BAG I 50
Bʼo ghù tsiañde ntùm yu tunndà à ndùke?—Mbatte bag i
Bônkeʼ bʼa taʼ ndaʼ a fe Yaweh Nsi là. A tshwèt mbébte mbe tà bon tomde yen ndaʼ là. Yaweh Nsi num mfà ntag zenu tsʼa kuʼni neywimde tà bon neghù yennà là. Ntag a num mfà là num mbèn ndaʼde ju ze bônkeʼ kuʼni neghù nedù mbe tunndà tswe ntùm tsiañde là.
1. Yaweh Nsi nke mfà à tsit ntag ba tà bon bo ba mà bon à?
Yaweh Nsi tshwèt mbébte mbe tà bon boa mà bon kô bon tshob mbèn nke ntôg ngelañ yàm boa bo. A bèn nkô mbe tà bon tshètte bon tshob num nukebwô mbèn njéʼde num ba tun ntshùʼ Ñwaʼni Nsi kà ntswide yube. (Tànkùt 1:8) A tshwèt ntshob ba tà bon mbe “bo tshagde [bon tshob] . . . ntùm ntag [Yaweh Nsi].” (Siañ Efésô 6:4.) Ngelañ ba tà bon num mbét ntag Yaweh Nsi num nekwiagde bon tshobe, ke bèn mfà faʼ nekwiagde bon tshob à moʼ mènntùn nà, bo num ntsiañde ntù i.
2. Yaweh Nsi nke mfà à tsit ntag bônkeʼ à?
Yaweh Nsi tshob bônkeʼ mbe: “Bin nke njuʼ ntshu tà tsin mba mà tsine.” (Siañ Kolosé 3:20.) Ngelañ bônkeʼ num nkuʼni mbèn njuʼ ntshu tà bo mà tshob là, bo num ntsiañde ntù Yaweh Nsi mba ntù tà tshobe. (Tànkùt 23:22-25) Yésu naʼ fà taʼ mbwô mfiʼ ngelañ a naʼ mbe mônkeʼ là. Mba tà ndù a naʼ làn miagde là, a naʼ nke nkuʼni mbèn nke njuʼ ntshu tàab bo màab.—Lukas 2:51, 52.
3. O kuʼni neghebte Nsi bo yu tunndà à ndùke?
A be zʼo bʼa taʼ tà ke taʼ mà mén no là, magde ke bwe mbʼo kô mbe bon tsho kô Yaweh Nsi ndañndañ mba wù là. O kuʼni neghù yennʼà ndùke? A neghù ju ze Ñwaʼni Nsi tshwèt ntshob là: “O nsi ziʼde bon tsho yi [Ntshob Yaweh Nsi], nke ntshob nu bwe ndùsʼo be ntùm ndà o là, ndùsʼo tshwèt nkatte là.” (Nebwôgde 6:7) “Neziʼde” bʼa netswide taʼ ju mbèn mbwôgde yoñ yàme. O lèn mbʼa bètte o bwôgde tsemoʼ tshu bon tsho nedù mbe bo nke nkwimde. Yen nka Ñwaʼni Nsi li nke mbagdʼà mbe a bètte o nke ndiag njoñ ba manze fa netswide bon tsho mfà num Yaweh Nsi. A bʼa mbwô ju mbe njoñ tunndà fa tshuʼ ngelañ num neghù ziʼde tunndà njoñ ngabnjù fa. A be be ndù o keʼ ghù bônkeʼ, oaʼ jù bin neke ntshuʼ ngelañ njoñ ngabnjù fa num neziʼde Ñwaʼni Nsi.
TSWEʼ NTUN MI
Ziʼde ba ntag ntùn tsʼa ywimde njoñ tunndà fa netswe ntùm fide bo tsiañde là.
4. Tswide bon tsho bo nkôni
A keʼ bʼa fiag ju netswide taʼ mén. Ñwaʼni Nsi kuʼni neywimdʼo à ndùke? Siañ Yakobo 1:19, 20, mbèn mbùnde tshen mbètte li:
-
Ba tà bon kuʼni nelaʼde nkôni ngelañ bo tshwèt nswade ntshob bo bon tshob à ndùke?
-
A keʼ bètte mbe taʼ tà mén tsiagde mén i ntùm yantù à numke? *
5. Tshètte bon tsho
Num netshètte bon tsho, a bʼa ju ndùb neswade ntshob boa bo mfà num ntamde mandum bo mènnzwi. Bʼo ko tuswe neghù yennà. Lôde LAʼDE NETSHAÑ, mbèn mbùnde tshen mbètte li.
-
Numke a nta tsemoʼ tà bon netshob nu mfà num ntamde mandum bo mènnzwi bon tshob à?
-
Tsemoʼ tà bon naʼ loʼ à tsit mat num nebagde ju ze ntamde mandum bo mènnzwi be yi là bon tshob à?
Mba Ñwaʼni Nsi naʼ yà tshob là, njù Satan tshwèt mbag a be nebag nèn mbwe. Siañ 2 Timôtio 3:1, 13, mbèn mbùnde yen bètte li:
-
Tsemoʼ tshùagkèt benntùn bo tshob mfà num bo ntùm nka 13 nà num mbagde bônkeʼ. Là, ke zʼa ghù a be ju ndùb mbe tà bon tswide bon tshob mfà num ntamde mandum bo mènnzwi, mbèn ntswide yub mat bo kuʼni netshètte wut yub num ben bo be mbagde bônkeʼ à?
