LESÖN 50
Sitih Inlahen Öng Mihôiṅ Ngam Mikūönö Meh Nö Ṙamlōn?—Pāt 2
Inlōnti yin vē nyīö nö aṅ in Yāvē. Lōnu anga-aṅ tö më inyööngö nö haköpten cha tö minë chööngö ò. Lökten nö kētö minë tövai inlēnö cha. Ōt nun inrē minë inlēnö nyīö, yěn hāngö u min cha-a ngaich ṙòkhöre min nö ṙamlōn nö el ngam mikūönö.
1. Asuh nup inlēnö kahëtö Yāvē nö in më inyööngö?
Meūka Yāvē tö më inyööngö nö hangenlōn tö më kūönre, kē-ěny ṙētakre inrē nö in cha sā tölngö kanò-òṅ cha. Lōnu inrē anga-aṅ tö më inyööngö nö laklen më kūön re tö nup tötlöng, haköpten cha inrē tö minë inlēnö aṅmat ngam Paipöl. (Inchōḵ-oṙô 1:8) Ngö ṙô an ngam Paipöl: “Yī-ö inrē inyöngö kikōnyö, uh yin harunnyö lanīnö më kūönre: harūkö cha pöri im chinökṙen.” (Vë-evkūö Efisös 6:4.) Yēḵ më inyööngö min nö hakôten re nö haruklö më kūön re nö öt kēngen ngam la-en re nö eltī tahëng, ngaich ṙamlōn min Yāvē nö in cha.
2. Asuh nup inlēnö kahëtö Yāvē nö in më nyīö?
Ngö ṙô an Yāvē nö in më nyīö: “Hang chöngö yöngre yin, i tökeuheūttöre.” (Vë-evkūö Kòlòsi 3:20.) Yēḵ më nyīö min nö hang chööngö yöngre, milēḵṙen inrē tö cha. Ngaich ṙamlōn tī min cha-a tö Yāvē, tö më yöngre inrē. (Inchōḵ-oṙô 23:22-25) Tövai ök Yēsū nö inchō-okūö më nyīö. Pòrô nak yöng ò nö töthet, sön anga-aṅ nö hang chööngö cha, milēḵṙen inrē tö cha.—Lūkös 2:51, 52.
3. Sitih inlahen öng kò-òren ngam mikūönö nö asīöp ngam innôlöre nö in Yāvē?
Yēḵ meh öm tökūönu, pī-a öm lōnu tö më kūönre nö hangenlōn tö Yāvē nö sā ṙôken hanangenlōn meh tö ò. Sitih inlahen öm min hayööken cha? Hang ngih inlēnö man aṅmat ngam Paipöl: “Haṙēmngenre man haköpten yip kūönre tö u, kakken u inrē in cha yē meh ūichhaka el pati re, yē meh inrē el talöökö kiröönköre, yē meh inrē hulalhakaṙen, yē meh inrē chōholre.” (I.Chööngö 6:7) Tö ngö manah an ngam “haköpten cha” tö hī öi ötkô höng hěngheuh ṙô, pöi hòṅ ṙōlheuh ṙô öi vë-eny nang cha. Akahakūö in tö vē nyīö nö öt kööpölōn yēḵ hī öi höng hěngheuh ṙô öi haköpten cha, hòṅ ṙōlheuh ṙô pöri ayī-ö öi vë-eny nang cha. Angū-ö ṙô ngih miröökö, tö hī yěi teūngen tö ṙētakre ngaich hòṅ haköptö më kūönre ayī-ö tö inlahen Yāvē, vai inrē angū-ö yěi kaheuk afta öi kēken ngam fëmilī vörsip. Pòrô inrē yip töt kūönu, mihôiṅ cha-a nö örheūheu nö haköpmat Paipöl.
MIKAHTÖKŪÖRE HĒK
Ta-a töi ngëichkö në inlēnö tö ṙamlōn tī min tö hī, yěi hāngö u öi ṙòkhöre öi el minë mikūönö, mihôiṅ min inrē öi kuchīken.
