DUNGU 50
¿Chumabüimi tami pu che ñi ayüucüleal? (Epu conchi dungu)
Pu püchüqueche quiñe regalo reque beli Jehová mu cüpalu. Jehová ayüqui pu chau ca ñuque ñi cüme inaduamabel tañi pu püchüqueche, beimu eluquebi cümeque ngülam. Jehová cabei eluquebi cümeque ngülam tati pu botüm ca ñahue tañi inaabel, bemngechi tañi com pu che ayüucüleai.
1. Jehová, ¿chem ngülamtuquebi tati pu chau ca ñuque?
Jehová ayüqui pu chau ca ñuque ñi piuqueyeabel tañi pu püchüqueche ca elquiantüal tañi müleal quidu engün mu. Cabei Jehová ayüqui ñi cuñiutucuabel billque hueyaque dungu mu ca quelluabel (incaabel) tañi inaal Biblia ñi ngülam (Proverbios 1:8). Biblia eipibi pu chau: “Trengümabimün [tamün botüm ca ñahue] Jehová tañi ngülam mu” (papiltunge Efesios 6:4). Tañi ayühulabel Jehová, chau ca ñuque inaabingu tañi ngülam ñi trengümabel tañi pu püchüqueche ca elbal-laabi caquelu pu che ñi trengümatu engün.
2. Jehová, ¿chem ngülam eluquebi tati pu püchüqueche?
Jehová eipibi pu püchüqueche, “mupituqueabimün tamün chau ca tamün ñuque” (papiltunge Colosenses 3:20). Tati pu püchüqueche inanebile ñi eipietu tañi chau ca ñuque, müna ayühulabi engu ca ayühulabi Jehová (Proverbios 23:22-25). Jesús inabali, quidu huelulcauquelabüi, huelu tañi chau ca ñuque huelulcauquebüi. Bemngechibülu ume, Jesús yamnebi ca allcütubi engu (Lucas 2:51, 52).
3. Tami pu che, ¿chumabüi tañi doi bülconal Jehová mu?
Eimi nielmi püchüqueche, ayüabüimi tañi piuqueyepoabel engün Jehová, eimi reque. Beimu ¿chumabüimi tami quelluabel engün? Inaneabimi Biblia tañi ngülam eipilu: “Quimelelabimi tami pu püchüqueche, ca ngütramelabimi anücünohulmi tami ruca mu, ca miyahulmi rüpü mu, ca cudulmi, ca huitralmi” (Deuteronomio 6:7). Tami cüme quimelelabel tami pu püchüqueche, billque upa eipiabimi tami cüpa quimelelabel engün. Beimu tübachi huirin tripalu Biblia mu eipi tami ngütramcaabel bill antü tami pu püchüqueche Jehová mu. Cabei müna cüme dungungi bill semana tami elquiantüal tañi papiltol Biblia tami pu che mu. Nienolmi ume püchüqueche ca bemabüimi.
DOI CÜME QUIMNGE
Ngütramcaaiñ quiñeque ngülam tami pu che ñi cüme beleal ca ayüucüleal.
4. Com tami piuque mu trengümabimi tami pu püchüqueche
Trengümabel quiñe püchüche müna cüdaungeabüi. Beimu Biblia, ¿chumngechi quelluabeimu? Papiltoiñ Santiago 1:19, 20. Papiltungele hula ngütramcaabiiñ tübachi epu ramtun:
-
Pu chau ca ñuque ngütramcabile tañi pu püchüqueche, ¿chumngechi pengelelabüingün tañi piuqueyenebel engün?
-
Chau cam ñuque petu lladcülele, ¿chemu cümelaabüi norümbile tañi pu püchüqueche?
5. Cuñiutucunebinge tami pu püchüqueche
Yehuen-ngele ume, quimelelabimi tami pu püchüqueche cudumuhun dungu mu. Quintulbe tati VIDEO. Quintulngele hula ngütramcaabiiñ tübachi epu ramtun:
-
¿Chemu cüdaungeabüi pu chau ca ñuque ñi ngütramcaabel tañi pu püchüqueche cudumuhun dungu mu?
-
¿Chem dungu quellueyu pu chau ca ñuque ñi ngütramcaabel tañi pu püchüqueche tübachi dungu mu?
Biblia tañi eipin, tübachi Mapu ñi ngünenebel Satanás doi hueya amuli. Papiltoiñ 2 Timoteo 3:1, 13. Papiltungele hula ngütramcaabiiñ tübachi pu ramtun:
-
Quiñeque hueyaque che ngütramcangelu versiculo 13 mu, nüntuquebilu tati pu püchüqueche. Beimu, ¿chemu manelbali pu chau ca ñuque tañi ngütramcaabel ñi pu püchüqueche cudumuhun dungu mu? Ca ¿chemu cümeabüi ñi quimelelngeal chumngechi incahuabüingün?
¿Quimquebüimi?
