ISAMBILILO 50

Ifyo Mwingacita pa Kuti mu Lupwa Lwenu Muleba Insansa—Ulubali 2

TINIKENI

Abana bupe ubo Yehova apeela abafyashi. Kabili enekela abafyashi ukulasunga bwino abana babo. Yehova alafunda abafyashi ifingabafwa ukukusha bwino abana. Na kabili alafunda abana ifyo bengacita pa kuti mu lupwa muleba insansa.

1. Finshi Yehova afunda abafyashi?

Yehova enekela abafyashi ukulatemwa abana babo no kulaba pamo nabo inshita iitali. Kabili afwaya abafyashi balecingilila abana babo ku fingabaletelela no kulabomfya amashinte ya mafunde ya mu Baibolo pa kubasambilisha. (Amapinda 1:8) Yehova eba abafyashi abaume ukuti: “Mulebakusha [abana benu] . . . ukulingana no kusalapula. kwa kwa Yehova” (Belengeni Abena Efese 6:4.) Yehova alatemwa nga ca kuti abafyashi balekonka ifyo abeba ilyo balekusha abana babo, kabili alomfwa bwino nga tabalepeela abantu bambi umulimo wa kubakushishako abana.

2. Finshi Yehova aeba abana ukulacita?

Yehova eba abana ukuti: “Muleumfwila abafyashi benu.” (Belengeni Abena Kolose 3:20.) Nga ca kuti abana balecindika abafyashi babo no kulabomfwila, balalenga Yehova na bafyashi babo ukusekelela. (Amapinda 23:22-25) Yesu aleumfwila abafyashi bakwe ilyo ali umwaice. Nangu ca kuti ali uwapwililika, aleumfwila abafyashi bakwe kabili alebacindika.—Luka 2:51, 52.

3. Kuti mwacita shani pa kuti ulupwa lwenu lupalame sana kuli Lesa?

Nga muli bafyashi, ukwabula no kutwishika mulafwaya abana benu batemwa Yehova nga fintu mwamutemwa. Finshi mwingacita pa kuti abana benu batemwe Yehova? Abana kuti batemwa Yehova nga mulekonka ifyo Baibolo ilanda ukuti: “Muleyasambilisha [amashiwi ya kwa Yehova] ku bana benu no kuyalandapo ilyo mwikele mu mayanda yenu na lintu mule-enda mu musebo.” (Amalango 6:7) Ishiwi bapilibula ukuti “muleyasambilisha” kuti lyapilibula no kuti ukubwekeshabwekeshapo. Nalimo mwalimona ukuti pa kuti abana bebukishe ifyo mulebasambilisha, kano mwabwekeshapo imiku iingi. Ili ilembo likoselesha abafyashi ukulasambilisha abana babo pali Yehova lyonse. Kuti cawama sana nga ca kuti cila mulungu aba mu lupwa baleshako inshita ya kusambilila ifya kwa Lesa capamo. Nangu ca kuti tamwakwata abana, na imwe bene kuti mwanonkelamo nga ca kuti muleshako inshita ya kusambilila Icebo ca kwa Lesa cila mulungu.

SAMBILILENI NA FIMBI

Sambilileni fimo ifyo mwingacita pa kuti mu lupwa lwenu mube insansa.

4. Muleba no kutemwa ilyo mulesambilisha abana benu

Tacayanguka ukusambilisha umwana. Bushe Baibolo kuti ya-afwa shani abafyashi ukusambilisha abana? Belengeni Yakobo 1:19, 20, lyena lanshanyeni aya mepusho:

Bushe abafyashi kuti balanga shani ukuti balitemwa abana babo ilyo balelanshanya nabo?
Mulandu nshi abafyashi bashilingile ukusalapwila abana babo ninshi nabakalipa? a

5. Mulecingilila abana benu

Pa kucingilila abana benu, calicindama sana ukulalanshanya na cila mwana pa malyashi ya kulaala pamo ukwa mwaume no mwanakashi. Nalimo kuti muleumfwa insoni ukulanda nabo pa malyashi ya musango uyu. Tambeni VIDIO, lyena lanshanyeni amepusho yakonkapo.

