LIKE SUANLƐ 50
?Á yó sɛ naan a nin ɔ awlobofuɛ mun amun a di aklunjɔɛ?—Bue 2
Ba’m be ti like mɔ Zoova fa cɛ siɛ nin niɛn mun-ɔn. Ɔ kunndɛ kɛ siɛ nin niɛn’m be nian be lika kpa. Zoova man siɛ nin niɛn’m be afɔtuɛ wie mun naan b’a kwla yo sɔ. Ɔ man ba’m be afɔtuɛ wie.
1. ?Afɔtuɛ benin yɛ Zoova man siɛ nin niɛn mun-ɔn?
Zoova kunndɛ kɛ siɛ nin niɛn’m be klo be mma mun naan be nin be tran. Ɔ kunndɛ kɛ be sasa be naan like yaya w’a yoman be, yɛ ɔ kunndɛ kɛ be fa Biblu’n be kle be like. (Ɲanndra Mun 1:8) Zoova se siɛ’m be kɛ ‘be niɛn i afɔtuɛ’m be su be ta be mma mun.’ (An kanngan Efɛzifuɛ Mun 6:4 nun.) Kɛ siɛ nin niɛn mun be nian Zoova i afɔtuɛ’m be su be ta be mma mun’n, mɔ be fɛmɛn i sɔ yolɛ’n be wlaman sran uflɛ sa nun’n, i sɔ’n yo Zoova i fɛ.
2. ?Afɔtuɛ benin yɛ Zoova man ba mun-ɔn?
Zoova se ba’m be kɛ ‘maan be ɲin yi be si nin be nin mun.’ (An kanngan Kolɔsufuɛ Mun 3:20 nun.) Kɛ ba mun be ɲin yi be si nin be nin mun’n Zoova i klun jɔ, yɛ be si nin be nin mun be klun jɔ wie. (Ɲanndra Mun 23:22-25) Zezi kleli ba’m be ajalɛ kpa. Kannzɛ fɔ nunmɛn i nun’n, sanngɛ i ɲin yili i si nin i nin.—Liki 2:51, 52.
3. ?Ngue yɛ á yó naan a nin ɔ awlofuɛ mun amun nin Ɲanmiɛn amun afiɛn w’a mantan-ɔn?
Sɛ a le ba’n a klo kɛ ɔ mma’m be klo Zoova, kɛ nga ɔ bɔbɔ a fa klo i’n sa. ?Á yó sɛ naan i sɔ’n w’a kwla yo ye? Biblu’n nun ndɛ mma kun m’ɔ kwla uka wɔ’n yɛ. Ɔ se kɛ: ‘Kan Zoova i ndɛ’n kle ɔ mma mun. Sɛ a nin be ti ase awlo lɔ-o, kan. Sɛ amun o atin’n su-o, kan.’ (Mmla’n 6:7) Kɛ ba’m be o lɛ’n wie liɛ’n, ɔ fata kɛ be flan ndɛ’m be nun kle be ka naan b’a fa su. Ndɛ mma nga kle kɛ ɔ fata kɛ a kan Zoova i ndɛ’n kle ɔ mma mun kpɛ sunman. Ɔ fata kɛ a nin ɔ awlobo’n amun sie blɛ lemɔcuɛ kwlaa nun naan amun suan Biblu’n nun like likawlɛ. Kannzɛ bɔbɔ a leman ba’n, a kwla sie blɛ lemɔcuɛ kwlaa nun a fa suan Biblu’n nun like.
SI NDƐ’N NUN KPA EKUN
É wá kán ninnge wie mɔ a kwla yo naan a nin ɔ awlobofuɛ mun b’a kwla di aklunjɔɛ’n be ndɛ.
4. Kle ɔ mma’m be like klolɛ su
Ba’m be talɛ leman ba. ?Wafa sɛ yɛ Biblu’n kwla uka wɔ-ɔ? An kanngan Zaki 1:19, 20 nun, i sin’n an koko kosan yɛ’m be su yalɛ:
-
?Kɛ siɛ nin niɛn’m be nin be mma’m bé kókó yalɛ’n, wafa sɛ yɛ be kwla kle kɛ be klo be-ɔ?
