PES 50
Lelaa ndap yoñ lihaa i nla ba maséé?—Yigil 2
Bon ba yé likébla li Yéhôva. Yéhôva a mbat bagwal le ba yoñ ndun ni bon bap. Inyu hôla bo mu nson u, a nti bo maéba. A nkal yak boñge kii ba nlama boñ inyu boñ le lihaa jolisôna li ba maséé.
1. Mambe maéba Yéhôva a nti bagwal?
Yéhôva a ngwés le bagwal ba gwés bon bap, ba tégbaha ki ngandak ngéda ni bo. A nsômbôl le ba sôñ bon bap ni le ba gwélél matiñ ma Bibel inyu niiga bo. (Bingéngén 1:8) A nkal basañ le: “Kena ni bisu i néñés bo [bon banan] ikété biniigana ni mabéhna ma Yéhôva.” (Añ Éfésô 6:4.) Yéhôva a yé maséé i ngéda bagwal ba nôgôl mabéhna mana, ni le ba nwas bé le mut numpe nyen a néñés bon bap.
2. Mambe maéba Yéhôva a nti boñge?
Yéhôva a nkal boñge le: “Nôglana bagwal banan.” (Añ Kôlôsé 3:20.) I ngéda boñge ba nôgôl bagwal bap, ba tinak ki bo lipém, hala a nlémél Yéhôva a lémlak yak bagwal bap. (Bingéngén 23:22-25) Yésu a bi ti ndémbél ilam. I ngéda a bé mañge, to hala kiki a bé peles, a bé nôgôl bagwal bé a tinak bo lipém.—Lukas 2:51, 52.
3. Lelaa lihaa linan li nla lémél Djob?
Ibale u yé ngwal, u ngwés le bon boñ ba gwés Yéhôva kiki yak we u ngwés nye. Lelaa u nla hôla bo le ba pam i gwés Yéhôva? Bibel i nkal le: “U nlama niiga gwo [Bibañga bi Yéhôva] bon boñ, u kwélhak bo mu i ngéda u yii i ndap yoñ, i ngéda u nke i njel.” (Ndiimba Mbén 6:7) I “niiga” i nkobla le u nlama tiimba kal minlélém mi mam. Bagwal ba nlama tiimba kal bon bap minlélém mi mam, inyu boñ le ba hôya bañ mo. Nlôñ kaat unu, u ngwés kal le bagwal ba nlama yéñ manjel i kwélés bon bap inyu Yéhôva hiki ngéda. I yé loñge i téé ngim ngéda hiki sonde inyu boñ le lihaa li nigil Bibel ntôñ, tole ni nigil bé bo iba ibale ni gwé bé bon.
KÔNDE TÉM
Di béñge kii hiki jô i lihaa i nla boñ inyu boñ le lihaa li ba maséé.
4. Niiga bon boñ ni gwéha
I niiga mañge i ta bé jam li ntomb. Lelaa Bibel i nla hôla bagwal? Añ Yakôbô 1:19, 20, i mbus ni kwélél mambadga mana:
-
Lelaa bagwal ba nla éba le ba ngwés bon bap, i ngéda ba mpôdôs bo?
-
Inyuki bagwal ba nlama bé kogse bon bap i ngéda ba yé ñunbak? a
5. Tat bon boñ
Inyu tat bon boñ, i nlôôha ba nseñ le we ni hiki wada wap ni kwel i mam ma mbéñge malal. I nla pam le u yi bé lelaa u boñ inyu bôdôl nkwel. Tuk VIDÉÔ, i mbus ni kwélél mambadga mana:
-
Inyuki hala a nlédél ngim bagwal i kwélés bon bap mam ma malal?
-
Ndi kii i bi hôla ngim bagwal i boñ hala?
Kiki Bibel i bi bôk i pot, nkoñ ’isi u Satan u mbep ndigi bep ni bep. Añ 2 Timôtéô 3:1, 13, i mbus ni kwélél i mbadga ini:
-
Ipôla bibéba bi bôt nlôñ 13 u mpôdôl, di gwé yak baôbôs boñge. Inyuki yé nseñ le bagwal ba kwel ni bon bap inyu hôla bo i yi lelaa ba nla ke mintén mi bôt mi ngwéé?
Baa u yik laa?