Pu dunguquelu iñingen Jehová nentuingün billque dungu quelluquebilu pu chau ca ñuque ñi ngütramcaabel tañi pu püchüqueche cudumuhun dungu mu ca chumngechi tañi incahual engün. Tübamu müli cüla dungu:
-
“Tami ngütramcalelabel tami pu püchüqueche cudumuhun dungu mu, ¿chem dungu quelluabeimu?” (¡Tami quimabel! num. 5 2016 tripantu)
6. Yamneabimi tami chau ca ñuque
Pu püchüqueche ca pu huechequeche pengelabüi tañi yamneabel chau ca ñuque chumngechi tañi dunguquebel engu. Quintulbe tati VIDEO. Quintulngele hula ngütramcaabiiñ tübachi epu ramtun:
-
Pu huechequeche, ¿chemu ngütramcaabüi tañi chau ca ñuque yamün mu?
-
Pu huechequeche, ¿chumngechi pengelelabüi tañi yamnebel tañi chau ca ñuque?
Papiltoiñ Proverbios 1:8. Papiltungele hula ngütramcaabiiñ tübachi ramtun:
-
Hueche, ¿chumabüi ngülamtueliyu tañi chau cam tañi ñuque?
7. Com tami pu che mu huenupüramabimi Jehová
Pu dunguquelu iñingen Jehová bill semana elcünoquingün quiñe antü tañi papiltol Biblia quiñentrür tañi pu che mu. ¿Chumquingün quiñentrür papiltulu? Quintulbe tati VIDEO. Quintulngele hula ngütramcaabiiñ tübachi cüla ramtun:
-
¿Chem quelluabeyu tami pu che quiñentrür papiltobel Biblia?
-
Chau ca ñuque, ¿chumabüingu tañi ayübalngeal ca ñi cümelcaatu tañi papiltun Biblia ñi pu püchüqueche engu? (Pebinge hunen adentun tübachi dungu 50 mu).
-
Eimi tami pu che mu, ¿chem dungu catrütuabeimünmu tamün quiñentrür papiltol Biblia?
Cuibi mu Jehová ayüquebüi tati pu israelche ñi ngütramcaabel tañi pu püchüqueche Jehová tañi dungu. Papiltoiñ Deuteronomio 6:6, 7. Papiltungele hula ngütramcaabiiñ tübachi ramtun:
-
¿Chumngechi inaabüimi ñi eipin tübachi huirin tripalu Biblia mu?
Billque dungu bemabüimi papiltulmi Biblia tami pu che mu:
-
Pepicaabüimün chem quimelelngeai trahun mu.
-
Ngüneduamabüimün quiñe ngütram Biblia mu tamün ayünel.
-
Nielmi püchüqueche con-nge jw.org mu ca nentunge billque dungu pu püchüqueche ngealu.
-
Nielmi huechequeche con-nge jw.org mu ca quintunge billque dungu pu huechequeche ngealu.
-
Eimi ca tami pu püchüqueche tucutuhuabüimün cuibique che tripalu Biblia mu reque ca adentucünoabüimün quiñe ngütram Biblia mu.
-
Ngüneduamabüimün billque video tripalu jw.org mu.
QUIÑEQUE CHE EIPIQUI: “Niequiiñ billque duam, beimu pepi quimelelquelabiiñ taiñ pu püchüqueche Biblia ñi eipin”.
-
¿Chem piabüimi?
CHEM PEIÑ TÜBAMU
Jehová ayüqui pu chau ca ñuque tañi piuqueyeabel, pepicaabel ca cuñiutucuabel tañi pu püchüqueche. Ca bemngechi pu püchüqueche yamneabi tañi chau ca ñuque. Cabei Jehová ayüqui tami pu che quiñentrür tañi huenupüramatu.
Chem quimeleleiñmu tüba
-
Pu chau ca ñuque, ¿chumngechi pepicaabüingün ca cuñiutucuabüingün tañi pu püchüqueche?
-
Pu püchüqueche, ¿chumngechi pengelabüingün ñi yamnebel tañi chau ca ñuque?
-
Bill semana papiltubilmi Biblia quiñentrür tami pu che mu, ¿chumngechi cümelcaabeimu?
DOI QUIMABÜIMI
¿Chem balinque ngülam quelluabüi tami pu püchüqueche ñi cüme tremal engün?
“6 balin dungu ñi quimelelngeal pu püchüqueche” (¡Tami quimabel! num. 2 2019)
Ngüneduamnge quiñeque ngülam quellualu pu inaduamquebilu büchaqueche.
“¿Ayüi Chau Dio taiñ inaduamabel chau ca ñuque büchalu?” (Papiltun internet mu)
Ngüneduamnge chumi quiñe huentru ñi doi cüme chaungeal.
Jehová quimeleleyumu chumngechi trengümabel tayu püchüqueche (5:58)
Ngüneduamnge chumngechi quiñe chau doi cüme yeucüleabüi tañi pu botüm ca ñahue mu.
“¿Chumabüi pu chau tañi bülmaneabel tañi pu botüm ca ñahue?” (Ti Huerquen 1 noviembre 2011)
Peabüimi ka bemngechi dungu:
BILLKE RAMTUN
¿Chumngechi quimelquiiñ Biblia?
Quimeltungelmi quiñe Dunguquelu, papiltuabüimi chem traducción Biblia mu niimi ume. Mangelabüimi com tami pu che, tami pu hueni, ca iñi ume ayüabüimi.
