LESEN 50
?Olsem Wanem Blong Gat Wan Hapi Famle?—Pat 2
Ol pikinini oli olsem presen we i kam long Jehova, taswe hem i ekspektem ol perens blong lukaot gud long ol pikinini. Hem i givim ol gudfala advaes blong halpem ol perens blong mekem olsem. Mo hem i givim advaes tu long ol pikinini blong oli folem blong mekem famle i hapi.
1. ?Wanem advaes we Jehova i givim long ol perens?
Jehova i wantem se ol perens oli lavem ol pikinini mo spenem plante taem wetem olgeta. Mo hem i wantem tu se oli protektem olgeta mo trenem olgeta folem ol tijing blong Baebol. (Ol Proveb 1:8) Hem i talem long ol papa se: “Yufala i mas gohed blong lukaot gud long [ol pikinini blong yufala] . . . mo givim woning long olgeta folem tingting blong Jehova.” (Ridim Efesas 6:4.) Jehova i glad taem ol perens oli folem advaes blong hem taem oli tijim pikinini mo oli no pasem responsabiliti ya long narafala.
2. ?Wanem advaes we Jehova i givim long ol pikinini?
Jehova i talem long ol pikinini se: “Yufala i mas obei long papa mo mama blong yufala.” (Ridim Kolosi 3:20.) Taem ol pikinini oli respektem mo obei long ol perens blong olgeta, oli mekem Jehova mo ol perens oli hapi. (Ol Proveb 23:22-25) Jisas i soem wan gudfala eksampol taem hem i wan pikinini. Hem i stret gud olgeta mo hem i obei mo respektem ol perens blong hem, nating se oli no stret gud olgeta.—Luk 2:51, 52.
3. ?Olsem wanem famle i save kam klosap long God?
Sipos yu wan papa o mama, i sua se yu wantem we ol pikinini blong yu tu, oli lavem Jehova olsem yu yu lavem hem. ?Olsem wanem blong mekem samting ya? Hemia taem yu folem samting we Baebol i talem, i se: “Yu mas putum [ol tok blong Jehova] long hat blong ol boe blong yu, mo yu toktok long olgeta taem yu sidaon long haos blong yu, taem yu wokbaot long rod.” (Dutronome 6:7) Tok ya “putum,” i minim tijim bakegen mo bakegen. Maet yu save finis se yu mas ripitim samting bakegen mo bakegen blong pikinini i tingbaot. Vas ya i minim se yu mas tekem janis oltaem blong tokbaot Jehova long ol pikinini blong yu. I gud we famle i putum wan taem evri wik blong mekem famle wosip tugeta. Sipos yu no gat pikinini, be yu stil save makemaot taem evri wik blong stadi Baebol mo kasem blesing.
DIGIM MOA
Makem ol gudfala advaes we i save halpem famle blong oli harem se oli sef mo hapi.
4. Tijim pikinini blong yu wetem lav
I no isi blong tijim o trenem wan pikinini. ?Olsem wanem Baebol i save halpem yu? Ridim Jemes 1:19, 20, mo tokbaot ol kwestin ya:
-
?Olsem wanem ol perens oli save soem lav taem oli toktok wetem ol pikinini blong olgeta?
-
?From wanem ol perens oli no mas stretem pikinini blong olgeta taem oli kros? a
5. Protektem ol pikinini blong yu
Blong protektem pikinini blong yu, i impoten blong tokbaot seks long evri pikinini blong yu. Be maet yu sem blong mekem olsem. Plei VIDEO, mo tokbaot ol kwestin ya.
-
?From wanem i had blong sam perens oli tokbaot seks long ol pikinini blong olgeta?
-
?Sam perens oli yusum wanem rod blong tokbaot seks long ol pikinini blong olgeta?
Olsem profet tok i talem, ol nogud fasin long wol blong Setan oli kam mowas. Ridim 2 Timoti 3:1, 13, mo tokbaot kwestin ya:
-
Sam rabis man we vas 13 i tokbaot, oli stap mekem rabis fasin blong seks long ol pikinini. So, ?from wanem i impoten blong tijim ol pikinini long saed blong seks mo olsem wanem blong protektem olgeta?
