IRUẸMWI 50
De Vbene Ẹgbẹe Ruẹ Khian Ya Gha Mwẹ Oghọghọ Hẹ?—Abọ 2
Emọ keghi re ẹse ọhẹ nọ ke obọ e Jehova rre. Ọ hoo ne evbibiẹ emọ gha ya obọ esi mu ivbi iran. Ọ rhie ibude nọ maan ne evbibiẹ emọ, nọ gha ru iyobọ ne iran ya ru vberriọ. Ọ vbe rhie ibude ne emọ, nọ gha ya iran rẹn emwi ne iran gha ru, ne ẹgbẹe mieke na gha mwẹ oghọghọ.
1. De ibude ne Jehova rhie ne evbibiẹ emọ?
E Jehova hoo ne evbibiẹ emọ hoẹmwẹ ivbi iran, iran ghi vbe hia ne iran gha mwẹ ẹghẹ ne iran. Ọ vbe hoo ne iran gha gbogba ga ivbi iran ne ẹbe ghẹ rhuan iran, ne iran vbe ya ilele ni rre Baibol gha maa iran emwi. (Itan 1:8) Ọ wẹẹ ne avbe erha emọ “gha ya adia ọghe Jehova koko [ivbi iran].” (Tie Ẹfisọs 6:4, NW.) Ọ wa yẹẹ e Jehova, vbe evbibiẹ emọ ghaa ya adia ọghẹe koko ivbi iran, ọ vbe yẹẹ ọre deghẹ iran ma mu iwinna na, ne ọmwa ọvbehe.
2. De ibude ne Jehova rhie ne emọ?
E Jehova wẹẹ ne emọ “gha họn ẹmwẹ ne avbe evbibiẹ [iran].” (Tie Kọlose 3:20.) Emọ ghaa rhie ọghọ ne evbibiẹ iran, iran na vbe gha họn ẹmwẹ ne iran, te iran ya e Jehova kevbe evbibiẹ iran sọyẹnmwẹ. (Itan 23:22-25) Jesu wa rhie igiemwi esi yotọ vbe ọ rre ọvbokhan. Agharhemiẹn wẹẹ ọmwa nọ gbae ghaa nọ, te ọ ye gha họn ẹmwẹ ne evbibiẹ ọre, erriọ ẹre ọ vbe ya gha rhie ọghọ ne iran.—Luk 2:51, 52.
3. Vbe uwa khian ya sẹtin sikẹ Osanobua hẹ zẹvbe ẹgbẹe?
Deghẹ evbibiẹ ọmọ ẹre u khin, ẹi mwẹ u ma hoo ne ivbuẹ hoẹmwẹ e Jehova vbene uwẹ vbe ye. Vbua khian ya sẹtin ru iyobọ ne iran hẹ? Adia na, nọ rre Baibol, gha ru iyobọ nuẹn: ‘Maa ivbuẹ [ẹmwẹ Osanobua]. U ghi gha tae vbe u ghaa rre owa kevbe u gha kpa hin owa rre.’ (Diuteronomi 6:7) Na ‘maa iran emwi’ rhie ma wẹẹ, a ghi gha ta ẹmwẹ yan egbe yan egbe. Evbibiẹ emọ rẹnrẹn wẹẹ, te a ta ẹmwẹ yan egbe yan egbe, emọ ke sẹtin ye ẹre rre. Ako ọghe Baibol na, rhie ẹre ma wẹẹ, ọ khẹke ne evbibiẹ emọ gha loo ẹkpotọ nọ rhirhi kie ya maa ivbi iran emwi vbekpa e Jehova. Ọ wa khẹke ne iran gha zẹ ẹghẹ kọ uzọla uzọla, ne iran ya gha tie Baibol kugbe zẹvbe ẹgbẹe. Deghẹ u i mwẹ ọmọ, u gha vbe miẹn ere vbọ, vbe u ghaa ruẹ e Baibol uzọla uzọla.
GUALỌ OTỌ RE SAYỌ
Gia ziro yan emwi eso nọ gha ya ẹgbẹe gha mwẹ oghọghọ kevbe agbẹkunsotọ.
