩɩ bekebila yɩ.—Ɛɣɛlɛwulɛ 4:1.
