50 YATICHÄWI
¿Kunjamatsa kusisit familianïsma? (payïri)
Wawanakajj Jehová Diosan regalopawa. Ukatwa awk taykanakajj wawanakapar sum uñjapjjañap Diosajj muni. Wawanakapar sum uñjapjjañapatakejj suma ewjjtʼanakwa churaraki. Ukatjja kunjamsa familian kusisit jakasiñ utjañapatakejj yanaptʼapjjaspa uksa wawanakarojj ewjjtʼarakiwa.
1. ¿Kuna ewjjtʼanaksa Jehová Diosajj awk taykanakar churi?
Jehová Diosajja awk taykanakajj wawanakapar munasipjjañapwa muni, jupanakampïñatakis tiempo apstʼasipjjañapwa munaraki. Ukatjja wawanakapar jan walinakat jarkʼaqapjjañapa, Biblian wiñay yatichäwinakaparjam (principios bíblicos) yatichapjjañapwa suyaraki (Proverbios 1:8). Wawanakat parlkasajja, Diosajj familia pʼeqtʼirinakarojj akham sasaw ewjjtʼi: “Kunjamtï Jehová Diosajj munki ukarjam [...] ewjjtʼasa uywasipkakim” sasa (Efesios 6:4 liytʼäta). Awk taykanakajj Diosan ewjjtʼanakaparjam wawanakapar uywapki, uka lurañsa yaqhanakar jan jaytapki ukhajja, Jehová Diosajj wal kusisi.
2. ¿Kuna ewjjtʼanaksa Jehová Diosajj wawanakar churi?
Jehová Diosajja ‘awk taykamar istʼapjjam’ sasaw wawanakarojj ewjjtʼi (Colosenses 3:20 liytʼäta). Mä wawatï awk taykapar respetani istʼarakini ukhajja, awk taykaparojj kusisiyaniwa, Jehová Diosarus kusisiyarakiniwa (Proverbios 23:22-25). Jesusajj wali yateqaskay wawänwa; jupajj perfectökchïnsa, jan perfectöpkäna uka awk taykaparojj istʼänwa, respetarakïnwa (Lucas 2:51, 52).
3. Diosar jukʼamp jakʼachasipjjañapatakejja, ¿kunsa familianakajj lurapjjaspa?
Jumatï wawanakanïsta ukhajja, jumjam Jehová Diosar munasipjjañapwa munarakpachätajja. ¿Kunsa ukatakejj lurasma? Biblian aka ewjjtʼaparjam sarnaqasaw uk lurasma: “[Jehová Diosan arunakap] wawanakamar yatichañamawa, utaman qontʼaskäta ukhasa, thaknam sarkäta ukhasa” (Deuteronomio 6:7). Yatichañamawa siski uka arojja, kutin kutin yatichaña sañwa muni. Kuntï yatichkta uk wawanakaman amtapjjañapatakejja, kutin kutin parlañaw wakisi, uk jumajj sum yatpachäta. Liytʼktan uka textorjamajja, Jehová Diosat wawanakamar parlañatakejj urun walja kutiw chʼamachasiñama. Ukatjja familiampi Bibliat yatjjatañatak tiempo apstʼasiñajj wali wakiskirirakiwa, ukhamat Jehová Diosar adorañataki. Jumajj janis wawanakanïkstajja, Bibliat sapa semana yatjjatañaw wal yanaptʼiristam.
JUKʼAMP YATJJATAÑÄNI
Biblian kawkïr ewjjtʼanakapas familian wali sum jakasipjjañapatakisa, kusisit jakasipjjañapatakis yanaptʼaspa uka toqetwa jichhajj yatjjatañäni.
4. Wawanakamarojj munasiñamp yaticham
Wawanakar yatichañajj janiw faciläkaspati. ¿Kunjamsa Bibliajj jumar yanaptʼiristam? Santiago 1:19, 20 liytʼasajja aka toqetwa parltʼapjjäta:
-
Wawanakapamp parlkasajja, ¿kunjamsa awk taykanakajj jupanakar munasipjjatap uñachtʼayapjjaspa?
-
Maynejj coleratäki ukhajja, ¿kunatsa wawanakapar cheqañchañapajj jan walïkaspa? a
5. Wawanakamar jan walinakat jarkʼaqam
Wawanakar jan walinakat jarkʼaqañatakejja, ikintasiñ toqet parlañamajj wali wakiskiriwa. Ukampis uka toqet jupanakamp parlañajj chʼamakïspawa. VIDEO uñtasajja aka toqetwa parltʼapjjäta:
-
Yaqhep awk taykanakatakejja, ¿kunatsa wawanakapar ikintasiñ toqet parlañajj chʼamakejja?
-
Uka toqet wawanakapamp parlañatakejja, ¿kunas yaqhep awk taykanakarojj yanaptʼawayi?
Biblian profeciaparjamajja, Supayan apnaqata aka oraqejj jan walit jukʼamp jan waliruw saraski. 2 Timoteo 3:1, 13 liytʼasajja aka toqetwa parltʼapjjäta:
-
2 Timoteo 3:13 texton parlki uka jan wali jaqenakat yaqhepajja, wawanakaruw abusapjje. Awk taykanakajja, ¿kunatsa chacha warmi ikintasiñ toqet wawanakapar parlapjjañapa? Wawanakapar abusonakat jarkʼaqañatakejja, ¿kunsa awk taykanakajj lurapjjaspa?
¿Yatiyätati?