Mbôgi Yéhôva i nti bagwal ngandak bisélél inyu hôla bo i niiga bon bap mam ma malal, ni i tat bo le ba kee baôbôs boñge ngwéé. Kiki ’héga, béñge:
-
Ni sôñ bon banan (vidéô)
-
“Pôdôl man woñ jam li malal” (Tôde ’Ilo! No. 5 2016)
6. A boñge, tina bagwal banan lipém
Disii di boñge ni boñge ba wanda ba nla éba le ba nti bagwal bap lipém ni njel bipôdôl gwap. Tuk VIDÉÔ, i mbus ni kwélél mambadga mana.
-
Umbe nseñ boñge ba wanda ba ñôt i ngéda ba nkwélés bagwal bap, ba tinak ki bo lipém?
-
Lelaa mañge wanda a nla éba le a nti bagwal bé lipém, i ngéda a mpôdôs bo?
Añ Bingéngén 1:8, i mbus ni kwélél mbadga ini:
-
Limbe libak mañge wanda a nlama bana i ngéda bagwal bé ba ti nye maéba?
7. Ni bégés Yéhôva ikété lihaa
Mahaa ma Mbôgi Yéhôva ma ntéé ngim ngéda hiki sonde, inyu bibégés bi ndap lihaa. Kii ba mboñ mu bibégés bi? Tuk VIDÉÔ, i mbus ni kwélél i mbadga ini:
-
Lelaa lihaa li nla tjek ngéda yap inyu bana bibégés bi ndap lihaa hiki sonde?
-
Kii bagwal ba nla boñ inyu boñ le hiki mut a ôt nseñ ni bibégés bi ndap lihaa? Béñge titii i bibôdle bi pes ini.
-
Kii i nla kéñ we i bana bibégés bi ndap lihaa?
I nlômbi Israel, Yéhôva a bé gwés le mahaa ma nigil lipôdôl jé hiki ngéda. Añ Ndiimba Mbén 6:6, 7, i mbus ni kwélél i mbadga ini:
-
Lelaa u nla bii litiñ li Bibel lini i bisélél i lihaa joñ?
Mam ni nla boñ i bibégés bi ndap lihaa:
-
I kôôba makoda.
-
Ni añ ngim ñañ u Bibel, ni kwélél ki mu.
-
Ibale ni gwé disiina di boñge, ni nla yoñ mintuk i jw.org.
-
Ibale ni gwé boñge ba wanda, ni nla ke i jw.org, ni pohol ñañ u u mbéñge boñge ba wanda.
-
Ni nla tuk ngim ñañ u Bibel.
-
Ni nla béñge vidéô i jw.org ni kwélél ki mu.
BÔT BAPE BA NKAL LE: “Bibel i nlôôha let kayéle boñge ba nla bé nok yo.”
-
We, u nhoñol laa?
I SEM KWEP
Yéhôva a ngwés le bagwal ba gwés bon bap, ba niiga bo, ba tat ki bo. A nsômbôl le boñge ba nôgôl bagwal bap, ba ti ki bo lipém, ni le mahaa ma bégés nye ntôñ.
Mambadga ma mbigda
-
Lelaa bagwal ba nla niiga bon bap, ba tat ki bo?
-
Lelaa boñge ba nla éba le ba nti bagwal bap lipém?
-
Umbe nseñ lihaa li gwé i téé ngim ngéda inyu bibégés bi ndap lihaa?
KÔNDE YÉÑ
Kii di nla niiga boñge inyu hôla bo i yila minhôôlak mi bôt?
“Bilem bilam bisamal boñge ba nlama hôlôs” (Tôde ’ilo! No. 2 2019)
Ôt nseñ ni biniigana Bibel i nti i bôt ba ntééda miñunuk nwap mi bagwal.
“Mambe maéba Bibel i nti i bet ba ntééda miñunuk nwap mi bagwal?” (Kee i jw.org)
Béñge lelaa mut wada nu a bé yi bé lelaa ba néñés bon a bi sôk a yila loñge isañ bon.
Lelaa isañ man a nla lédés maada mé ni lok yé.
“Lelaa isañ a nla ba bebee ni lok yé?” (Nkum Ntat, 1 Maye sép, 2011)
a Ikété Bibel, “kogse” i nkobla ki le, i niiga, i éga, i kodol. Ndi, i nkobla bé le i tééñga tole i tét.—Bingéngén 4:1.
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