4. Gha rhie ahoẹmwọmwa ma zẹvbe ne u ya koko ivbuẹ
Ọmọ na koko i re iwinna nekherhe. De vbene Baibol gha ya sẹtin ru iyobọ ne evbibiẹ emọ hẹ? Tie Jems 1:19, 20, iyeke ọni, uwa ghi ziro yan avbe inọta na:
-
De vbene evbibiẹ emọ gha ya sẹtin rhie ahoẹmwọmwa ma hẹ, vbe iran ghaa gu ivbi iran guan?
-
Vbọzẹ nọ ma na khẹke ne evbibiẹ emọ gha ya ohu rhie adia ne ivbi iran? a
5. Gbogba ga ivbuẹ
Ne u mieke na gbogba ga ivbuẹ, ọ wa khẹke ne u gu ivbuẹ guan vbekpa emwi ọdọ vbe amwẹ. Ẹmwẹ vbenian keghi lọghọ emwa eso na ta. Kpee VIDIO na, iyeke ọni, uwa ghi ziro yan inọta ni lelẹe.
-
Vbọzẹ nọ na lọghọ evbibiẹ emọ eso, ne iran gu ivbi iran guan vbekpa emwi ọdọ vbe amwẹ?
-
De obẹlẹ ne evbibiẹ emọ eso he loo ya gu ivbi iran guan vbekpa emwi ọdọ vbe amwẹ?
Zẹvbe ne Baibol tae yotọ, te agbọn Esu ghi wa rhia yọ rhia yọ. Tie 2 Timoti 3:1, 13, iyeke ọni, uwa ghi ziro yan inọta na:
-
Emwa dan eso ne uviẹn 13 guan kaẹn, keghi mu ibiẹka yagha. Nọnaghiyerriọ, vbọzẹ nọ na khẹke ne evbibiẹ emọ maa ivbi iran emwi vbekpa emwi ọdọ vbe amwẹ, kevbe emwi ne iran gha ru, ne emwa ghẹ mu iran yagha?
U ka rẹn ra?
Avbe Osẹe Jehova wa kpemehe emwi nibun, ni ru iyobọ ne evbibiẹ emọ ya gha maa ivbi iran emwi vbekpa emwi ọdọ vbe amwẹ, ọ vbe ru iyobọ ne iran ya gbogba ga ivbi iran, ne emwa dan ghẹ mu iran yagha. Vbe igiemwi, ya ghee:
-
Uwa Gbogba Ga Ivbi Uwa (e vidio)
-
“Maa Ivbuẹ Emwi Vbekpa Emwi Ọdọ Vbe Amwẹ” (Awake! No. 5 2016)
6. Gha rhie ọghọ ne evbibiẹ ruẹ
Ọ khẹke ne ibiẹka kevbe ehọnrre gha rhie ọghọ ne evbibiẹ iran vbe odẹ ne iran ya gu iran guan. Kpee VIDIO na, iyeke ọni, uwa ghi ziro yan inọta ni lelẹe.
-
Vbọzẹ nọ na khẹke ne ọmọ gha ya ọghọ gu evbibiẹ ọre guan?
-
De vbene ọmọ gha ya sẹtin gu evbibiẹ ọre guan hẹ vbe odẹ nọ gha rhie ẹre ma wẹẹ, ọ rhie ọghọ ne iran?
Tie Itan 1:8, iyeke ọni, uwa ghi ziro yan inọta na:
-
Vbọ khẹke ne ọmọ ru vbe evbibiẹ ọre gha rhie adia nẹẹn?
7. Wa gha ga e Jehova zẹvbe ẹgbẹe
Ẹgbẹe ughughan ni re Osẹe Jehova keghi zẹ ẹghẹ kọ uzọla uzọla, ne iran ya ruẹ emwi vbe Baibol zẹvbe ẹgbẹe. De vbene iruẹmwi ẹgbẹe na ye hẹ? Kpee VIDIO na, iyeke ọni, uwa ghi ziro yan inọta ni lelẹe.
-
Vbọ khian ru iyobọ ne ẹgbẹe ya sẹtin gha ru Iruẹmwi Ẹgbẹe vbe uzọla uzọla?