4. Holtö hanangenlōn re haköptö më kūönre
Hö-ö in öi lööṙen öi haköptö më kūönre. Asuh nup inyööken hī tö kētu aṅmat ngam Paipöl? Vë-evkūö Yāköp 1:19, 20, ngaich kakkö minë intöönö yamih:
-
Hòṅ sitih ṙô aich më inyööngö yěn vë-ekūö meh kūönre, hòṅ më nyīö nö akahaiṙen tö më yöng cha nö hangenlōn tö cha?
-
Yěn vaichköre inlahen më nyīö, ngaich kūö yòh më inyööngö nö ötkô nö tānyö ṙô yěn halēnö cha? a
5. Laklö më nyīö yin tö nup tötlöng
Yēḵ meh hòṅ laklö më kūönre tö minë tötlöng, ngaich hòṅ mikahtö elnang cha më-eṅ tö inlahen ngam sex. Lohten min öm piyū-u ṙô öm vë-eny nang cha tö e. Röngnyöm VITIŌ, ngaich kakkö minë intöönö yamih.
-
Kūö yòh yip rīkre inyööngö nö piyū-u ṙô nö kakkö inlahen ngam sex nö in yip kūönre?
-
Sitih inlahen yip ngaich rīkre inyööngö yěn mikahtö elnang më kūönre tö inlahen ngam sex?
Sā ineūkö inlahen ngih panam ngam Sī-ö tö ngam Paipöl ngaich an töngamuh nöng iṙūöhöröön nö chuh im ötlanöökö. Vë-evkūö 2 Timôtī 3:1, 13, ngaich kakkö ngih intöönö yamih:
-
Më tötlöök tarik tö kakka im tö 13 miröökö, ōt yin më in cha tötlamëken më nyīö. Hòṅ sitih inlahen aich rih më inyööngö nö chumkūöṙen nö mikahtö elnang më nyīö tö inlahen ngam sex hòṅ cha nö laklöre tö yip tötlamëken cha?
Akahakūö öm?
Pōyen minë līpöre vahī më Vamënyen Yāvē, inyööken më inyööngö yěn hòṅ haköptö më kūönre. Imat u nö vënyu minë inlahen ṙô më inyööngö nö mikahtö elnang më kūönre tö inlahen ngam sex, hòṅ cha nö laklöre tö yip tötlamëken cha. Në nun yih līpöre:
6. Milēḵṙen man tö minā yöngre
Mihôiṅ më nyīö hēk më ṙāl tarik nö inup ṙô re nö hameuktöre nö milēḵṙen tö më yöngre yěn vë-ekūö cha. Röngnyöm VITIŌ, ngaich kakkö minë intöönö yamih.
-
Asuh öp min yanöölen më ṙāl tarik, yěn holtö minlēḵṙen re nö vë-ekūö më yöngre?
-
Yěn hòṅ milēḵṙen ṙô më ṙāl tarik nö vë-ekūö minā yöngre, ngaich hòṅ sitih inlahen ṙô cha-a?
Vë-evkūö Inchōḵ-oṙô 1:8, ngaich kakkö ngih intöönö yamih:
-
Yěn kētu inlēnö ngòh ṙāl tarik tö minā yöngre, ngaich hòṅ sitih inlahen anga-aṅ?
7. Holṙô re yin tö mikūönöre öi ha-önyö Yāvē
Kaheuk afta yin më Vamënyen Yāvē nö meukkūöre tö ngam mikūönöre nö fëmilī vörsip. Sitih inlahen cha-a yěn fëmilī vörsip? Yěm hòṅ mikahtökūöre, kò-òren röngnyöm VITIŌ, ngaich kakkö minë intöönö yamih.
-
Hòṅ sitih inlahen öng ngam mikūönö, yěn hòṅ kaheuk afta nö kēken ngam fëmilī vörsip?
-
Hòṅ sitih inlahen aich minā inyööngö yēḵ cha nö lōnu tö ngam fëmilī vörsip nö yöölen tī tö cha nö ṙòkhöre?—Kò-òren ngëichköm nyat im ranehnyö ngih lesön.
-
Asuh nup min kò-òren kanihngen ikūö meh, yěm hòṅ kēken ngam fëmilī vörsip?