-
?Ngue ti yɛ ɔ fataman kɛ siɛ nin niɛn’m be tu be mma’m be fɔ ya su-ɔ? a
5. Nian ɔ mma’m be su naan sa w’a ɲanman be
Kɛ ɔ ko yo naan w’a sasa ɔ mma mun’n, ɔ ti cinnjin kɛ a kan bla nin bian nna’n i ndɛ kle be tinuntinun. I sɔ’n kwla yo wɔ kɛnsrɛn. An bo VIDEO’N, i sin’n an koko kosan yɛ’m be su yalɛ.
-
?Ngue ti yɛ siɛ nin niɛn wie’m be kanman bla nin bian nna’n i ndɛ be kleman be mma mun-ɔn?
-
?Ngue yɛ siɛ nin niɛn wie’m be yo naan b’a kwla kan bla nin bian nna’n i ndɛ b’a kle be mma mun-ɔn?
Kɛ nga Biblu’n fa kannin’n sa’n, mɛn’n ɔ yo tɛ kɔ i ɲrun titi. An kanngan 2 Timote 3:1, 13 nun, i sin’n an koko kosan yɛ’n i su yalɛ:
-
Klunwifuɛ nga be kan be ndɛ, ndɛ mma 13 nun lɛ’n be nun wie’m be nin ba kanngan’m be la. ?Ngue ti yɛ ɔ ti cinnjin kɛ siɛ nin niɛn mun be uka be mma mun naan b’a tɔman klunwifuɛ sɔ’m be aya’n nun-ɔn?
Nian nga wie
Zoova i Lalofuɛ’m be yili fluwa kpanngban naan bé fá úka siɛ nin niɛn mun naan b’a kwla kan bla nin bian nna’n i ndɛ b’a kle be mma mun. Be nun wie mun yɛ:
-
An sasa amun mma mun (video)
-
“Wafa nga e kwla kan bla nin bian nna’n i ndɛ e kle e mma mun’n” (An Tinnge! nun ndɛ)
6. Maan ɔ ɲin yi ɔ si nin ɔ nin
Wafa nga ba’m be kan ndɛ be kle be si nin be nin mun’n yɛ ɔ kle kɛ be yi ɲin be annzɛ be ɲin yiman be-ɔ. An bo VIDEO’N, i sin’n an koko kosan yɛ’m be su yalɛ.
-
?Ngue ti yɛ ɔ ti cinnjin kɛ ba’m be kan be klun ndɛ be kle be si nin be nin mun aɲinyiɛ su-ɔ?
-
?Wafa sɛ yɛ ba kun kwla kan ndɛ kle i si annzɛ i nin aɲinyiɛ su-ɔ?
An kanngan Ɲanndra Mun 1:8 nun, i sin’n an koko kosan yɛ’n i su yalɛ:
-
?Kɛ ba kun i si annzɛ i nin mɛn i afɔtuɛ’n, ngue yɛ ɔ fata kɛ ɔ yo-ɔ?
7. Maan a nin ɔ awlobofuɛ mun amun su Zoova likawlɛ
Zoova i Lalofuɛ mun be sie blɛ lemɔcuɛ kwlaa nun naan be nin be awlobofuɛ mun b’a kwla suan like likawlɛ. ?Ngue su yɛ be fa be ɲin be sie i blɛ sɔ’n nun-ɔn? An bo VIDEO’N, i sin’n an koko kosan yɛ’m be su yalɛ.
-
?Ngue yɛ ɔ fata kɛ awlobofuɛ’m be yo naan b’a kwla su Ɲanmiɛn awlo lɔ titi-ɔ?
-
?Ngue yɛ siɛ nin niɛn’m be kwla yo naan like suanlɛ’n w’a yo fɛ naan awlobo’n nunfuɛ mun b’a ɲan su ye-ɔ?—An nian foto ng’ɔ o kan like suanlɛ’n bo i bo lɛ’n.
