TJONÏK 50
¿Achkë ütz nkiʼän ri familias rchë kiʼ kikʼuʼx nkiʼän?
Ri akʼalaʼ jun spanïk ruyaʼon Jehová chkë ri teʼej tataʼaj, ye kʼa ryä nrajoʼ chë ryeʼ yekichajij. Rma riʼ nuyaʼ utziläj taq naʼoj chkë rchë yekowin nkiʼän ri samaj riʼ. Chqä nuyaʼ kinaʼoj akʼalaʼ rchë yetoʼon rchë ri ki-familia kiʼ kikʼuʼx nkiʼän.
1. ¿Achkë naʼoj nuyaʼ Jehová chkë ri teʼej tataʼaj?
Jehová nrajoʼ chë ri teʼej tataʼaj yekajoʼ kalkʼwal, nkijäm kiwäch rchë yejeʼ kikʼë, yekichajij chqä nkiksaj ri naʼoj ye kʼo chpan le Biblia rchë yekitjoj (Proverbios 1:8). Dios nuʼij reʼ chkë ri tataʼaj ri kʼo chë nkiʼän kikʼë ri kalkʼwal: «Keʼitjoj rkʼë [...] ri naʼoj yeruyaʼ Jehová» (taskʼij ruwäch Efesios 6:4). Jehová kan jaʼäl nutzʼët chë ri teʼej tataʼaj nkiksaj ri naʼoj yeruyaʼon qa ryä rchë yekitjoj ri kalkʼwal chqä chë ma pa kiqʼaʼ ta ri nkʼaj chik nkiyaʼ wä qa ri samaj riʼ.
2. ¿Achkë naʼoj nuyaʼ Jehová chkë ri akʼalaʼ?
Jehová nuʼij reʼ chkë ri akʼalaʼ: «Tinmaj kitzij ri iteʼ itataʼ» (taskʼij ruwäch Colosenses 3:20). We jun akʼal ma nuqasaj ta kiqʼij ruteʼ rutataʼ chqä nunmaj kitzij, ryeʼ chqä Jehová kan kiʼ kikʼuʼx xtkiʼän rkʼë (Proverbios 23:22-25). Jesús xyaʼ qa jun utziläj tzʼetbʼäl chkiwäch ri akʼalaʼ chrij riʼ; tapeʼ majun ta wä mak chrij, ryä kan xnmaj kitzij ri ruteʼ rutataʼ, ri xa ye ajmakiʼ wä (Lucas 2:51, 52).
3. ¿Achkë ütz nkiʼän ri familias rchë más junan nuʼän kiwäch rkʼë Jehová?
We rït ye kʼo awalkʼwal, kantzij na wä chë nawajoʼ chë ryeʼ chqä nkajoʼ Jehová achiʼel rït. Ye kʼa ¿achkë ütz naʼän rchë ryeʼ nkajoʼ Jehová? Ütz nasmajij re naʼoj reʼ ri nuyaʼ le Biblia: «Kʼo chë nakʼüt chkiwäch ri awalkʼwal [ri rutzij Jehová] y natzjoj chkë taq yït tzʼyül chawachoch, taq yït bʼenäq pa bʼey, taq yapneʼ (yakotzʼeʼ) y taq yakatäj» (Deuteronomio 6:7). Kantzij na wä chë kʼo mul kʼo chë nakamluj jun ri abʼin chik chkë ri awalkʼwal rchë ryeʼ ma nkimestaj ta. Rma riʼ ri nrajoʼ nuʼij re texto reʼ, ya riʼ chë rït kʼo chë nakanuj rubʼanik rchë ronojel qʼij natzjoj Jehová chkë ri awalkʼwal. Chqä, ütz chë rït chqä a-familia nijäm iwäch ronojel semanas rchë niyaʼ ruqʼij Jehová taq nitjoj iwiʼ chrij le Biblia. Y, tapeʼ majun ta awalkʼwal, ri natjoj awiʼ chrij Ruchʼaʼäl Dios pan ayonïl ronojel semanas xkaturtoʼ rchë más junan xtuʼän awäch rkʼë Jehová.
TQATAMAJ MÁS CHRIJ RE NAʼOJ REʼ
Tqanukʼuj kij jojun naʼoj chpan le Biblia ri yekitoʼ ri familias rchë más junan nuʼän kiwäch chqä rchë kiʼ kikʼuʼx nkiʼän.
