ልጆች የይሖዋ ስጦታዎች ናቸው። ይሖዋ፣ ወላጆች ስጦታ የሆኑትን ልጆቻቸውን በእንክብካቤ እንዲይዙ ይጠብቅባቸዋል። ደግሞም ወላጆችን በዚህ ረገድ ሊረዳቸው የሚችል ጠቃሚ ምክር ሰጥቷል። እሱ የሰጠው ምክር ልጆችም የቤተሰባቸው ሕይወት አስደሳች እንዲሆን ምን ማድረግ እንዳለባቸው ይጠቁማል።

1. ይሖዋ ለወላጆች ምን ምክር ሰጥቷል?

ይሖዋ፣ ወላጆች ልጆቻቸውን እንዲወዱና የቻሉትን ያህል ጊዜ ከእነሱ ጋር እንዲያሳልፉ ይጠብቅባቸዋል። በተጨማሪም ልጆቻቸውን ከጉዳት እንዲጠብቁ እንዲሁም የመጽሐፍ ቅዱስን መሠረታዊ ሥርዓቶች ተጠቅመው እንዲያሠለጥኗቸው ይፈልጋል። (ምሳሌ 1:8) አባቶችን ‘ልጆቻችሁን በይሖዋ ምክር አሳድጓቸው’ ብሏቸዋል። (ኤፌሶን 6:4⁠ን አንብብ።) ይሖዋ ወላጆች የእሱን መመሪያ ተከትለው ልጆቻቸውን ሲያሳድጉ ይደሰታል፤ ደግሞም ይህን ኃላፊነት ለሌላ ለማንም እንዲሰጡ አይፈልግም።

2. ይሖዋ ለልጆች ምን ምክር ሰጥቷል?

ይሖዋ ልጆችን “ለወላጆቻችሁ ታዘዙ” ብሏቸዋል። (ቆላስይስ 3:20⁠ን አንብብ።) ልጆች ወላጆቻቸውን የሚያከብሩና የሚታዘዙ ከሆነ ይሖዋንም ሆነ ወላጆቻቸውን ያስደስታሉ። (ምሳሌ 23:22-25) ኢየሱስ ልጅ ሳለ በዚህ ረገድ ጥሩ ምሳሌ ትቷል። ፍጹም የነበረ ቢሆንም ወላጆቹን ይታዘዛቸውና ያከብራቸው ነበር።—ሉቃስ 2:51, 52

3. በቤተሰብ ደረጃ ወደ ይሖዋ መቅረብ የምትችሉት እንዴት ነው?

ወላጅ ከሆንክ ልጆችህ ልክ እንደ አንተ ይሖዋን እንዲወዱ መርዳት እንደምትፈልግ ጥርጥር የለውም። ታዲያ ይህን ግብ ማሳካት የምትችለው እንዴት ነው? መጽሐፍ ቅዱስ እንደሚከተለው በማለት የሰጠውን ምክር ተግባራዊ በማድረግ ነው፦ ‘የይሖዋን ትእዛዛት በልጆችህ ውስጥ ቅረጻቸው፤ በቤትህ ስትቀመጥና በመንገድ ላይ ስትሄድ ስለ እነሱ ተናገር።’ (ዘዳግም 6:7) “መቅረጽ” የሚለው ቃል አንድን ነገር ደጋግሞ በመናገር ማስተማርን ያመለክታል። ልጆች አንድን ነገር እንዲያስታውሱ ከተፈለገ ደጋግሞ መናገር እንደሚያስፈልግ ሳታስተውል አትቀርም። ይህ ጥቅስ ለልጆችህ ስለ ይሖዋ ደጋግመህ ለመናገር የሚያስችሉህን አጋጣሚዎች መፈለግ እንዳለብህ ይጠቁማል። በየሳምንቱ በቤተሰብ ለይሖዋ አምልኮ የምታቀርቡበት ጊዜ መመደባችሁ ጠቃሚ ነው። ልጆች ባይኖሩህም በየሳምንቱ የአምላክን ቃል የምታጠናበት ጊዜ መመደብህ ይጠቅምሃል።

 ጠለቅ ያለ ጥናት

 6. ወላጆችህን አክብር

 ማጠቃለያ

ይሖዋ ወላጆች ልጆቻቸውን እንዲወዱ፣ እንዲያሠለጥኑና ከጥቃት እንዲጠብቁ ይፈልጋል፤ በተጨማሪም ልጆች ወላጆቻቸውን እንዲያከብሩና እንዲታዘዙ፣ ቤተሰቦች ደግሞ በአንድነት ለእሱ አምልኮ እንዲያቀርቡ ይጠብቅባቸዋል።

ክለሳ

• ወላጆች ልጆቻቸውን ማሠልጠንና ከጥቃት መጠበቅ የሚችሉት እንዴት ነው?

• ልጆች ወላጆቻቸውን እንደሚያከብሩ ማሳየት የሚችሉት እንዴት ነው?

• በቤተሰብ ደረጃ ለይሖዋ አምልኮ ለማቅረብ በየሳምንቱ የተወሰነ ጊዜ መመደብ ምን ጥቅም አለው?