Lōnu Yāvē misī tö yik mikūönö yik aṅ Israel nö örheūheu nö kakkö ṙô ngam töhet līpöre nö in höö. Vë-evkūö I.Chööngö 6:6, 7, ngaich kakkö ngih intöönö yamih:
-
Sitih inlahen öm min më-eṅ hang ngih lökngörit chööngö aṅmat Paipöl?
Kalahten re kēken në yěm fëmilī vörsip:
-
Holṙen re halēn minë mīting.
-
Holṙô re kakkö inlahen më tarik tö vënyu inlahen nö imat ngam Paipöl.
-
Pōyen nun minë kumchik ṙô më nyīö nö haköp nö el ngam jw.org. Yěm hòṅ kē-ěkūö më nyīö tö u, ngaich mihôiṅ öm taōnlōt hēk print nyen u ngaich kēten u öm in cha.
-
Minë inyööken më ṙāl tarik ātiköl el ngam jw.org, mihôiṅ öi katöllö öp töhěng ātiköl ngaich kakken u.
-
Ōt nun minë trāma aṅmat ngam Paipöl, mihôiṅ öi holṙen re tö kūönre öi nyamken u.
-
Mihôiṅ öi meuk öp töhěng vitiō el ngam jw.org, ngaich holṙô re öi kakken u.
ṘÔ YIP TAHËNG: “Sitih inlahen aich min më nyīö nö akaha elnang tö ṙô ngam Paipöl?”
-
Sitih ṙô öm min më-eṅ?
MINË HAKÖP HĪ NGAICH
Meūka Yāvē tö më inyööngö nö hangenlōn tö më kūönre, haköpten cha, laklen cha inrē. Lōnu inrē anga-aṅ tö më nyīö nö milēḵṙen tö më yöngre, hang nup chööngö cha inrē. Lōnu inrē tö ngam mikūönö nö holṙen re nö löklōn ò.
Sitih ṙô öm më-eṅ?
-
Hòṅ sitih inlahen aich më inyööngö, nö haköptö më kūönre hēk laklen cha inrē?
-
Hòṅ sitih inlahen aich më nyīö, yěn hòṅ milēḵṙen tö minā yöngre?
-
Asuh nup min yanöölen meh yěm halēnlö ṙētakre öm kēken ngam fëmilī vörsip itö hěng afta?
NGËICHKÖ NË INRĒ
Asuh nup min ṙô meh inköphöti nö tö yöölen tī min tö më nyīö yēḵ cha min nö kiröng?
“Minë Tö Tafūöl Lesön Tö Hòṅ Haköpö Tö Më Nyīö” (Hīnöre!-HI Öngk. 2 2019)
Asuh nup tökētu inlēnö tö ngam Paipöl nö in yip mahaṙūöken yip tököiny inyööngö nö ngaich? Töi mikahtökūöre.
“Sitih Ṙô Öng Ngam Paipöl Tö Ngam Inṙūötken Yip Tököiny Nö Ngaich Yöng Hī?” (El vepsāit töhakööpö)
Hěngtak ngam tarik tö hòṅ vāyö tī nö haruklö më kūönre öt heuveū-en pöri anga-aṅ sin. Ngëichkö inlahen ò, sitih inlahen ang ngaich nö heuveū-en nö haruklen cha.
Mikahtökūöre tö inlahen ngam inyööngö kikōnyö nö ngöönö innôlö nö in më kūönre kikōnyö.
“Sitih Inlahen Öng Nö Köp Nö Ngön Ngam Innôlö Cha Tö Kūönre?” (Chūökamahati-HI Ĕprĕl-Chūn 2012)
a Yěi hang ngam ṙô ‘chinökṙen’ nö imat ngam Paipöl, holre anū-ö tö ngam inköphöti, minkahtö elmat, inmeuktö öp tölöng talöökö töm kinëtö chinökṙen inrē. Öt tö ngö manah pöri angū-ö tö hī ngaich öi yāha tī öi chökṙen më nyīö.—Inchōḵ-oṙô 4:1.