4. Takʼutuʼ chë yeʼawajoʼ ri awalkʼwal rkʼë ri rubʼanik yeʼatjoj
Ri kitjoxik ri akʼalaʼ kan rukʼwan kʼïy samaj. Ye kʼa ¿achkë rubʼanik yaturtoʼ le Biblia rchë naʼän ri samaj riʼ? Tiskʼij ruwäch Santiago 1:19, 20 y kixtzjon chrij reʼ:
-
Taq ri teʼej tataʼaj yetzjon kikʼë kalkʼwal, ¿achkë rubʼanik nkikʼüt chkiwäch chë yekajoʼ?
-
Taq ri teʼej tataʼaj katajnäq kiyowal, ¿achkë rma ma kʼo ta chë yekiqʼïl kalkʼwal taq ke riʼ kinaʼon? a
5. Keʼachajij ri awalkʼwal
Rchë yeʼachajij ri awalkʼwal kan janina nkʼatzin chë rït yatzjon kikʼë chkijujnal chrij ri sexo, tapeʼ rkʼë jbʼaʼ kʼayewal xtuʼän chawäch xkatzjon chrij riʼ. Titzʼetaʼ ri VIDEO y kixtzjon chrij reʼ:
-
¿Achkë rma kan kʼayewal nuʼän chkiwäch jojun teʼej tataʼaj yetzjon kikʼë kalkʼwal chrij ri sexo?
-
¿Achkë toʼoyon kichë jojun teʼej tataʼaj rchë ye tzjonäq kikʼë kalkʼwal chrij riʼ?
Achiʼel rubʼin pä chik le Biblia, ri itzel taq winäq kan más na chik itzel najin nuʼän kinaʼoj. Tiskʼij ruwäch 2 Timoteo 3:1, 13 y kixtzjon chrij reʼ:
-
Jojun chkë ri itzel taq winäq ri yerutzjoj ri versículo 13 yekiʼän tzʼil taq bʼanobʼäl kikʼë akʼalaʼ. Rma riʼ ¿achkë rma kan nkʼatzin chë ri teʼej tataʼaj yetzjon kikʼë kalkʼwal chrij ri sexo? ¿Y achkë ütz nkiʼän ryeʼ rchë yekichajij kalkʼwal chkiwäch ri yebʼanö riʼ?
¿Ataman rït reʼ?
Ri testigos de Jehová kesan kʼïy samajbʼäl ri yekitoʼ ri teʼej tataʼaj rchë yetzjon chrij sexo kikʼë kalkʼwal chqä rchë yekichajij chkiwäch ri nkajoʼ yekiʼän tzʼil taq bʼanobʼäl kikʼë. Ya reʼ jojun chkë riʼ:
-
Keʼichajij ri iwalkʼwal (video)
-
«¿Achkë rubʼanik yatzjon rkʼë awalkʼwal chrij ri sexo?» (¡Despertad!, núm. 5 2016)
6. Ma taqasaj ta kiqʼij ri ateʼ atataʼ
Ri akʼalaʼ chqä ri qʼopojiʼ kʼojolaʼ kʼo chë ma nkiqasaj ta kiqʼij ri kiteʼ kitataʼ, rma ya riʼ kan nqʼalajin rkʼë ri rubʼanik yetzjon kikʼë. Titzʼetaʼ ri VIDEO y kixtzjon chrij reʼ:
-
¿Achkë rma ütz chë ri akʼalaʼ ma nkiqasaj ta kiqʼij ri kiteʼ kitataʼ taq yetzjon kikʼë?
-
¿Achkë ütz nkiʼän ri akʼalaʼ rchë ma nkiqasaj ta kiqʼij ri kiteʼ kitataʼ?
Tiskʼij ruwäch Proverbios 1:8 y kixtzjon chrij reʼ:
-
¿Achkë kʼo chë nkiʼän ri akʼalaʼ taq nyaʼöx jun kinaʼoj kimä ri kiteʼ kitataʼ?
7. Tiyaʼ ruqʼij Jehová pan iwachoch
Ri testigos de Jehová ronojel semanas nkijäm kiwäch rchë nkiyaʼ ruqʼij Dios pa kachoch. ¿Achkë rubʼanik nkiʼän riʼ? Titzʼetaʼ ri VIDEO y kixtzjon chrij reʼ:
-
¿Achkë xttoʼö kichë ri familias rchë ronojel semanas xtkiyaʼ ruqʼij Dios pa kachoch?