Jehová Diosan Testigonakapajja, ikintasiñ toqet wawanakapar yatichañatakisa abusonakat jarkʼaqañatakisa walja yanaptʼanakwa awk taykanakatakejj wakichapjje. Ukanakat yaqhepajj akanakawa:
-
“Cómo hablar de sexo con su hijo” (¡Despertad!, núm. 5 2016)
6. Awk taykamarojj respetam
Wawanakasa qʼajjo wayn tawaqonakas awk taykanakaparojj respetapjjañapawa, jupanakar respetomp uñjapjjatapajj parlatapanwa amuyasi. VIDEO uñtasajja aka toqetwa parltʼapjjäta:
-
¿Kunatsa wayn tawaqonakajj awk taykapar respetomp parlapjjañapa?
-
¿Kunjamsa wayn tawaqonakajj awk taykapar respetomp uñjapjjaspa?
Proverbios 1:8 liytʼasajja aka toqetwa parltʼapjjäta:
-
Kunapachatï mä waynarusa jan ukajj mä tawaqorus tatapasa jan ukajj mamapas mä kun lurañap mayi ukhajja, ¿kunsa jupajj lurañapa?
7. Familpach Jehová Diosar adorapjjam
Familpach tantachtʼasisin Diosar adorañatakejja, Jehová Diosan Testigonakapajj sapa semanaw tiempo apstʼasipjje. ¿Bibliat yatjjatkasajj kunsa jupanakajj lurapjje? VIDEO uñtasajja aka toqetwa parltʼapjjäta:
-
Sapa semana familiampi Bibliat yatjjatañatakejja, ¿kunas familianakarojj yanaptʼaspa?
-
Bibliat yatjjatañajj yanaptʼkirïñapatakisa familian taqeni kusisitäpjjañapatakisa, ¿kunsa awk taykanakajj lurapjjaspa? (Aka yatichäwi qalltan utjki uka foto uñjjattʼäta).
-
¿Familiampi Bibliat yatjjatañatakejj kunas jumarojj jarkʼtam?
Nayra tiemponjja, israelitanakarojj familiapampi Qellqatanakat parlapjjañapwa Jehová Diosajj mayïna. Deuteronomio 6:6, 7 liytʼasajja aka toqetwa parltʼapjjäta:
-
¿Kunjamsa jumajj uka texton uñstki uka ewjjtʼarjam lurarakisma?
Familiampi Bibliat yatjjatañataki:
-
Congregacionan apaski uka tantachäwinakatakiw wakichtʼasipjjasma.
-
Familiajj Biblian kuna sarnaqäwipatsa yatjjatañ muni ukwa liytʼapjjasma, uka toqetwa parltʼapjjarakisma.
-
Jiskʼa wawanakanïsta ukhajja, Internetan jw.org cheqan yatichäwinakajj wawanakatak utjki ukwa apaqapjjasma jan ukajj imprimipjjasma.
-
Jumatï qʼajjo wayn tawaqo wawanakanïsta ukhajja, Internetan jw.org cheqankir mä qellqatwa ajlltʼasma.
-
Biblian mä sarnaqäwipat yatjjatkasajja, jupanakäpkasmas ukhamwa lurapjjasma.
-
Internetan jw.org cheqan utjki uka videonakat maywa uñtapjjasma, ukatjja uka toqetwa parltʼapjjasma.
YAQHEPANAKAJJ AKHAM SAPJJEWA: “Wawanakajj janiw Biblia entiendipkaspati” sasa.
-
¿Kunsa jumajj uka toqet amuyta?
¿KUNSA YATEQAWAYTAN?
Jehová Diosajja awk taykanakajj wawanakapar munasipjjañapa, yatichapjjañapa, jan walinakat jarkʼaqapjjañapwa muni. Ukatjja wawanakajj awk taykapar respetapjjañapa, istʼapjjañapa, familpach Jupar adorapjjañapwa munaraki.
Amtañataki
-
¿Kunjamsa awk taykanakajj wawanakapar yatichapjjaspa, jan walinakatsa jarkʼaqapjjarakispa?
-
¿Kunjamsa wawanakajj awk taykapar respetapjjatap uñachtʼayapjjaspa?
-
Familiampi sapa semana Diosar adorañatak tiempo apstʼasiñajja, ¿kunjamsa yanaptʼistaspa?
JUKʼAMP YATJJATAÑAMATAKI
Jachʼäjjani ukhajj kunas wawamarojj yanaptʼaspa uk yatjjatam.
“Wawanakar sum yatichañataki 6 yanaptʼanaka” (¡Sartapjjañäni!, payïri 2019)
Khitinakatï jilïr awk taykanakapar uñjapki ukanakarojj kunas yanaptʼaspa uk yatjjatam.
“¿Espera Dios que cuidemos a los padres cuando se hacen mayores?” (Artículo de jw.org)
Mä chachajja janiw wawanakaparojj kunjam uywañsa yatkänti, kunas juparojj wawanakapar sum uywañatakejj yanaptʼäna uk videon uñtam.
Jehová Diosaw wawanakar sum uywañatak yanaptʼawayapjjetu (5:58)
Kunjamsa mä awkejj wawanakapamp sum apasispa uk yatjjatam.
“¿Kunjamsa mä awkejj yoqall wawapamp sum apasispa?” (Yatiyañataki enero-marzo, 2012)
a Bibliajj cheqañchaña toqet parlki ukhajja, maynir yatichañata ukhamarak ewjjtʼañatwa parlaski. Janiw wawar jan sinttʼasis usuchjañkam castigañatsa ni wawar maltratañatsa parlkiti (Proverbios 4:1).
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