-
De emwi ne evbibiẹ emọ gha ru, nọ gha ya ẹgbẹe iran gha sọyẹnmwẹ iruẹmwi ẹgbẹe?—Ya ghee efoto nọ rre omuhẹn ọghe iruẹmwi na.
-
De emwi nọ gha sẹtin yae gha lọghọ, ne uwa gha ruẹ emwi kugbe zẹvbe ẹgbẹe?
E Jehova keghi tama Ivbi Izrẹl nẹdẹ, ne ẹgbẹe gha ziro yan Evbagbẹn Nọhuanrẹn vbe ẹghẹ hia. Tie Diuteronomi 6:6, 7, iyeke ọni, uwa ghi ziro yan inọta na:
-
Vbua khian ya sẹtin lele ilele na hẹ?
Odẹ eso na ya ru iruẹmwi ẹgbẹe:
-
Wa mu egbe iko yotọ.
-
Wa tie okha ọkpa vbe Baibol ne u rẹnrẹn wẹẹ, ẹgbẹe ruẹ gha sọyẹnmwẹ ọnrẹn, wa ghi vbe ziro yan rẹn.
-
U ghaa mwẹ emọ ne giẹrẹ, u sẹtin ya danlod emwi eso na mwamwa ne ibiẹka vbe jw.org, u sẹtin vbe print ẹre ladian.
-
U ghaa mwẹ emọ ni re ehọnrre, wa ghi ziro yan uhunmwuta eso ni guan kaẹn ehọnrre vbe jw.org.
-
Wa vbe ivbuẹ koko ru orhiema ọghe okha ọkpa vbe Baibol.
-
Wa koko ghee vidio vbe jw.org, wa ghi vbe ziro yan rẹn.
EMWA ESO KEGHI KHA WẸẸ: “E Baibol lọghọ gbe ne ibiẹka gha rẹn otọ re.”
-
Vbua khian tama ọmwa vberriọ?
OLIKA ẸMWẸ
E Jehova hoo ne evbibiẹ emọ hoẹmwẹ ivbi iran, ne iran gha rhie adia ne iran kevbe ne iran gha gbogba ga iran; ọ hoo ne emọ gha rhie ọghọ ne evbibiẹ iran kevbe ne iran gha họn ẹmwẹ ne iran; ọ vbe hoo ne ẹgbẹe gha koko ga irẹn.
Ogbewerriẹ
-
De vbene evbibiẹ emọ gha ya sẹtin gha rhie adia ne ivbi iran hẹ? Vbe iran khian ya sẹtin gha gbogba ga iran hẹ?
-
De vbene emọ khian ya gha rhie uyi ne evbibiẹ iran hẹ?
-
De ere ne ẹgbẹe lae miẹn, vbe iran ghaa zẹ ẹghẹ kọ uzọla uzọla ya ga e Jehova kugbe?
RUẸ SAYỌ
De emwi eso ni gha ru iyobọ ne ivbuẹ ne giẹrẹ ya do gha re eniwanrẹn ni rẹn enegbe?
Ghee ibude ni rre Baibol ni gha ru iyobọ ne emwa ni gbaroghe evbibiẹ iran ni khian ọmaẹn nẹ.
“De Emwi Ne Baibol Khare Vbekpa Vbene A Ya Gbaroghe Evbibiẹ Ima Ni Khian Ọmaẹn Nẹ?” (Ọ rre intanẹt)
Ghee vbene okpia ọkpa nọ ma te rẹn vbene a ya koko emọ hẹ, ghi ya do khian erha nọ rẹn enegbe.
E Jehova Ẹre Ọ Maa Ima Vbene Ima Gha Ya Koko Ivbi Ima (5:58)
Ghee vbene avbe erha emọ gha ya sẹtin sikẹ ivbi iran nikpia sayọ hẹ.
a Vbe Baibol, adia keghi dekaẹn ibude, imamwaemwi kevbe na gbe ọmwa hin ọkhọ rre. Ẹi re na gha ya obọ atosi mu ọmwa.—Itan 4:1.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