VIDIO: Mulecingilila Abana Benu ku Fyabipa (2:58)

Mulandu nshi abafyashi bamo cibafisha ukulanshanya na bana pa malyashi ya kulaala pamo ukwa mwaume no mwanakashi?
Finshi abafyashi bamo bacita pa kulanshanya na bana pa malyashi ya kulaala pamo ukwa mwaume no mwanakashi?

Nga fintu Baibolo yasobeele, icalo ca kwa Satana cileya cilebipilako fye. Belengeni 2 Timote 3:1, 13, lyena lanshanyeni ici cipusho:

Ababifi bamo abo Baibolo yalandapo mu cikomo 13 ni balya abacenda abana. Cinshi cacindamina ukuti abafyashi balesambilisha abana babo pa kulaala pamo ukwa mwaume no mwanakashi na pa fyo bengaicingilila ku bantu abacenda abana?

Bushe mwalishiba ici cishinka?

Inte sha kwa Yehova balapanga impapulo ishingafwa abafyashi ukusambilisha abana pa kulaala pamo ukwa mwaume no mwanakashi no ku bacingilila ku bengabacenda. Ku ca kumwenako, moneni impapulo shakonkapo:

Cingilileni Abana Benu (1:52)
Sambilila Kuli Kasambilisha Mukalamba, icipandwa 10 na 32
“Mulesambilisha Abana Benu pa Kulaalana” (Loleni! Na. 5 2016)

6. Mwe bana mulecindika abafyashi benu

Abana kuti balanga ukuti balicindika abafyashi babo mu nshila balandilamo nabo. Tambeni VIDIO, lyena lanshanyeni amepusho yakonkapo.

VIDIO: Ifyo Wingacita pa Kuti Ulelanshanya Bwino na Bafyashi Bobe (2:19)

Mulandu nshi cacindamina ukuti umwana aleba no mucinshi ilyo alelanshanya na bafyashi bakwe?
Bushe umwana kuti alanga shani ukuti alacindika abafyashi bakwe ilyo alelanda nabo?

Belengeni Amapinda 1:8, lyena lanshanyeni ici cipusho:

Finshi umwana afwile ukucita abafyashi bakwe nga bamweba ifya kucita?

7. Mulepepa Yehova capamo ngo lupwa

Inte sha kwa Yehova balapaatulako inshita cila mulungu iya kupepela pamo ngo lupwa. Finshi mufwile ukucita ilyo muli pa mapepo ya lupwa? Tambeni VIDIO, lyena lanshanyeni amepusho yakonkapo.

VIDIO: Amafya na Mapaalo Yaba mu Kukwata Amapepo ya Lupwa (8:04)

Finshi aba mu lupwa bafwile ukucita pa kuti balekwata amapepo ya lupwa lyonse?
Finshi abafyashi bengacita pa kuti amapepo ya lupwa yalewama?—Moneni icikope icili pa ntendekelo ya lino isambililo.
Cinshi nalimo icingalenga ulupwa lwenu lulefilwa ukukwata amapepo ya lupwa?

Mu nshiku sha bena Israele, Yehova ale-enekela indupwa ukulalanshanya Amalembo lyonse. Belengeni Amalango 6:6, 7, lyena lanshanyeni ici cipusho:

Kuti mwabomfya shani ifyaba pali ili ilembo?

Ifyo mwingacita pa mapepo ya lupwa:

Kuti mwapekanya ukulongana.
Kuti mwabelenga no kulanshanya ilyashi lya mu Baibolo ilyo ulupwa lwenu lwingatemwa.
Nga mwalikwata abana abanono, kuti mwakopolola nelyo ukupulinta ifyo abana bengacita pa kusambilila ifyaba pa jw.org.
Nga mwalikwata abana imisepela, kuti mwalanshanya nabo ifyaba pa cipande citila “Abacaice Bepusha Ukuti” icaba pa jw.org.
Kuti mwapangako icangalo ca mu Baibolo na bana benu.
Kuti mwatambako vidio ya pa jw.org no kulanshanyapo.

ABANTU BAMO BATILA: “Abana te kuti bomfwe ifyaba mu Baibolo.”

Imwe muletipo shani?

IFYO MUSAMBILILE

Yehova afwaya abafyashi ukutemwa abana babo, ukulabasambilisha, no kulabacingilila. Abana nabo bafwile ukulacindika abafyashi babo no kulabomfwila. Kabili indupwa na sho balingile ukulakwata amapepo ya lupwa.