-
?Ngue yɛ ɔ kwla yo maan awlo lɔ Ɲanmiɛn sulɛ’n kwla yo kekle a nin ɔ awlobofuɛ mun amun sa nun-ɔn?
Izraɛlifuɛ’m be blɛ su’n, Zoova seli awlobo’m be kɛ be koko Ɲanmiɛn ndɛ’n i su yalɛ titi. An kanngan Mmla’n 6:6, 7 nun, i sin’n an koko kosan yɛ’n i su yalɛ.
-
?Wafa sɛ yɛ a nin ɔ awlobofuɛ mun amun kwla nanti ndɛ sɔ’n su-ɔ?
Ninnge nga amun kwla yo i awlo lɔ Ɲanmiɛn sulɛ’n nun’n:
-
Amun kwla siesie aɲia mun.
-
Amun kwla kanngan sran wie mɔ Biblu’n kɛn i ndɛ mɔ amun klo i kpa’n i su ndɛ’n nun kpɛkun amun koko su yalɛ.
-
Sɛ amun wa’n te yo bakan’n, amun kwla koko bakanngan’m be su ndɛ ng’ɔ o jw.org su’n i su yalɛ. Amun kwla fɛ i fluwa su, annzɛ amun niɛn i telefɔnun nun.
-
Sɛ amun wa’n ti gbanflɛn kan annzɛ talua kan’n amun kwla koko gbanflɛn nin talua’m be su ndɛ ng’ɔ o jw.org su’n be nun kun su yalɛ.
-
Amun kwla fa amun ɲin be sie i Biblu’n nun ndɛ kun su kpɛkun amun yi i nglo kɛ teatri sa.
-
Amun kwla nian jw.org su video kun kpɛkun amun koko su yalɛ.
SRAN WIE’M BE WAAN: “Ba kanngan’m be kwlá wunman Biblu’n nun ndɛ’m be wlɛ.”
-
?Á tɛ́ be su sɛ?
NDƐ’N I KPƆLƐ BOLƐ
Zoova kunndɛ kɛ siɛ nin niɛn’m be klo be mma mun, be kle be like, yɛ be nian be su naan sa w’a ɲanman be. Ɔ kunndɛ kɛ ba mun be ɲin yi be si nin be nin mun naan be fa ndɛ nga be kan kle be’n su, yɛ ɔ kunndɛ kɛ awlobo mun be suɛn i nuan ndɛ’n i nun like likawlɛ.
Ndɛ’n i nun flanlɛ
-
?Wafa sɛ yɛ siɛ nin niɛn mun be kwla nian be mma’m be su naan sa w’a ɲanman be-ɔ?
-
?Wafa sɛ yɛ ba’m be kwla kle kɛ be bu be si nin be nin’m be sran-ɔn?
-
?Kɛ awlobo kun nunfuɛ mun be yia lemɔcuɛ kwlaa nun be suan Ɲanmiɛn Ndɛ’n i nun like’n, i su ye benin yɛ be ɲɛn i-ɔ?
NDƐ WIE MUN EKUN
Ninnge wie mɔ be kwla uka ɔ wa’n.
“Ninnge nsiɛn m’ɔ fata kɛ ba’m be suan be yolɛ’n” (An Tinnge!, afuɛ 2019, No. 2)
Biblu’n nun ndɛ wie mɔ be kwla uka be nga be nian sran nga b’a yo oke’n be lika’n.
“?Be nga b’a yo oke’n be lika nianlɛ’n i su ndɛ benin yɛ Biblu’n kan-ɔn?” (jw.org su ndɛ)
Like ng’ɔ ukali bian kun naan w’a kwla kaci siɛ kpa’n.
Like nga siɛ’m be kwla yo naan be nin be mma’m be afiɛn w’a mantan kpa’n.
a Biblu’n nun’n kɛ be se kɛ “be tu sran fɔ’n,” i bo’n yɛle kɛ be kle i like, be kle i atin, yɛ be ukɛ i naan ɔ kaci i akunndan’n. Nán sran’n i tɛtɛ yolɛ i ndɛ yɛ be kan-ɔn.—Ɲanndra Mun 4:1.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