?Yu yu save?
Ol Witnes Blong Jehova oli wokem plante tul blong halpem ol perens blong tijim ol pikinini long saed blong seks mo protektem olgeta long ol rabis man. Luk sam eksampol:
-
Protektem Pikinini Blong Yu (video)
-
Learn From the Great Teacher, japta 10 mo 32
-
“Tijim Pikinini Blong i Save Long Fasin Blong Man Wetem Woman” (Wekap! N. 5 2016)
6. Respektem ol perens blong yufala
Ol pikinini mo ol yangfala oli save soem respek, long fasin blong olgeta blong toktok long ol perens. Plei VIDEO, mo tokbaot ol kwestin ya.
-
?From wanem i impoten we wan yangfala i toktok wetem respek long perens blong hem?
-
?Olsem wanem wan yangfala i save toktok long perens blong hem wetem respek?
Ridim Ol Proveb 1:8, mo tokbaot kwestin ya:
-
?Wan yangfala i mas mekem wanem taem perens blong hem oli givim advaes long hem?
7. Wosipim Jehova tugeta olsem wan famle
Ol famle we oli Witnes blong Jehova oli makemaot taem evri wik blong wosip tugeta. ?Oli mekem famle wosip ya olsem wanem? Plei VIDEO, mo tokbaot ol kwestin ya.
-
?Olsem wanem blong mekem wan gudfala program blong famle wosip?
-
?Ol perens oli save mekem wanem blong gat wan gudfala famle wosip we evriwan i enjoem?—Luk ol pija long stat blong lesen ya.
-
?Wanem i save mekem se i had blong famle i joen tugeta blong mekem famle wosip?
Long Isrel bifo, Jehova i ekspektem ol famle blong tokbaot Baebol oltaem. Ridim Dutronome 6:6, 7, mo tokbaot kwestin ya:
-
?Olsem wanem yu save folem advaes ya?
Ol rod blong mekem famle wosip:
-
Rerem ol miting blong kongregesen tugeta.
-
Ridim mo tokbaot wan stori blong Baebol we famle bambae i glad long hem.
-
Sipos yu gat sam smol pikinini, daonlodem o printim wan aktiviti we i stap long jw.org.
-
Sipos yu gat sam yangfala, tokbaot wan haf blong ol yangfala we i stap long jw.org.
-
Aktem ol Baebol stori wetem ol pikinini.
-
Wajem wan video we i stap long jw.org mo tokbaot.
SAM MAN OLI SE: “Mi bisi tumas, mi no gat taem blong tijim ol pikinini blong mi long Baebol.”
-
?Bambae yu talem wanem?
SAMARI
Jehova i wantem se ol perens oli lavem, tijim, mo protektem pikinini blong olgeta. Hem i wantem se pikinini i respektem mo obei long perens. Mo hem i wantem tu se evriwan long famle i joen tugeta blong wosipim hem.
Tingtingbak
-
?Olsem wanem ol perens oli save tijim mo protektem ol pikinini blong olgeta?
-
?Olsem wanem ol pikinini oli save respektem ol perens blong olgeta?
-
?Wanem blesing we famle i kasem taem oli makemaot taem evri wik blong mekem famle wosip?
FAENEMAOT
?Wanem ol fasin we pikinini blong yu i mas lanem bifo we i kam bigman?
Lanem ol gudfala advaes long Baebol blong givhan long olgeta we oli lukaot long ol perens we oli olfala.
“?Baebol i Talem Wanem Long Saed Blong Fasin Blong Lukaotem Ol Olfala Papa Mo Mama?” (Web atikol)
Luk olsem wanem wan man we i no bin save olsem wanem blong tijim pikinini, i kam wan gudfala papa.
Faenemaot olsem wanem ol papa oli save frengud moa wetem ol boe blong olgeta.
“How Can Fathers Stay Close to Their Sons?” (Wajtaoa, 1 Novemba 2011)
a Long Baebol, fasin blong stretem i minim tijim, lidim, mo givim advaes. Be i no minim fasin blong spolem o givim kil long pikinini.—Ol Proveb 4:1.
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