-
Taq nkiyaʼ ruqʼij Dios pa kachoch, ¿achkë ütz nkiʼän ri teʼej tataʼaj rchë nkikʼüt utziläj taq naʼoj chkiwäch ri kalkʼwal chqä rchë jontir kiʼ kikʼuʼx nkiʼän? (Tatzʼetaʼ ri achbʼäl ri kʼo pä pa naʼäy).
-
Y rïx, ¿kʼo komä jun nqʼatö iwchë rchë niyaʼ ruqʼij Dios pan iwachoch? ¿Achkë?
Ojer qa, Jehová xrajoʼ chë jontir ri familias israelitas nkinukʼuj ruwäch ri pixaʼ xyaʼ chkë. Tiskʼij ruwäch Deuteronomio 6:6, 7 y kixtzjon chrij reʼ:
-
¿Achkë ütz naʼän rït rchë nasmajij re naʼoj reʼ?
Ri ütz niʼän taq niyaʼ ruqʼij Dios pan iwachoch:
-
Titjoj äl iwiʼ chkij ri qamoloj.
-
Tiskʼij chqä tinukʼuj rij jun peraj che rä le Biblia ri nkajoʼ nkitamaj a-familia.
-
We ri awalkʼwal kʼa ye koköj na, tabʼanaʼ descargar o imprimir jun chkë ri wuj kichë akʼalaʼ ri kʼo pa jw.org.
-
We ye kʼo awalkʼwal adolescentes, tachaʼ jun peraj pa jw.org ri bʼanon pä chkë ri qʼopojiʼ kʼojolaʼ.
-
Tibʼanaʼ dramatizar jun tzijonem ri kʼo chpan le Biblia.
-
Titzʼetaʼ chqä tinukʼuj rij jun video ri kʼo pa jw.org.
JOJUN WINÄQ NKIʼIJ REʼ: «Ri nuʼij chpan le Biblia kan kʼayewal nqʼax chkiwäch ri akʼalaʼ».
-
¿Achkë naʼij rït?
RI XQATAMAJ QA
Jehová nrajoʼ chë ri teʼej tataʼaj yekajoʼ kalkʼwal, yekitjoj chqä yekichajij. Chqä nrajoʼ chë ri akʼalaʼ ma nkiqasaj ta kiqʼij ri kiteʼ kitataʼ chqä nkinmaj kitzij. Y, nrajoʼ chë jontir ri ye kʼo chpan jun familia junan nkiyaʼ ruqʼij.
Tqakamluj ri xqatzʼët qa
-
¿Achkë ütz nkiʼän ri teʼej tataʼaj rchë yekitjoj chqä yekichajij ri kalkʼwal?
-
¿Achkë rubʼanik nkikʼüt ri akʼalaʼ chë ma nkiqasaj ta kiqʼij ri kiteʼ kitataʼ?
-
¿Achkë utzil nkïl ri familias taq ronojel semanas nkiyaʼ ruqʼij Dios pa kachoch?
RCHË NATAMAJ MÁS
¿Achkë naʼoj xketoʼö ri awalkʼwal rchë kuw xkepaʼeʼ chkiwäch ri kʼayewal ri xtkïl pa kikʼaslemal?
«6 naʼoj ri nkʼatzin nkismajij ri awalkʼwal» (¡Despertad!, núm. 2 2019)
Tatzʼetaʼ jojun naʼoj ri nkʼatzin chkë ri najin nkichajij jun winäq ri ya kʼo chik rujunaʼ.
«¿Nuyoʼej komä Dios chë yeqachajij ri qateʼ qatataʼ taq ya xtbʼä kijunaʼ?» (Reʼ xtawïl pa jw.org)
Tatzʼetaʼ achkë rubʼanik jun achï xok jun utziläj tataʼaj tapeʼ ma retaman ta wä achkë rubʼanik yerukʼiytsaj ri ralkʼwal.
Jehová xkʼüt chqawäch achkë rubʼanik yeqatjoj ri qalkʼwal (5:58)
Tatamaj achkë ütz nuʼän jun tataʼaj rchë más ütz xtkʼwaj riʼ kikʼë ralkʼwal.
a Taq le Biblia ntzjon chrij ri naqʼïl jun awalkʼwal, najin ntzjon chrij ri tjonïk nayaʼ che rä chqä chrij ri runaʼoj nayaʼ taq kʼo jun ma ütz ta nuʼän. Reʼ ma rukʼwan ta riʼ rkʼë ri nkiʼän ri winäq. Ryeʼ kan kuw yechapon chkë kalkʼwal chqä kan nqʼax ruwiʼ yekichʼäy (Proverbios 4:1).
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