O naʼ lèn ké?
Ghakwénta Yaweh Nsi ghù bwoñ nkide tse bʼa ywimde ba tà bon netswide bon tshob mfà num ntamde mandum bo mènnzwi, mbèn ntshètte yub num ben bo be mbagde bônkeʼ là. Mba mfiʼ là, lôde:
-
Bin tshètte bon tsine (laʼde netshañ)
-
“Parler de sexualité à son enfant” (Réveillez-vous! no 5 2016)
6. Bin nke mfà nkuʼni tà zin bo mà zine
Be bônkeʼ kuʼni tà bo mà tshob ngelañ bo tshwèt nswade ntshob bo bo là. Lôde LAʼDE NETSHAÑ, mbèn mbùnde tshen mbètte li.
-
Numke a mbʼa ju ndùb taʼ nguanmèn nelaʼde nkôni tà tse ngelañ a tshwèt nswade ntshob boa bo à?
-
Be ta nguanmèn laʼde nkuʼni à ndùke ngelañ a tshwèt nswade ntshob bo tà tse à?
Siañ Tànkùt 1:8, mbèn mbùnde yen bètte li:
-
A bètte taʼ nguanmèn ghù à ndùke ngelañ tà tse fà taʼ ntshùʼ yi à?
7. Bin tamde ngamde Yaweh Nsi ntùm tunndà
Ba tunndà ghakwénta Yaweh Nsi num ndoʼ ngelañ njoñ ngabnjù fa num neghamde Yaweh Nsi. Yen ziʼde tunndà là nke ntôg à ndùke? Lôde LAʼDE NETSHAÑ, mbèn mbùnde tshen mbètte li.
-
Taʼ tunndà kuʼni neghù à ndùke num neyab taʼ nkazin ziʼde tunndà njoñ ngabnjù fa à?
-
Taʼ tà tunndà kuʼni neghù à ndùke nedù mbe mba we lo jù bin ziʼde tunndà mbèn tsiañdʼà?—Lôde netshañ netoʼde yen bag i li.
-
Mbʼa ta yu tunndà neghù ziʼde tunndʼà numke?
Ntùm ngô Israél, Yaweh Nsi naʼ kô mbe ba tunndà kùmde num neswade ntshob mfà num Ñwaʼni Nsi njoñ ngelañ fa. Siañ Nebwôgde 6:6, 7, mbèn mbùnde yen bètte li:
-
Mbʼo yab yen tun ntshùʼ li ntùm faʼ à ndùke?
Ntag num ziʼde tunndà:
-
Bin nabte tshu tse bo ziʼde ntùm ndà ntseʼde là.
-
Bin siañ mbèn nswade ntshob mfà num taʼ tshô Ñwaʼni Nsi zʼa bwô zin nà.
-
A be ze bin ghù bontoʼ bônkeʼ là, bin loʼo nya ke là bin fét tshufaʼ num bontoʼ bônkeʼ num jw.org.
-
A be ze bin ghù ghuan ben nà, bin swade ntshob mfà num ba nkide tsʼa tshwèt ntshob mfà num ghuan benntùn nà num jw.org.
-
Bin fiʼde taʼ tshô ntùm Ñwaʼni Nsi bo bon tsine.
-
Bin lôde mbèn nswade ntshob mfà num taʼ netshañ num jw.org.
TSEMOʼ BENNTÙN NUM NTSHOB MBE: “Tsemoʼ ngelañ a num nta mba ba ndùb nejuʼ Ñwaʼni Nsi; ndùlà, be bônkeʼ ke juʼ sàm ju num bwe.”
-
O kwade yu à mbe ke?
JU NETSHÙBE
Yaweh Nsi kô mbe tà bon kô, ntswide mbèn ntshètte bon tshobe; a kô mbe bônkeʼ kuʼni mbèn njuʼ ntshu tà tshobe; a bèn kô mbe njoñ tunndà fa kùmde num neghamdʼé.
Mbètte nekwimde
-
Tà bon kuʼni netswide mbèn ntshètte bon tshob à ndùke?
-
Be bônkeʼ laʼde nkuʼni tà tshob à ndùke?
-
Bin netshuʼ ngelañ num neghù ziʼde tunndà njoñ ngabnjù fa bʼa tsilʼà?
DIAGE
Be bin ywimde bon tsin neghù mbwô mat ngelañ bo kuʼ lʼà ndùke?
“Six valeurs à transmettre aux enfants” (Réveillez-vous! no 2 2019)
Ziʼde ntag ntùn ze Ñwaʼni Nsi be mfà ben bo num ntomde tà tshob tse bo yà tènde ntùm nguʼnjù là.
“Prendre soin de ses parents âgés : quʼen dit la Bible?” (Ñwaʼni num jw.org)
Yen mba taʼ mandum zʼa naʼ mbe ke lèn nekwiagde bônkeʼ be miagde tùʼ taʼ mbwô tà là.
Yen mba taʼ tà kuʼni neso neta num ze kushun bo nshum i là.
“Comment un père peut-il rester proche de son fils?” (La Tour de Garde, 1er novembre 2011)
^ Ntùm Ñwaʼni Nsi, “netsiagde” nke ndaʼdʼà netswide, netshagde taʼ mén bèn njwimdʼé nebade tse mat kebwô. Netsiagde keʼ nke mbagde tsʼa netshùag mén njaʼ nkaʼ.—Tànkùt 4:1.
